Eers hitte, dan reën

Elvira Hattingh - Reën sal na verwagting vandeesweek oor Namibië se binneland voorkom, en terselfdertyd word snikhete weer vir die eerste deel van die week verwag. Mnr. Odillo Kgobetsi, hoofweervoorspeller by die Namibiese weerkantoor, het gister aan Republikein gesê swaar reëns kan dalk vandeesweek in die sentrale noordelike, sentrale asook noordwestelike dele van die land voorkom.Terselfdertyd word net enkele wolke in die ||Kharasstreek verwag. “Reën sal na verwagting teen Donderdag ook aan die noordelike kus voorkom,” het Kgobetsi gesê. Dit strook met die nieregeringsorganisasie LandWater se voorspellings, wat satellietfoto’s wetenskaplik ontleed en interpreteer en meen toestande vir reën in die noordelike en sentrale dele van die land vertoon goed.LandWater meen ’n kans bestaan dat dié reënneerslae selfs kan uitbrei na dele in die suide, maar onsekerheid heers oor die kans dat dit die Weste gaan bereik. Dít, meen LandWater, hang af van hoe sterk die westewinde die reën sal dryf.REËNVOORUITSIGTE VERBETERIntussen het Santam Suid-Afrika se landbouweerkundige, mnr. Johan van den Berg, in ’n vooruitskouing op 21 November gesê vooruitsigte vir reën het vir die eerste deel van Desember in die noordoostelike, oostelike en sentrale dele van Namibië verbeter. Van den Berg meen langtermynvooruitsigte blyk meer positief te wees tydens die tweede helfte van die somerreënseisoen, wanneer die Indiese Oseaan se invloed op ons weerpatrone kan afneem.“Nog ’n mini- El Niño-spel is tans onderweg, met drie van die vier Niño-gebiede wat net buite hul neutrale vlakke verkeer, oftewel tussen 0,6°C en 0,9°C warmer as gemiddeld is,” het Van den Berg in sy jongste verslag gesê. “Hierdie is waarskynlik weens ’n normale, korttermynvariasie en nie ’n aanduiding dat El Niño weer besig is om te ontwikkel nie,” het hy gesê en bygevoeg voorspellers meen Enso-toestande verkeer in ’n normale fase en dit sal waarskynlik vir die res van die seisoen voortduur. “Tog neig dit, binne neutrale vlakke, na die El Niño-kant van normaal,” het hy gesê.“Die Suidelike Ossillasie-indeks (SOI), wat ’n maatstaf is van die verband tussen seeoppervlaktemperature- en oorhoofse weerstelsels, handhaaf egter El Niño-tipe indekswaardes.“Die Indiese oseaan-dipool (IOD) is steeds in ’n baie sterk positiewe fase, met koeler water in die noordwestelike dele van Australië en warmer water nader aan die sentrale en suidelike Afrika-kuslyn.“Dit is baie negatief vir reën in die Suid-Afrikaanse subkontinent weens ’n uitlvoei van vog van sentrale Afrika na die Indiese Oseaan, in plaas van na die Suide.“Voorspellers meen die IOD sal van Januarie 2020 af na meer neutrale vlakke terugkeer,” het Van den Berg gesê. - elvira@republikein.com.na

Eers hitte, dan reën

Kommentaar

Republikein 2026-07-31

Meld asseblief aan om kommentaar te lewer

Eers hitte, dan reën

Kommentaar

Republikein 2026-07-31

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.