Duur prys betaal ná Bulle-stryd

Andrew Poolman - Die verlies van hul kaptein Leneve Damens met beseerde knieligamente is maar net een van verskeie besprekingspunte vir die afrigterspan van die Windhoek Draught Welwitschias na afloop van 'n baie moedige vertoning teen die Vodacom Blou Bulle.Vriend en vyand het met lof gepraat van die veggees wat die Namibiese amateurspan opnuut gewys het om vyf drieë teen die gedugte Gautengse franchisespan te druk voordat hulle met 16 punte (47-31) die spit moes afbyt.Ná die vorige naweek se oorwinning in 'n wegwedstryd teen die Valke sou die mees hoopvolle tuisondersteuners dalk verwag het dat die Welwitschias die besoekers selfs groter skrik op die lyf moes gejaag het. Inderdaad kon dit dalk tot later in die wedstryd spannend gebly het as die Namibiërs nie weer die eerste twee drieë binne net agt minute afgestaan het nie.Afrigter Lyn Jones se manne lyk in goeie kondisie om in die tweede helfte van die seisoen 'n goeie aanslag op die Curriebeker eerste liga van stapel te stuur, soos hul doelwit is.Maar tussenin sal die vensterperiode vir toetsrugby, waarin Namibië sy beslissende kwalifiserende wedstryde vir die 2019 Wêreldbeker speel, vir Jones dwing om met nuwe planne vorendag te kom. Omtrent vyftien van sy beste plaaslike spelers het gister na Stellenbosch vertrek vir die nasionale afrigter, Phil Davies, se oefenkamp waar 'n ondeurdringbare eenheid saam met die land se beroepspelers uit die buiteland gesmee moet word. Jones sal egter waarskynlik 'n paar manne terugkry wateinde vandeesweek na Johannesburg sal invlieg vir die Welwitschias se volgende wegwedstryd komende Vrydagaand teen die Goue Leeus op Ellispark.Die ongelukkige Damens was bestem om hom by die nasionale oefengroep aan te sluit in die plek van Renaldo Bothma, wat onttrek is vanweë die feit dat hy die afgelope naweek getroud is. Damens se knieligamente het vermoedelik lelik in die slag gebly toe hy sleg te lande gekom het nadat sy ondersteuning as lynstaanspringer hom nie veilig grond toe gebring het nie. Die losvoorspeler was vanjaar uitstekend op dreef totdat hy op die draagbaar afgedra moes word en nou deur 'n paar maande op die kantlyn in die gesig gestaar word.Nadat die nasionale spankaptein Rohan Kitshoff toe die leierskap oorgeneem het, het hy ná die eindfluitjie die sterk vertoning van die vyf vaste voorspelers uitgelig as een van die groot redes vir die Welwitschias se stelselmatige opgang in die Suid-Afrikaanse provinsiale kompetisie.Afrigter Jones het agterna gesê die Namibiërs was elke keer doeltreffend wanneer hulle aangeval het en dat hulle bloot vanweë die meer volgehoue fisieke aanslag van die Blou Bulle nie hul greep op die wedstryd kon behou nie.Die buitesenter Johann Tromp het die enigste Namibiese drie gedruk voordat hulle rustyd met 28-7 agter was. In die tweede helfte het drieë deur die plaasvervanger-senter JC Greyling, die plaasvervanger-haker Niël van Vuuren, binnesenter Darryl de la Harpe en Kitshoff die Bulle onder hul pale laat vergader. Losskakel PW Steenkamp se bydrae was twee doelskoppe, terwyl sy plaasvervanger Helarius Kisting een bygevoeg het.• Namibië se eerste toetswedstryd in die Rugby Afrika Goue Beker vir Wêreldbeker-kwalifisering is op 16 Junie in Windhoek teen Uganda.

Duur prys betaal ná Bulle-stryd

Kommentaar

Republikein 2026-10-08

Meld asseblief aan om kommentaar te lewer

Duur prys betaal ná Bulle-stryd

Kommentaar

Republikein 2026-10-08

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.