Eerste Groot hupstoot vir NPL

Tielman van LillDie Namibiese Premierliga (NPL) het gister by Sokkerhuis in Katutura sy verkryging van ’n nuwe borgskap van N$3 miljoen per jaar vir die volgende drie jaar (tot 2019) aangekondig.Volgens mnr. Cassius Moeti, woordvoerder van die NPL, is die ooreenkoms met Groot Systems (Pty) Ltd nog nie onderteken nie, maar behoort binne die volgende week afgehandel te wees. Altesame 37 maatskappye is genader om in Namibië se voorste sokkerliga te belê, maar net twee het gereageer. Die Namibië Brouerye (NBL) was die ander belangstellende party. NBL is reeds met sy Tafel Lager-handelsmerk die hoofborg van die nasionale span, die Brave Warriors.Die N$3 miljoen borgskap van Groot Systems (Pty) Ltd is egter ’n druppel in die emmer, gemeet aan die NPL se begroting van N$24 miljoen per seisoen.Die Premierliga bestaan uit 16 klubs wat in ’n dubbelrondte (tuis en weg) teen mekaar speel en ná 30 wedstryde elk word die nasionale ligakampioen bekroon. Die eerste liga, wat die voedingsbron vir die NPL is, bestaan uit 36 spanne wat ook uit dié begroting gefinansier moet word.Die begroting van N$24 mil. vir die 2016/17-seisoen behels die volgende aspekte:• Administrasie N$3.5 miljoen.• Logistiek N$1.2 miljoen. • Operasionele uitgawes N$2.7 miljoen.• Eerste liga N$3 miljoen. • Prysgeld N$3 miljoen. • Toekenningsdinee N$500 000.• Maandelikse toelae N$10.1 miljoen.Om voornemende beleggers na sokker te lok, het die NPL vier pakkette saamgestel en beloof om behoorlike bemarkingswaarde vir borge te verseker. Die pakkette is Platinum (N$24 miljoen per jaar), Goud (N$15 miljoen), Silwer (N$5 miljoen) of Brons (N$3 miljoen per jaar).Kontrakte word vir termyne van drie jaar gesluit, waarna die borg sy kontrak kan hernu.Aan borge word TV-blootstelling deur middel van NBC, advertensieborde by sokkervelde, handelsmerke op truie asook blootstelling op nuuskonferensies, advertensie- en promosiemateriaal, sosiale media en die NPL en NFA se webwerwe voorgehou.Die begin en afsluiting van elke seisoen geniet ook wye dekking in die media. Ter afsluiting by die toekenningsaand word die presterende spelers en klubs vir hul harde werk gedurende die seisoen vereer.Die voordele van die pakkette is omvattend en verskil van mekaar. ’n Platinum borg sal die titelhouer wees en die NPL sal daarna vernoem word. Brons bied die moontlikheid dat 36 spanne met elf spelers elke naweek landwyd vir 90 minute voor toeskouers en TV-kykers met die borg se naam op hul truie sal speel.Volgens mnr. Johnny Doeseb, voorsitter van die NPL, kan die nuwe sokkerseisoen nie afskop alvorens dié liggaam se begroting klop nie. Hy het ook weer verduidelik dat sokker nie net vir spelers ’n bron van inkomste is nie.“As ons na die groter prentjie kyk, plaas sokker vir meer mense kos op die tafel as net vir die spelers. Natuurlik is die spelers die grootste faktor, want sonder hulle is daar nie ’n wedstryd waarna mense kan gaan kyk nie. Ons dink hier aan ’n horde mense wat ’n stalletjie het wat verkope in en om die stadions doen om hul gesinne te voed. “Dit is vir ons belangrik om ons talentvolle jeug van die versoekings van die strate af weg te hou en hulle ’n inkomste te gee om hul families te onderhou. “As ons nie ’n premierliga het nie, gaan ons nasionale span beslis ook ernstig daaronder ly. Ons wil ’n beroep op Namibië doen om sokker te ondersteun en in ons land en sy mense te belê,” het Doeseb gesê.Belangstellende maatskappye kan vir volledige inligting die Namibiese Premierliga direk skakel.

Eerste Groot hupstoot vir NPL

Kommentaar

Republikein 2025-12-19

Meld asseblief aan om kommentaar te lewer

Eerste Groot hupstoot vir NPL

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.