Eagles storm voort met bullopie

Tielman van Lill – Die Eagles het gister die eerste van drie Castle Lite-eendagwedstryde in Windhoek met vyf paaltjies teen die Ontluikende Proteas gebuit, met net meer as 5.1 boulbeurt oor.Die Suid-Afrikaners, wat eerste gekolf het, kon in hul eerste 30 boulbeurte net 114 lopies vir die verlies van vyf paaltjies aanteken. In die laaste 20 het hulle egter 130 lopies behaal om teen gemiddeld 4.88 lopies op hul totaal van 244 almal uit te eindig.Dit wou lyk of dié teiken dalk genoeg kon wees om die Eagles se segetog van die afgelope ruk uit te daag, maar die Namibiërs het met groot selfvertroue, doelgerigtheid en intensiteit die wenteiken met 245/5 in 44.5 boulbeurte verbygesteek.Gerhard Erasmus, die Eagles-kaptein, het gisteroggend by Wanderers die val van die munt reg voorspel en verkies om eerste veldwerk te doen.Met Jan Frylinck en Ruben Trumpelmann wat die Eagles se boulaanval geopen het, het sake uit die staanspoor goed verloop toe Trumpelmann met sy tweede aflewering die paaltjie van Matthew Breetzke (1 lopie, 5 balle, gevang JJ Smit) op nommer twee geëis het (1/5).Die duo van aanvangskolwer Joshua Richards saam met Kabelo Sekhukhune (23, 22 b, 3x4) op drie, wat Breetzke vervang het, wou net aan ’n groot vennootskap begin bou toe Ben Shikongo Sekhukune se bypen ontwortel (SA 2/55).Die paaltjie van Jonathan Bird op vier (22 van 33 b, 3x4) het vir ’n 36-lopievennootskap gehou, voor Zane Green hom van Nicol Loftie- Eaton se boulwerk gestonk het (3/91).Richards (42 van 62 b, 4x4) was die volgende slagoffer van Loftie-Eaton, wat hom been voor paaltjie betrap en skielik was die groen Proteas op 4/99 in die 22ste boulbeurt weer in die pekel.Die kaptein, Sinethemba Qeshile op vyf (4 van 12 b), het vinnig die wind van voor gekry toe hy Loftie-Eaton se derde slagoffer word en hy Qeshile in die 24ste boulbeurt skoonboul (5/99).Met slegs vyf kolwers oor om die Suid-Afrikaners se kastaiings uit die vuur te krap, wou dit lyk of die besoekers nie meer as 180 lopies op die telbord sou kry nie.Al het Jason Smith op ses sy paaltjie vir slegs 11 verloor (33 b, geboul Frylinck) wat die toerspan op 6/131 geplaas het, het Delano Potgieter op sewe en paaltjiewagter Wandile Makwetu op agt ’n stewig grondslag met ’n 76-vennootskap om die sewende paaltjie bewerkstellig om die besoekers se eer te red.Potgieter, wat die Suid-Afrikaners se enigste vyftigtal kon aanteken (56 van 58 b, 4x4, 2x6), word Shikongo se tweede slagoffer toe Erasmus hom uitvang (7/204).Makwetu (47 van 47 b, 3x4, 1x6, gevang Erasmus, geboul Frylinck) speel ’n goeie beurt om die groen Proteas tot 8/226 te laat vorder.Die Eagles-boulers sou graag gouer van Dayyaan Galiem op nege en Tshepo Ntuli op tien ontslae wou raak om die wenteiken kleiner te maak.Nogtans byt Galiem (20 van 21 b, 2x4) en Ntuli (4 van 7 b) vas om die eindtotaal tot 244 te laat aangroei.Vir die Eagles het Loftie-Eaton (3/29 in 9 teen 3.22, twee leeg), Frylinck (2/49 in 10), Shikongo (2/54 in 9 teen 6.00) en Trumpelmann (1/37 in 10 teen 3.70, 2 leeg) skade met die bal aangerig.KAPTEINSBEURTDie Eagles se aanvangspaar, Stephen Baard en Zane Green, kon slegs 35 lopies om die eerste paaltjie versamel. Baard (12 van 18 b, 1x4) wat na ’n aflewering van Jason Smit geproe het, het ’n fyn buiterand van die kolf bygekry en word deur Makwetu agter die paaltjies uitgevang (1/35).Green (31 van 36 b, 5x4, 1x6) het net sy voete begin vind toe hy deur Stefan Tait been voor paaltjie betrap word (2/60).Met twee kolwers terug in die kleedkamer moes JP Kotzé op drie en Erasmus op vier die Eagles se beurt anker. Ongelukkig word Kotzé met sy telling op 16 (23 b, 3x4) uitgehardloop, wat die Eagles op 3/67 laat.Erasmus speel ’n ware kapteinsbeurt van 108 lopies (95 b, 10x4, 4x6, gevang Sekhukhune, geboul Potgieter) saam met Craig Williams op vyf (48, 82 b, 4x4, geboul Smith) om die Eagles se totaal tot 4/200 en 5/239 te neem.JJ Smit op nommer ses (14* van 16 b, 1x4) en Loftie-Eaton op sewe (1* van 1 b) doen die laaste afronding in die Eagles se jaagtog. Die wenlopie kom in die 45ste boulbeurt met ’n grenshou deur Smit vir ’n vyfpaaltjie-oorwinning af.Vir die besoekers het Smith (2/57 in 10), Potgieter (1/30 in 8 teen 3.75, 2 leeg) en Tait (1/14 in 7 teen 2.00) die Eagles probeer hokslaan.Erasmus is welverdiend as speler van die wedstryd aangewys.Die volgende eendagwedstryd begin môre om 10:00 by Wanderers.– tielman@republikein.com.na

Eagles storm voort met bullopie

Kommentaar

Republikein 2026-05-15

Meld asseblief aan om kommentaar te lewer

Eagles storm voort met bullopie

Kommentaar

Republikein 2026-05-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.