Duisende se dagga in lorrie gevind

Tanja Bause - ’n Vragmotorbestuurder is Vrydag by die Ariamsvlei-grenspos in hegtenis geneem. Volgens die Namibiese polisie se verslag is die vragmotor, wat Namibië om 09:43 vanaf Suid-Afrika wou binnery, by die grenspos deursoek en beslag is op 64,4 kg se dagga gelê. Die waarde van die dagga beloop na raming N$644 000. Die bestuurder is ’n 36-jarige Namibiese man, sê die polisie. Die tweejarige Martin Luveli is dood nadat hy van ’n trekker afgeval het en dit glo oor hom gery het. Die voorval het na wat verneem word om 17:00 by die Onezizi-nedersetting by Onayena plaasgevind. Die 26-jarige bestuurder van die trekker het na bewering nie ’n lisensie nie en het glo met die trekker, wat nie registrasiemerke het nie, in die nedersetting rondgery toe die kind van die trekker afgeval het. In nog ’n geval van beweerde geslagsgebaseerde geweld is die 24-jarige Hermina Apollus Sondag glo met ’n mes deur haar voormalige kêrel doodgesteek. Die voorval het tussen 16:00 en 17:00 in die Groot Aub-nedersetting plaasgevind. Volgens die polisie het ’n stryery tussen die twee uitgebreek, waartydens die verdagte die slagoffer drie keer met ’n mes gesteek het. Hulle het glo twee kinders.Die polisie versoek die gemeenskap se hulp in die opsporing van ’n ma wat na wat verneem word haar pasgebore baba weggegooi het. ’n Verbyganger het Sondag om 11:00 glo die liggaam van ’n pasgebore meisie op ’n stortingsterrein in die Havana- informele nedersetting gevind. Ongelukke Vrydag om 22:24 het die 33-jarige bestuurder van ’n bakkie glo beheer oor die voertuig verloor, waarna dit omgeslaan het. Die ongeluk het op die Berseba-grondpad, sowat 40 km buite Keetmanshoop, plaasgevind. Mnre. Johannes Boois (56) en Redemptius Bock (20) het op die toneel gesterf. Die bestuurder en ’n passasier is lig beseer. Nóg ’n passasier is met ernstige beserings in die Keetmanshoop-staatshospitaal opgeneem. Mnr. Uaumba Tjamburo (25) het Saterdag in sy winkel in Otjomuise in Windhoek doodgebrand. Hy was volgens die polisie saam met vriende vir die aand uit. Om 04:00 wou hy glo na sy winkel terugkeer om te gaan slaap. Volgens vriende was hy dronk en honger, en wou hy vir homself kos warm maak. Hy het toe glo aan die slaap geraak en die potte het begin brand. Die vuur het versprei en hy is op die toneel dood. Mnr. Elias Mukoya (39) het op die toneel gesterf nadat hy glo deur ’n GRN-vragmotor van sy fiets af gestamp is. Die ongeluk het Vrydag om 19:00 op die Trans Caprivi-hoofpad naby die Kanguni-nedersetting gebeur. Die vierjarige Tomas Kashala is Sondag na wat verneem word deur ’n taxi in Julius Nyererestraat in die Okahandja Park-informele nedersetting doodgery. Volgens die polisie wou hy die pad oorsteek toe hy gestamp is. Die polisieondersoek duur voort. RooftogteVrydag om 19:00 is ’n 48-jarige man naby Windhoek se Buitekluboord glo deur onbekende verdagtes beroof. Die verdagtes het die man na bewering met ’n mes voorgekeer en sy bakkie en huissleutels gesteel. Die polisie het die bakkie Saterdag in die Goreangab-omgewing gevind. Vyf mans het glo Saterdag om 03:00 by ’n huis in Windhoek-Wes ingebreek, terwyl die huisbewoners geslaap het.Hulle is toe glo met ’n vuurwapen aangehou. Die verdagtes het na wat verneem word op die vlug geslaan met selfone, skootrekenaars, ’n TV, klere en ’n sedanvoertuig. Die polisie het die voertuig in die Havana- informele nedersetting teruggekry en aan die eienaar terugbesorg. ’n Taxibestuurder is Vrydag glo van sy sedanvoertuig, selfoon en N$400 in kontant beroof. Die voorval het om 17:40 op Tsumeb plaasgevind. Die taxibestuurder het die verdagte na die Otavi-Grootfontein-Tsumeb-kruising geneem. Die verdagte het hom toe glo met ’n mes gedreig, aangeval en besteel. Die voertuig is later in die Nomtsoub-nedersetting gevind.Volgens die polisie het ’n veiligheidswag Saterdag om 18:30 sy haelgeweer afgevuur en ’n ma en haar seun gewond.Die man het die seun na wat verneem word vir N$1 gevra wat die seun hom glo geskuld het. Die seun het volgens die polisie geen geld by hom gehad nie en die ma het die N$1 aan die veiligheidswag gegee. ’n Stryery het toe na bewering onder die drie uitgebreek en die wag het sy haelgeweer afgevuur. Die vrou en haar seun is beide in die voorval gewond en in die Katutura-staatshospitaal opgeneem.

Duisende se dagga in lorrie gevind

Kommentaar

Republikein 2025-09-17

Meld asseblief aan om kommentaar te lewer

Duisende se dagga in lorrie gevind

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie