Eagles skud druk af en vat reeks 3-0

Tielman van LillDie Eagles, met ’n paar veranderinge in personeel nadat hulle die vorige dag reeds die reeks beklink het, was gister by Wanderers nie op hul heel beste in die derde en laaste T20-wedstryd teen Ontluikende Zimbabwe in die Castle Lite-reeks nie, maar het nogtans op ’n drafstappie met drie paaltjies gewen.Die sewe paaltjies wat die Namibiërs verloor het en die feit dat net nege balle oor was toe die wenteiken behaal is, dui aan hoedat gister se wedstryd verreweg meer spannend as die vorige twee oorheersings (onderskeidelik met sewe paaltjies en 132 lopies) verloop het.Die gasheerspan se kaptein Gerhard Erasmus was agterna nietemin in sy skik dat die spelers wat op rotasiegrondslag ingesluit was, ook wel hul hand opgesteek het om te wys dat hulle die verskil kan maak wanneer die span hulle onder druk nodig het.Zimbabwe het nadat hulle die loot gewen het, wyslik besluit om eerste te kolf. Dinge wou egter net soos in die eerste twee T20-botsings nie vir hulle vlot nie en hulle behaal teen 6.61 lopies per boulbeurt ’n makkerige 129 almal uit in 19.3 boulbeurte.Die kaptein, Chamu Chibhabha, is met komplimente van Ruben Trumpelmann ná slegs vier aflewerings sonder ’n lopie agter sy naam terug in die kleedkamer. Volgende was Kevin Kasuza, sy aanvangsmaat, wat vir 15 lopies deur Michau du Preez agter die paaltjies gestonk word.Brian Chari op nommer drie (1 lopie) word Trumpelmann se tweede slagoffer en Richmond Mutumbami, die paaltjiewagter op nr. 4, word deur Gerhard Erasmus vir 4 geboul.Roy Kaia op 5 val met 11 lopies vir een van Picky Ya France se aflewerings, voordat die twee jonges Mathew Welch op 6 (34 van 21 balle, 4x6, gevang Jan Frylinck, geboul Nicol Loftie-Eaton) en Brian Bennett op 7 (29 van 23 b, 1x4, 3x6, gevang Craig Williams, geboul Shaun Fouché) ’n mate van geloofwaardigheid aan die kolfbeurt verleen.Hierna kon Carl Mumba (12, geboul Trumpelmann), Tendekai Mataranyika (5, uitgehardloop Loftie-Eaton), Ainsley Ndlovu (8, uitgehardloop Du Preez) en Tanaka Chivanga (2*) nie veel aan die span se heil verander nie.Vir die Eagles oes Trumpelmann 3/18 in 4 boulbeurte in (1 leeg), Erasmus 2/3 in 1, terwyl Ya France (1/35 in 3), Fouché (1/15 in 3) en Loftie-Eaton (1/2 in 1) ook bydra.Die Eagles moes teen slegs 6.74 lopies per boulbeurt kolf om die kragmeting in 19.3 boulbeurte te wen. Namibië se eerste vyf paaltjies val egter goedkoop geval met Williams (0), Michael van Lingen (16, 2x4), Loftie-Eaton (4, 1x4), Erasmus (22, 1x4, 1x6) en Du Preez (4) wat tot 5/51 in 9.3 boulbeurte beperk is. Skielik het dit gelyk of die bordjies verhang kan word, toe Frylinck (10, 1x4) ook ná 11.6 boulbeurte op 6/66 uit is. Die Eagles moes van hier af teen 8 lopies per boulbeurt kolf. Genadiglik was Karl Birkenstock, Ya France asook Fouché, Trumpelmann en Bernard Scholtz oor om die spreekwoordelike kalf uit die put te red.In die 13de boulbeurt moker Birkenstock en Ya France 19 lopies en volg dit in die volgende twee beurte op met 13 (98/6) en 8 (106/6). Met slegs 24 lopies benodig van 30 aflewerings, was die Eagles weer stewig in beheer van die botsing met die lopietempo wat tot 7.06 deur die Eagles aangejaag was.Birkenstock, wat as speler van die wedstryd aangewys is, word in die 16de boulbeurt vir 29 lopies (20 balle, 3x4) uitgevang (111/7 in 16) wat Fouché na die kolfblad bring met die Nelson op die telbord.Fouché en Ya France sukkel in die 17de boulbeurt en behaal net 4 lopies (117/7), maar met 18 balle oor en 13 lopies kort van ’n sege was die skrif reeds vir die besoekers aan die muur.Fouché (10* van 10 balle, 1x4) en Ya France (20* van 13 balle, 1x4, 1x6) verseker ná 18.3 boulbeurte dat Namibië met 3-0 skoonskip maak in die Castle Lite T20-reeks, met die finale grenshou van Fouché om op 132/7 af te sluit.Vir Zimbabwe slaag Carl Mumba (2/26 in 3), Tanaka Chivanga (2/16 in 4), Brian Bennett (2/17 in 3) en Chamu Chibhabha (1/18 in 3) met die bal in die hand.Ná een rusdag sal die Castle Lite-eendagreeks van drie 50-beurtwedstryde môre, Vrydag en Sondag gespeel word. Spel begin daagliks om 09:30 en kan regstreeks op NBC2 of op Krieket Namibië se Facebook-kanaal of YouTube-blad gevolg word, omdat toeskouers nie toegelaat word nie.– tielman@republikein.com.na

Eagles skud druk af en vat reeks 3-0

Kommentaar

Republikein 2025-12-16

Meld asseblief aan om kommentaar te lewer

Eagles skud druk af en vat reeks 3-0

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.