Republikein Newspaper

Denver Kisting – Die hoofverkiesingsbeampte, mnr. Theo Mujoro, sê die Verkiesingskommissie van Namibië (ECN) word gepenaliseer omdat hy die wet toepas.

Dít, sê Mujoro via WhatsApp aan Republikein, “is onregverdig”.

Die ECN het gister ’n oproer veroorsaak toe dit rugbaar word hy het ’n regsmening oor die Grondwet en die kieswet ingewin oor betaalde staatswerkers en lede van die Nasionale Raad (NR), wat planne in die mou voer om deel te word van die Nasionale Vergadering (NV) ná vanjaar se verkiesings.

Volgens dié mening, lui ’n brief van die ECN aan politieke partye, mag dié mense en lede van plaaslike owerhede en streekrade nie hul huidige poste beklee en vir die NV staan nie.

Die politieke ontleder mnr. Graham Hopwood sê: “Streng gesproke is die ECN reg in sy regsinterpretasie.”

Maar, sê hy, die verkiesingsliggaam moes politieke partye vroeër oor die standpunt ingelig het “en vir seker voor hulle hul kieskolleges gehou het. Die ECN het vyf jaar gehad om deur die Verkiesingswet van 2014 te werk en te verseker dit het ’n duidelike regsbegrip van al die afdelings”.

“So, dis regtig sleg aan hulle kant dat hulle nou eers met dié interpretasie vorendag kom,” sê Hopwood.

Syns insiens is dit nie net onprakties nie, maar selfs onregverdig om van mense te verwag om uit hul poste te bedank voor die verkiesing plaasvind.

Die ECN se brief word wyd verstaan om te beteken die geraakte mense moet voor Vrydag die tuig neerlê as hulle dan as kandidate bevestig wil word.

“Dis ’n gemors.”

Volgens die prokureur mnr. Norman Tjombe beteken die ECN se standpunt “dat hulle sal moet bedank uit hul huidige posisies met die hoop dat hulle suksesvol sal wees in hul strewe om lede van die parlement te word. Indien hulle nie suksesvol is in die verkiesing nie, sal hulle alternatiewe werksgeleenthede moet soek.”

Tjombe sê: “Ek twyfel of dié regsmening reg is.”

Mnr. Karel Gaeb, ’n kandidaatprokureur, sê: “Dit is ’n lae hou vir regeringsamptenare. Stel jou voor jy moet letterlik bedank om benoem te word vir ’n setel en aan die einde van die dag maak jy dit nie tot in die parlement nie.”

Gister se nuus het die soeklig veral geplaas op me. Margaret Mensah-Williams, die NR-voorsitter.

Sy het met pres. Hage Geingob se hulp van die 92ste plek op Swapo se NV-lys gespring na die 24ste plek wat die weg vir haar baan om haar buiging in die NV te maak.

Pogings om gister vir Mensah-Williams om kommentaar te nader, was onsuksesvol.

Mnr. Nico Smit, die tesourier-generaal van die amptelike opposisie, die Popular Democratic Movement (PDM), sê: “Dit is ’n katastrofe. Ons het meer as 40 mense op daai lys wat afgehaal moet word.”

Volgens hom moet die NV ontbind word as voornemende LP’s moet bedank. Hy het selfs geëis Geingob moet bedank. “Ons word almal deur die regering betaal, so hoekom die onderskeid tref? Hoekom moet jy nou bedank as jy eers in November sal weet of jy verkies is?”

Smit sê die PDM sal dié aankondiging beveg. Hy wou nie in dié stadium hul plan onthul nie.

Verkiesing ‘in die gedrang’

Intussen het ’n groep kontrakwerkers onder die vaandel van die staatsdienswerkersunie (Napwu) gister oor die etensuur voor die ECN se hoofkantoor in die hoofstad betoog.

In ’n klagskrif wat aan Mujoro oorhandig is, dring die werkers daarop aan om onmiddellik permanent in diens geneem te word of hulle sal verdere stappe doen.

Hulle het die ECN 14 werksdae gegee om op dié griewe te reageer.

Hulle sê hulle is terdeë daarvan bewus dat hul optrede “’n vernietigende impak” op die NV- en presidensiële verkiesings op 27 November sal hê.

Die werkers eis ook dat Mujoro en die ECN se raadsvoorsitter, adv. Notemba Tjipueja, bedank.

Mujoro het gistermiddag toe hy die klagskrif ontvang, gesê hy is seker die ECN-raad sal die griewe oorweeg en spoedig reageer.

[email protected]