Dwelmvrag onderweg na Namibië onderskep

’n Vragmotorbestuurder is op Springbok in die Noord-Kaap in aanhouding nadat dwelms ter waarde van sowat N$1,2 miljoen in die lorrie gevind is waarmee hy na Namibië onderweg was.
Netwerk24 berig die 50-jarige lorriedrywer is die naweek in hegtenis geneem.
“Die vragmotor was met noodsaaklike kos van die Wes-Kaap na Namibië onderweg toe dit in Springbok voorgekeer is,” berig Netwerk24
Volgens brig. Mohale Ramatseba, polisiewoordvoerder, het die polisie van Springbok Saterdag die N7-pad naby Okiep gepatrolleer, toe hulle die vragmotor gewaar het.
Dit is voorgekeer en deursoek.
Volgens Netwerk24 is 4 552 Mandrax-tablette, 395 g tik en 126 kg dagga onder meer gevind. Meer as R5 000 se kontant is ook in die lorriedrywer se besit gekry.

Foto: Lede van die polisie se eenheid vir openbare orde in Springbok het Saterdag op dwelms ter waarde van byna R1,2 miljoen beslag gelê wat in ’n vragmotor vervoer is. Foto: Verskaf aan Netwerk24