Drywende sonkrag op vrugteplaas ’n ‘eerste vir Afrika’

Hanlie Stadler – Die eerste drywende sonkragstelsel in die land is die naweek op Marlenique, ’n vrugteplaas naby Franschhoek, onthul.Die fotovoltaïese sonkragstelsel is op die plaas se dam geïnstalleer deur New South Energy en kan 60 kWp opwek. Die term kWp verwys na die maksimum krag wat ’n sonkragstelsel onder ideale toestande in ’n uur kan opwek; dit is gelykstaande aan 60 kWh.Benewens die opwekkingsvermoë help die stelsel om verdamping uit die dam te verminder en beteken dit minder landbougrond word vir die sonkragstelsel gebruik.Luidens ’n verklaring van die Wes-Kaapse departement van ekonomiese geleenthede (wat landbou en toerisme insluit) is dit die eerste kommersiële drywende sonkragstelsel in Afrika en ook die grootste.Die plaas, wat ook troues aanbied, gaan tot 90% van sy krag vir verkoeling, besproeiing en die troulokaal só kan opwek.In ’n tweede fase gaan batterye geïnstalleer word wat dit vir die plaas moontlik sal maak om krag wat met die son opgewek is, te berg vir latere gebruik. Dit sal die plaas heeltemal van die Eskom-netwerk afhaal.Beverley Schäfer, Wes-Kaapse LUR vir ekonomiese geleenthede, sê die projek probeer oplossings daarstel vir van die belangrikste volhoubaarheidsvraagstukke wat die landbou en die ekonomie moet trotseer, naamlik krag en water. “Op lang termyn sal die onderneming geld bespaar en ’n onderneming skep wat nie net omgewingsvolhoubaar is nie, maar ook finansieel volhoubaar.”Marlenique word besit en bedryf deur Boplaas 1743, een van die oudste familieboerderye in die land.Charl van der Merwe, finansiële direkteur, sê gegewe stygende kragtariewe en die onsekerheid om Eskom, het die familie besluit om in sonkrag te belê. Hulle het met Marlenique begin omdat dit die plaas is wat die meeste krag gebruik, maar gaan sonkrag mettertyd op al hul plase infaseer.Volgens Schäfer het die gebruik van sonkrag in die Wes-Kaap van 18 MW in 2015 tot 112 MW vandag gegroei.Die Wes-Kaap bied finansiering- en ondersteuningsopsies vir boere en ander ondernemings wat groenkragstelsels wil installeer.Intussen is Kaapstad self met ’n hofgeding teen die minister van energie en die Nasionale Energiereguleerder (Nersa) besig waardeur hy die reg wil bekom om krag regstreeks van onafhanklike kragprodusente te koop en dus Eskom as “tussenganger” uit te sny.Die stad glo dit sal laer kragtariewe kan meebring. – Netwerk24

Drywende sonkrag op vrugteplaas ’n ‘eerste vir Afrika’

Kommentaar

Republikein 2025-05-02

Meld asseblief aan om kommentaar te lewer

Drywende sonkrag op vrugteplaas ’n ‘eerste vir Afrika’

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie