E-afval - waar beland dit?

Elektroniese afvalprodukte, ook e-afval of e-skroot genoem, is die gemors wat ons veroorsaak wanneer ons stokou, gebreekte rekenaars of ander elektroniese items weggooi. Dit sluit onder meer skootrekenaars, selfone, DVD’s, CD’s, stukkende hardeskywe, ou kameras en televisies in. Kenners meen die gemiddelde mens uit ’n middelklasgesin in Amerika vervang elke 22 maande sy of haar selfone. ’n Rekenaar word elke twee jaar vervang en ’n televisie elke tien of meer jaar. ’n Draagbare radio word elke twee tot drie jaar vervang en ’n DVD-speler elke vier tot vyf jaar. ’n Drukker word elke vyf of meer jaar vervang. Die mensdom se verslawing aan elektroniese produkte is egter duur, met die gemiddelde Amerikaanse gesin wat jaarliks om en by U$1 400 (sowat N$19 000) daarop bestee. Hoeveel mors ons?Die wêreldbevolking gooi jaarliks tussen 20 en 50 metrieke ton elektroniese produkte weg en net sowat 10% tot 18% hiervan word herwin. Dit is genoeg om sowat 45 500 tot 125 000 747-passasiervliegtuie vol te laai. In Amerika is e-afval die vinnigste groeiende afdeling in die munisipale vullisstelsel: Dit groei jaarliks met sowat 5%, terwyl die ander tipes afval verminder. Munisipaliteite ontvang jaarliks genoeg hiervan om 60 Amerikaanse stortingsterreine te vul. Om een rekenaar en sy skerm te vervaardig, vereis die gebruik van 240 kg fossielbrandstof en 21 kg chemikalieë, asook 1,5 ton water. Tot 81% van die energieverbruik wat met ’n rekenaar geassosieer word, word tydens sy vervaardiging gebruik en nie tydens sy leeftyd terwyl hy werk nie. E-afval en ons gesondheidElektronika is vol waardevolle elemente insluitende silwer, goud, titanium, aluminium, yster, tin en koper. Die materiaal wat in die vervaardiging van elektronika gebruik word, is nie gesond nie. As dit in menseliggame beland, kan dit ernstige gesondheidsprobleme veroorsaak. Voorbeelde van giftige materiale wat in die vervaardiging van elektronika gebruik word, is antimoon, arseen, barium, berillium, kadmium, chroom en dioksien. Ook lood, kwik en nikkel word dikwels gebruik. Die elemente is skadelik vir mense en kan onder meer veroorsaak dat jou neus bloei, jy stuipe kry, kinders nie ten volle ontwikkel nie en dit kan selfs gestremdheid veroorsaak. Die elemente kan skade aan jou skildklier, tandvleis, tande en mond veroorsaak asook hoë bloeddruk en ’n ongereelde hartklop veroorsaak. Ander komplikasies sluit in longskade, kanker, skade aan ’n ongebore fetus, velkanker, verlamming en selfs die dood. Die mense wat e-afval vervaardig en verwerk as dit weggegooi word, ly die kwaaiste wat hul gesondheid betref. Waar eindig dit?Selfs al stuur jy jou e-afval na ’n plek waar dit herwin word, bestaan die kans steeds dat dit nie op die regte plek beland nie. Baie van die e-afval wat in Amerika vervaardig word, word byvoorbeeld na Indië, Ghana, China, Nigerië of Ghana uitgevoer. In die lande word dit dikwels verwerk deur mans, vroue en selfs kinders wat nie teen die gevaarlike elemente daarin beskerm is nie. Indien die materiaal wat uit elektronika kom nie herwin word nie, beland dit in die omgewing en in jou huis. Eindelik kan dit ook in jou liggaam beland en groot skade veroorsaak.Elektronika dra by tot verskeie omgewingsgevare. Tydens die vervaardiging en gebruik daarvan vorm dit uitlaatgasse wat in die atmosfeer vrygestel word. Die afvalwater beland dikwels in riviere en strome. Eindelik vergiftig dit water en grond, wat ’n baie negatiewe uitwerking op diere, waterlewe en plante het. Die afval word dikwels verbrand om daarvan ontslae te raak.Jy kan helpKenners meen elkeen kan ’n bydrae lewer om die vergiftiging van die omgewing weens elektronika te verminder.Koop duursame elektronika en pas dit goed op sodat dit langer kan hou. Moenie dit sommer net weggooi en ’n ander koop nie – maak eers seker dit kan nie reggemaak word nie. Skenk ou elektronika aan instansies en liefdadigheidsorganisasies wat dit steeds kan gebruik. Herwin gebreekte of ou elektroniese ware. Op die manier kan jy ’n bydrae lewer om seker te maak ons vergiftig nie onsself, die omgewing en ons drinkwater nie. Bronne: www.recyclingforcharities.com, www.electronicstakeback, www.greanpeace.org, www.epa.gov.

E-afval - waar beland dit?

Kommentaar

Republikein 2025-07-04

Meld asseblief aan om kommentaar te lewer

E-afval - waar beland dit?

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie