Eagles vat reeks in nuwe rekordtotaal

Tielman van Lill – Stephen Baard met 'n aanskoulike 145 lopies was gister as aanvangskolwer die ster van die oorweldigende Namibiese oorwinning met 163 lopies teen Uganda.Die Eagles het by Wanderers-veld in die laaste van die twee Castle Lite-eendagwedstryde teen Uganda 355 lopies vir die verlies van nege opgestapel, voordat die hardnekkige toerspan vir 192 uitgeboul is.Die Namibiese totaal is 31 lopies meer as hul vorige ODI-hoogste van 324/7 wat hulle in Januarie 2020 in Oman teen Oman behaal het.Namibië het in sy eerste tien boulbeurte tot 65/0 teen gemiddeld 6.5 per boulbeurt geseil en dit in die tweede tien beurte met nog 74 (6.97) opgevolg tot 139/0.In boulbeurte 20-30 teken Baard met 86 lopies en Divan la Cock met 64 lopies (68 balle, 6x4, 2x6, gestonk deur Arnold Otwani, geboul Rodger Mukasa) hul 150-lopievennootskap aan.Met die verlies van La Cock (150/1) en kort daarna die wisselvallige JP Kotzé (6, 15 b, gevang en geboul Mukasa) het die Eagles se lopietempo tydelik spoed verloor en daal na 60 vir dié tien beurte (164/2).Baard, wat uitstekend op dreef was, was onverstoord voor die penne nadat hy op 95 (75 balle) deur Otwani laat val is. Gerhard Erasmus, wat ná Kotzé ingestap het, ondersteun Baard goed wat sy 100-tal van die 78ste aflewering om met 103 te spog en die Eagles eindig dié tien beurte met 199/2.In die vierde tien beurte skuif die Eagles se telling op tot 258/3 teen 6.45 per beurt. Voor Baard 'n besondere mylpaal kon behaal, verloor hy ongelukkig sy paaltjie (246/3) ná 'n uitstekende vertoning op 145 (15x4, 3x6, gevang Mukasa, geboul Trevor Bukenya in 36.2).Hy en Erasmus werk knap saam en bewerkstellig 'n 76-vennootskap voor Michael van Lingen hom by Erasmus voeg.Die Eagles kon wel nie gister in sy laaste tien boulbeurte hul vuurwerke van Woensdag herhaal nie, maar versnel nogtans die pas en voeg 95 by om op 355/9 te eindig teen gemiddeld 7.06 per boulbeurt.In hul strewe om die lopietempo vol te hou en te versnel, verloor die Eagles in die laaste agt beurte ses kolwers. Erasmus kry 39 van 46 b (1x4, 2x6, been voor paaltjie Dinesh Nakrani), Van Lingen 32 van 31 b (1x4, 2x6, uitgehardloop Nakrani), Jan Frylinck 9 van 11 b (gevang Kenneth Waiswa, geboul Riazat Ali Shah), JJ Smit 26 van 17 b (1x4, 2x6, gevang Waiswa, geboul Shah), Ruben Trumpelmann 11 van 4 b (1x4, 1x6, uitgehardloop Waiswa), Nicol Loftie-Eaton 13 van 4 b (2x6, uitgehardloop Shah) en Bernard Scholtz 1* van 1 bal. Hoewel Loftie-Eaton met die laaste bal van die kolfbeurt uit is, het hy die plaaslike ondersteuners met 'n lieflike omgekeerde veeghou vir ses laat krul van plesier.Val van paaltjies: 1/150 (La Cock, 21.5 boulbeurte), 2/164 (Kotzé, 25.4), 3/244 (Baard, 36.2), 4/273 (Erasmus, 42.4), 5-295 (Van Lingen, 45.2), 6/328 (Frylinck, 48.3), 7/328 (Smit, 48.4), 8/340 (Trumpelmann, 49.1), 9/354 (Loftie-Eaton, 50).Die Uganda-boulers het Woensdag 17 wydlopers en drie foutballe afgestuur, maar gister was hulle veel meer gedissiplineerd met net 6 wydlopers en 2 foutballe.Vir Uganda het Mukasa 2/62 lopies in sy 9 boulbeurte laat kantel. Kort agter hom is Shah met 2/49 in 5 teen 'n stewige 9.80. Bukenya het wel net 1/76 in 9 geneem, maar sy 8.44 is darem beter as die van Shah. Nakrani was nie gister so suinig soos Dinsdag nie, maar is die goedkoopste met 5.09 van al die boulers en spog 1/51 in 10. Die enigste bouler wat 'n leë beurt kon afstuur, is die tiener Cosmas Kyewuta.Uganda se kolfbeurt was weer vroeg in die knyp met die eerste drie paaltjies op 2, 15 en 19, voordat die later kolwers tot verhaal gekom het. Hoewel die lopies meestal drupsgewys aangeteken is teen die ywerige en akkurate Namibiese boul- en veldwerk, het die toerspan vasgebyt om 192 in 44.4 boulbeurte te haal.Moontlik ietwat verrassend is Uganda se Ronak Patel, wat Woensdag 'n honderdtal behaal het, as die topkolwer van die reeks aangewys. Sy eweknie as beste bouler was Namibië se Ruben Trumpelmann.Vir die Eagles was Trumpelmann opnuut giftig met 2/18 in sewe. Hy word goed deur Ben Shikongo (1/13), Frylinck (1/26), Loftie-Eaton (2/47), Scholtz (2/31) en Erasmus (2/40) ondersteun.FOTO’sDie Namibiese krieketspan, die Eagles, vier gister by die Wanderers-veld fees ná hul oordonderende reeksoorwinnings in beide die T20's en eendagwedstryde teen die toerspan van Uganda. Ná maande van Covid-inperkings het afrigter Pierre de Bruyn se manne skoonskip gemaak in elke faset van die Castle Lite-reeks en gewys hulle is op dreef vir hul T20 Wêreldbeker-debuut later vanjaar in Indië. Foto Tielman van LillStephen Baard was gister die speler van die wedstryd met ’n puik honderdtal. Foto Tielman van Lill

Eagles vat reeks in nuwe rekordtotaal

Kommentaar

Republikein 2026-07-03

Meld asseblief aan om kommentaar te lewer

Eagles vat reeks in nuwe rekordtotaal

Kommentaar

Republikein 2026-07-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.