Dubbele moord ruk Arandis

Mans koelbloedig afgemaai

16 April 2019 | Misdaad
Denver Kisting – Die dogter van een van gister se slagoffers van die Arandisslagting, me. Bianca Hellwig, het net ná 07:00 op haar pa, Heimo (60), se lyk afgekom.

Sy is ook ’n werknemer by die Arandiskampus van die Namibië Instituut van Mynbou en Tegnologie (Nimt) waar haar pa die adjunkdirekteur was. Dit is sowat 60 km oos van Swakopmund,

Mnr. Heimo Hellwig en die uitvoerende direkteur van Nimt, mnr. Eckhart Mueller (72), het tussen 06:30 en 07:00 in ’n koeëlreën gesterf.

Ooggetuies was dit gister eens die moordenaar(s) was skynbaar op ’n besliste doodsending. “Ja, dis nie mooi nie,” het ’n ooggetuie en senior werknemer by Nimt gisteroggend by navraag die moordtoneel beskryf.

Dié man, wie se naam weens veiligheidsredes verswyg word, het omstreeks 07:15 op die kampus aangekom.

Hy sê hy het ’n bietjie later by die werk aangekom omdat hy op pad soontoe pakkies moes optel.

Volgens hom was die polisie reeds op die toneel waar die twee mans koelbloedig afgemaai is.

Dié ooggetuie sê: “Dit het gegaan oor om hulle uit te haal.”

’n Ander bron het gistermiddag hieroor gesê: “Die moorde is baie professioneel uitgevoer.”

Nimt was die laaste ruk pal in die nuus – dikwels om verkeerde redes.

Die bestuur onder leiding van Mueller het onlangs ’n mosie van wantroue in die raad gestel.

Nuus oor moontlike afleggings was ook deurgaans op die voorgrond.

Adj.komm. Erastus Iikuyu, die koördineerder van misdaadondersoeke in die Erongostreek, sê die polisie was nog laat gistermiddag op die toneel besig om die raaisel te probeer ontrafel.

Iikuyu het ’n beroep op die publiek gedoen om die polisie te help om die moorde op te los.

Ondanks wye bespiegeling is die motief vir die moorde steeds onbekend.

Die senior werknemer het gisteroggend gesê: “’n Ou het mos maar waaraan jy dink.”

NOODLOT KASTY MUELLERS

Mueller se seun, die Windhoekse prokureur mnr. Richard Mueller, sê sy pa het net Sondag uit Kaapstad van sy suster, me. Gudrun Kitshoff, se begrafnis af teruggekeer.

Sy is verlede Maandag oorlede.

Boonop is Mueller se vrou, me. Gudrun Mueller, drie maande gelede ook dood, sê Richard.

Adj.komm. Edwin Kanguatjivi, die nasionale polisiewoordvoerder, sê agt leë patroondoppies is op die toneel gevind. Volgens hom is ’n 9 mm-wapen vir die moorde gebruik.

MUELLER SE DOOD ‘GROOT VERLIES’

Dr. Alfred van Kent, die uitvoerende direkteur van hoër onderwys, opleiding en vernuwing, het gistermiddag gesê: “Dit is vir ons almal ’n skok. Kyk, daar was baie klagtes, maar dít het ons nie verwag nie.”

Hy het gesê Mueller het ’n groot bydrae gemaak tot tegniese opleiding in die land. “Dit is ’n groot verlies.”

Van Kent het gister ’n afvaardiging na Arandis gelei om hulle te vergewis van wat gebeur het en om ondersteuning te bied.

Werknemers en studente van Nimt is gister vir die dag huis toe gestuur.

Teen gistermiddag is niemand nog in hegtenis geneem nie. Die polisieondersoek duur voort, het Kanguatjivi gesê.

Soortgelyk

 

Vermeende gemsbokstroper gewond

29 minute gelede | Misdaad

'n Vermeende gemsbokstroper is Donderdag op 'n plaas in die Omaruru-distrik in die been gewond. Volgens die Namibiese polisie is 'n 49-jarige man omstreeks 17:00...

Kolonel, onderwyser vas oor wild

1 uur gelede | Misdaad

'n Weermagkolonel (51) van die Otavi-weermagbasis en 'n onderwyser is vanoggend omstreeks 01:00 met twee duikers, twee hase, twee springhase en een wildsbok by...

Leerlingdokters, -tandartse by staatshospitale uitgeplaas

2 ure gelede | Gesondheid

’n Totaal van 131 leerlingdokters is by verskeie hospitale dwarsoor die land uitgeplaas om met hul internskap van twee jaar te begin. Die leerlingdokters sal...

Hof: Minister skuldig aan korrupsie

17 ure gelede | Howe

In 'n geskiedkundige eerste vir Namibië is me. Katrina Hanse-Himarwa, die minister van onderwys, kuns en kultuur, vandag in die hoërhof in Windhoek skuldig bevind...

Voortrekker: “Namibië nie ’n desperate land”

17 ure gelede | Ministeries

Henriette Lamprecht - ‘n Wêreldbekende omgewingsaktivis het nou ook sy stem by die oproer oor die skietdood van Namibië se ikoniese ou olifantbul, Voortrekker, gevoeg,...

Dís hoekom amptenare nie verhogings kry

17 ure gelede | Arbeid

Elvira Hattingh - Dit sal onverantwoordelik wees indien die regering salarisverhogings aan staatsamptenare toestaan kort ná ‘n noodtoestand weens droogte aankondig is en burgers vir...

Nadja Namibië se mooiste

17 ure gelede | In beeld

Mej. Namibie 2019, Nadja Breytenbach (middel), is Saterdagaand tydens ’n glansgeleentheid in die hoofstad gekroon. Haar eerste prinses is Julita-Kitwe Mbangula (links) en Johanna Swartbooi...

Weer vir 8 Julie

17 ure gelede | Weer

BINNELAND: Sonnig en matig in die Suide, Ooste en Sentrale gedeeltes, andersins sonnig en warm tot baie warm. KUS: Gedeeltelik bewolk en koel tot warm...

/Khowese kry nuwe hoofman

17 ure gelede |

Mnr. Hendrik Ismael Witbooi is Saterdag by die Gibeon-nedersetting in die Hardapstreek as die /Khowese(Witbooi)-stam se negende hoofman (gaob) aangewys. Ismael volg die ontslape hoofman...