Drikus en Vera wys hul klas

Andrew Poolman – Drikus Coetzee is gister beloon vir sy konstante goeie kondisionering en onblusbare veggees toe hy vir die tweede keer in twee jaar die Nedbank nasionale padfietsresieskampioenskap ingepalm het.Met gister se resies wat die grootste puntewaarde (40) van die vyf aangewese byeenkomste vir die kies van die span na die Statebondspele later vanjaar in Birmingham dra, het die 28-jarige ryer sy kleim behoorlik afgesteek.Coetzee het Vrydag ná vier opeenvolgende kampioenjare sy titel in die individuele tydtoets aan Jean-Paul Burger afgestaan, maar het hierdie teleurstelling as motivering vir gister se indrukwekkende sege omskep.“Jean-Paul het Vrydag se oorwinning verdien; hy was die sterker ryer op die dag. Ek glo die manier hoe ek vandag gevaar het, wys my karakter, dat ek in my gemoed nooit besgee nie, tot die deurbraak kom. “Ek is bly dat ek vir al my borge en ondersteuners hierdie prestasie kon lewer en hopelik die pyp rook vir insluiting in die Statebondspele-span.”Coetzee het die laaste 70 kilometer van die uitdagende 152 km roete alleen aan die voorpunt gery en ná sy wegbreek nie weer die jaaggroep naby hom toegelaat nie. Ná ’n uitmergelende vier ure twee minute 16 sekondes het hy genoeg gedoen om met 2 minute 42 sekondes te wen.Die belowende 19-jarige Hugo Hahn (o.23-manswenner) het eweneens uit die jaaggroep weggebreek om in 4:02:16 die tweede posisie voor Jean-Paul Burger, Ingram Cuff (vierde), Gerhard Mans Junior en Xavier Papo in te neem. Nog ’n aanvanklike aanspraakmaker, die Olimpiese veteraan Dan Craven, het in ’n redelike vroeë stadium te midde van die versnellende tempo uitgeval.Vera Looser, tweemalige Olimpiese ryer en Afrika-kampioen in 2016, het opnuut die elite vroue se twee groot pryse opgeraap met seges in beide die 84 km padresies en die 21 km tydtoets.Gister was Looser se tiende padresiestitel, terwyl Courtney Liebenberg net-net vir Melissa Hinz om die tweede plek geklop het. In Vrydag se tydtoets was Hinz tweede, Anri Krugel derde en Liebenberg vierde.“Dis altyd lekker om die nasionale kampioenskap te wen,” sê Looser, wat uit Switserland gereis het. “Om die nasionale kampioentri oorsee te kan dra, is altyd spesiaal, want mense vra waar jy vandaan kom en ek is altyd trots om Namibië te verteenwoordig.”Looser sê sy wil in Maart op haar bergfiets goed vaar by die Cape Epic. “Daarna is die Kaapstad-fietstoer, waar ek tevore tweede, derde en vierde plekke behaal het. Daai boonste posisie op die podium bly ’n groot doelwit, maar dis ’n supermoeilike resies. Dis boonop ook ’n keuringsgeleentheid vir die Statebondspele.”Gister se voorste wenners in die padresies se ander kategorieë:Vroue onder 23: Monique du Plessis.Junior vroue (o.18): Lotte Beulker.Subveteraan vroue: Michelle Döman.Veteraan vroue: Anneke Steenkamp.Grootmeestersvroue: Berrit Graf.Meisies o.16: Delsia van Vuuren.Meisies o.14: Rosemarie Thiel.Meisies o.12: Anne Cramer.Mans o.23: Hugo Hahn.Junior mans (o.18): Daniel Hahn.Subveteraan mans: André Vermeulen.Veteraan mans: Pierre Knoetze.Meestersmans: Hans du Toit.Grootmeestersmans: Gerhard Mans senior.Seuns o.16: Roger Suren.Seuns o.14: Marco Thiel.Seuns o.12: Micah Chase.Seuns o.10: JP Lambert.FOTO’s Tielman van Lill en Andrew PoolmanDie draers van die Namibiese Fietsryfederasie se nasionale kampioentruie vir 2022 in die UCI-kategorieë vir die padresies en die tydtoets. Agter is Monique du Plessis, Vera Looser en Lotte Beulker. Voor is Bergran Jensen, Jean-Paul Burger, Drikus Coetzee, Kevin Lowe en Daniel Hahn. Foto Tielman van Lill

Drikus en Vera wys hul klas

Kommentaar

Republikein 2026-02-23

Meld asseblief aan om kommentaar te lewer

Drikus en Vera wys hul klas

Kommentaar

Republikein 2026-02-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.