Duitsland voor VSA-hof gedaag

Ovaherero's, Namas dien groepeis in New York in

09 January 2017 | Plaaslik
Ronelle Rademeyer - Die twee inheemse Namibiese groepe wat aanvoer hulle voorsate was die slagoffers van die grootskaalse mense-uitwissing deur die destydse Duitse koloniale regering, sleep Duitsland nou in Amerika voor die hof.

Die verteenwoordigers van die ­Ovaherero-­­ en Nama-groepe het 'n hofaansoek om 'n groepeis by die federale hof in New York teen Duitsland ingedien waarin hulle vergoeding eis vir die beweerde volksmoord deur die Duitsers meer as 'n eeu gelede.

Adv. Vekuii Rukoro, opperhoof van die Ovaherero, hoofman David Frederick, voorsitter van die Vereniging vir Nama Tradisionale Owerhede, en die Vereniging van die Ovaherero-volksmoord in die VSA het dié hof Donderdag ook versoek dat hulle as verteenwoordigers by onderhandelinge tussen Duitsland en Namibië oor dié aangeleentheid ingesluit word.

Die twee lande is tans in onderhandelinge gewikkel oor die 1904-'08-­menseslagting. Duitsland het tot nou geweier om toe te gee dat daar wel 'n volksmoord was en wil ook nie vergoeding daarvoor betaal nie.

Volgens Rukoro en Frederick tree hulle namens al hul volksgenote op wat destyds onder die Duitse koloniale owerheid gely het. Dit sluit die Ovaherero's en Namas in Botswana, Suid-Afrika en die VSA in.

Dié groepe word in die groepeis deur Kenneth McCallion van die prokureursfirma McCallion & Associates in New York verteenwoordig. Prof. Richard Weisberg is die advokaat.

McCallion het in Mei verlede jaar 'n lesing getiteld “Africa to Auschwitz” by die Holocaust Memorial and Tolerance-­sentrum in Amerika oor dié menseslagting gelewer.

Van die groot multimiljoen­dollarsake op sy kerfstof sluit in die Exxon Valdez-saak oor oliebesoeding in Alaska, die saak oor die Shoreham-kernkragaanleg, die Golfoorlog-saak en die saak oor die Bhoral-gasramp.

Hy het ook 'n suksesvolle groepeis namens Joodse oorlewendes van die Joodse menseslagting teen verskeie Franse banke gevoer.

Luidens die hofstukke wat verlede week ingedien is, is ongeveer 'n kwart van die Ovaherero's en Namas se grond – glo honderdduisende hektaar – van 1885 tot 1903 sonder vergoeding en met die Duitse owerheid se goedkeuring deur Duitse setlaars afgevat.

Die eisers beweer ook die Duitse owerheid het hom nie gesteur aan die verkragting van die vroue en kinders van die Ovaherero's en Namas nie en dat die plaaslike inwoners sonder vergoeding vir dwangarbeid gebruik is.

Verder lui die stukke die Ovaherero het in 1904 in opstand gekom om te verhoed dat hulle in strafkampe geplaas en die res van hulle grond afgeneem word.

Dit het tot die bevel van genl. Lothar von Trotha gelei wat die uitwissing van 100 000 Ovaherero's en Nama's tot gevolg gehad het, word aangevoer.

“Die eisers bring hierdie groepeis namens die Ovaherero's en Namas wêreldwyd vir reparasies en vergoeding vir die volksmoord en die onberekenbare skade aan mense en eiendom deur Duitsland, asook vir die voortgesette skending van hulle regte onder die VN-deklarasie vir die regte van inheemse mense,” lui die hofstukke.

Hulle voer verder aan die federale hof het wel die jurisdiksie om die aansoek aan te hoor op grond daarvan dat die Amerikaanse kongres buitelanders gemagtig het om hulle tot dié hof te wend vir die skending van die wet op nasies ten einde diplomatieke probleme te voorkom.

Laastens versoek hulle ook dat 'n jurie byeengeroep word om die saak aan te hoor.

Soortgelyk

 

Eksamen 'nie 'n mooi prentjie'

3 ure gelede | Ministeries

Henriette LamprechtNet drie uit meer as 400 mediese studente het 'n onlangse eksamen vir internskappe geslaag.Die betrokke eksamen word deur die Raad vir Gesondheidsberoepe (HPCNA)...

Ou liefde roes nie

3 ure gelede | In beeld

Op 31 Januarie vanjaar het tannie Igna (78) en oom Piet (84) Liebenberg 61 jaar gelede in die NG kerk op Mariental ewige trou aan...

Waarskuwing dat Kunene dalk oorstroom

3 ure gelede | Weer

Elvira Hattingh - Gemeenskappe wat teenaan die Kunenerivier woon, is gister teen moontlike oorstroming gewaarsku.Dit omdat die rivier by Ruacana teen 1 136,7 m³/s gevloei...

Kalender 14 Februarie

3 ure gelede | Kuns en vermaak

Nou aan die gang» Joe’s Beerhouse bied vanaand ‘n Valentynsgeleentheid aan. Komplimentêre sjokolade sal uitgedeel word, en ‘n professionele fotograaf sal jou en jou metgesel...

DHPS hou makietie

3 ure gelede | Kuns en vermaak

Die Deutsche Höhere Privatschule hou op Saterdag 29 Februarie ’n Career Fair and Summer Festival.Die loopbaanekspo, voorheen bekend as Opedag, gaan hierdie jaar ‘n nuwe...

Paratus en stadsraad stamp koppe

3 ure gelede | Regering

Yolanda Nel - Werknemers van die telekommunikasiemaatskappy Paratus wat gister besig was om gate in die hoofstad te grawe om veselkabelverbinding aan te lê, moes...

Weer, Vrydag 14 Februarie 2020

3 ure gelede | Weer

BINNELAND: Gedeeltelik bewolk en warm tot bloedig warm in die Suidweste en Noord­ooste. Elders gedeeltelik bewolk en warm tot bloedig warm met enkele tot geïsoleerde...

Namibiese dramaturg keer triomfantelik terug

3 ure gelede | Kuns en vermaak

Ná hy vyf jaar van die toneelwêreld afwesig was, het hy nou sy eerste politieke hofdrama met ‘n satiriese inslag voltooi. Die ironies getitelde drama...

Andeline vat ‘n kans op liefde

3 ure gelede | Kuns en vermaak

Yolanda Nel Die skoonheidskoningin Andeline Wieland waag ‘n kans om haar mnr. Reg te vind. Sy gaan vir sy liefde meeding op die nuutste seisoen...