Drie spesialiste opereer tandarts ná aanval

Francoise Steynberg Drie spesialiste moes gister die bekende Windhoekse tandarts dr. Diaan Burger (56) in die Mediclinic opereer nadat hy en sy vrou, Elsa (55), Saterdagaand deur twee gewapende mans by hul huis in Daan Bekkerstraat in Olympia aangeval is. Volgens die egpaar se skoonseun, mnr. Wynand Drotsche, het die twee aanvallers met balaklawas Burger met 'n handwapen en 'n bandligter erg aangerand. “Sy oogbanke aan albei kante is ingeslaan. Sy voorkop, neus en wangbene is flenters en sy sinusse is ook beskadig.“Albei is Saterdagaand ná die aanval in die Lady Pohamba private hospitaal opgeneem waar my skoonma 'n plaat tydens 'n noodoperasie gekry het nadat haar linkerkantste oogbank stukkend geslaan is,” het Drotsche gister aan Republikein gesê. Sy skoonma is intussen ontslaan en veilig by die huis. “My skoonpa is intussen na Mediclinic oorgeplaas waar drie spesialiste op hom geopereer het.”Gister teen druktyd het Drotsche bevestig dat die operasie suksesvol was waartydens Burger 15 plate en vyf skroewe in sy skedel gekry het. “Hy reageer, maar die swelsel moet nog sak. Hy sal nog drie dae in die intensiewesorgeenheid wees,” het Drotsche gesê. Drotsche vertel hy en sy bekende fotograafvrou, Lerike Burger, is Saterdag deur sy skoonouers na West Nest Lodge naby Gobabis geneem waar hulle die fotografie vir 'n bruilof gedoen het. “Toe my skoonouers van Gobabis af teruggekom het, is hulle in die bosse deur die aanvallers voorgelê wat hulle by die garagedeur oorval het,” vertel Drotsche.“Die aanvallers het 'n handwapen teen my skoonpa se kop gedruk en my skoonma geruk en pluk. Hulle het aan die aanvallers gesê om alles te vat.”Drotsche vertel sy skoonma is geslaan en het van die oprit af in die tuin geval, waarna hulle haar man aangeval het. “My skoonma het oor die tuinmuur gespring en by die bure om hulp aangeklop.”Drotsche het bevestig dat daar niemand anders in die huis was nie en sy 18-jarige swaer het eers later op die toneel aangekom. “My skoonma het hom in die straat voorgekeer sodat hy nie ook aangeval word nie.” NIEMAND IN HEGTENIS geneemVolgens Drotsche het die sekuriteitswag én die polisie nie veel hulp verleen nie. Die aanvallers het met hul selfone en haar handsak weggekom. Volgens die Namibiese polisie is die verdagtes nog nie in hegtenis geneem nie en die ondersoek duur voort. Dr. Burger se afsprake by sy tandartspraktyk in Pionierspark moes eers vir 'n onbepaalde tyd gekanselleer word totdat hy volkome herstel, het sy skoonseun bevestig. Die ontvangsdame het gister die telefoon by sy praktyk geantwoord, maar het gesê sy moes voorlopig afsprake kanselleer. Drotsche het gesê familie het intussen van Suid-Afrika gevlieg om die Burgers by te staan: “Die familie hou ons bymekaar. Die Burgers is al deur baie meer, hulle is sterk.”Hy bedank die gemeenskap vir hul ondersteuning. Voorts is 'n man (27) volgens die Namibiese polisie Sondag omstreeks 20:45 in Okombahestraat in die Damara-lokasie in Katutura in sy linkerbeen glo uit 'n wit bakkie sonder registrasiemerke geskiet toe hy in die straat gestap het.“Die slagoffer is na die Katolieke hospitaal vir behandeling geneem en sy toestand is stabiel. Die ondersoek duur voort,” sê die polisie. TOERISTE BEROOFTwee Switserse toeriste Saterdag omstreeks 11:00 in Andersonstraat in Klein Windhoek met messe gedreig en beroof. Volgens die Namibiese polisie se misdaadverslag is die toeriste van 'n voertuig, twee rugsakke, een selfoon, twee kameras en klere beroof. “Die voertuig is later verlate in die Babylon-woonbuurt gevind, maar al die ander gesteelde items, ter waarde van N$75 381, is nog nie gevind nie. Niemand is nog in hegtenis geneem nie,” lui die misdaadverslag. Die polisieondersoek duur voort. Nóg 'n gewapende rooftog het Saterdag omstreeks 23:00 by Brakwater by Aucor Namibia plaasgevind. “Vyf mans, van wie een met 'n pistool en die ander met messe gewapen was, het die sekuriteitswag aan diens met die vuurwapen aangehou. Hulle het hom vasgebind en vir sowat drie ure aangehou,” lui die misdaadverslag.“Die verdagtes het 12 sonpanele uit 'n vraghouer gesteel, op 'n bakkie gelaai en gevlug. Niemand is in hegtenis geneem nie en die ondersoek duur voort.

Drie spesialiste opereer tandarts ná aanval

Kommentaar

Republikein 2026-03-20

Meld asseblief aan om kommentaar te lewer

Drie spesialiste opereer tandarts ná aanval

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.