Drie ná die toeter ontneem Welwitschias 'n wraaksege

Adolf Kaure - Met 'n drie in die laaste minuut het die Boland Kavaliers Saterdag die Windhoek Draught Welwitschias van 'n gedenkwaardige oorwinning beroof toe die spanne by die Swakopmund sportveld kragte gemeet het.Die Bolanders se oorwinning met 26-14 het hul vierde posisie op die finale puntelys van die Curriebeker eerste liga beklink en het verseker dat hulle vir 'n halfeindstryd teen die Griffons kwalifiseer.'n Mens kan met veiligheid sê dat die Namibiërs se onaangename herinneringe van laasjaar se lelike verloortelling van 110-10 op Wellington hiermee finaal begrawe is.In hul geskiedkundige eerste wedstryd by die kus wat voor 'n geskatte 2 000 toeskouers gespeel is, het die Welwitschias rustyd met 19-7 voorgeloop. Hul drie drieë deur Johann Tromp, Mahco Prinsloo en Lesley Klim was beloning vir uitstekende ondernemende spel, terwyl die Kavaliers se enigste drie van die eerste helfte deur hul Namibiese buitesenter Alcino Izaacs gedruk is.Die Namibiërs het ná net elf minute 'n terugslag gekry toe die flank Rohan Kitshoff afgestuur is om tien minute uit te dien nadat hy glo 'n opponent met die knie getref het. Izaacs se drie is kort daarna gedruk, maar ná Kitshoff se terugkeer het die gasheerspan goeie momentum opgebou om drie drieë te gaan druk. Ná 26 minute was die skoen ook aan die ander voet toe die Bolanders hul flank Wayne Wilschut met 'n geel kaart verloor het. Die tweede helfte was egter 'n ander saak toe die besoekers die gebiedsvoordeel oorheers het. Die Kavaliers se heelagter Gerrit van Wyk het 'n pad deur die Namibiese verdediging gevind vir hul tweede drie wat danksy die doelskop die telling tot 19-14 laat krimp het.Die Welwitschias het wel 'n kans aangegryp om ietwat teen die verloop van spel 'n drie deur die giftige linkervleuel David Philander te bewerkstellig. Sy vyfde drie van die kompetisie is nie deur Theuns Kotzé verdoel nie, maar die gasheerspan was met 24-14 voor.In die Bolanders se ambisie om vir die Curriebeker eerste liga se uitklopfase te kwalifiseer en voor die SWD Arende klaar te maak, het hulle 'n oorwinning nodig gehad en die tempo is gevolglik hoër gelig.Die linkervleuel Sergio Torrens het die doellyn vir hul derde drie gehaal en losskakel Elgar Watts se doelskop het getref.Speeltyd was verstreke met die Namibiërs 24-21 voor en die tuisskare gretig om die skeidsregter se eindfluitjie te hoor. Die Kavaliers was egter op die aanval en het bewegings na links en regs gestuur voordat hulle uiteindelik die gaping vir Elgar Watts se wendrie geskep het.Watts se doelskop was mis, maar dit het nie saak gemaak nie – die Boland is deur na die halfeindronde, terwyl die Welwitschias-ondersteuners se hoop op die laaste oomblik teleurgestel is. Dit was die vierde keer dié seisoen dat die Welwitschias net-net nie die knoop kon deurhaak nie, nadat hulle ook met klein punteverskille teen die Valke (56-47), SWD Arende (36-32) en Grens Bulldogs (26-25) verloor het.Die Windhoek Draught Welwitschias eindig sewende op die puntelys, maar het 14 ligapunte in hul sewe wedstryde ingesamel om hoër as die Oostelike Provinsie Kings te eindig.Vleuel Johann Tromp se sewende drie van die kompetisie plaas hom algeheel derde op die lys, ná die Luiperds se agtsteman Jeandre Rudolph (11) en die Kavaliers se vleuel Charles Mayeza (8). Op ses drieë elk is die Grens Bulldogs se S'bu Ncanywa en twee Griffons-snellers, Arthur-William Williams en Selvyn Davids.Losskakel Theuns Kotzé, wat 'n paar wedstryde met werkverpligtinge misgeloop het, se 58 punte word ook net deur drie spelers oortref – Leighton Eksteen van SWD Arende (76), Gaun Kotze (Griffons, 74) en Warren Potgieter (Valke, 64). Die finale stand ná sewe wedstryde elk: 1 Griffons (31 punte), 2 Valke (26), 3 Luiperds (24), 4 Boland Kavaliers (24), 5 SWD Arende (22), 6 Grens Bulldogs (19), 7 Welwitschias (14), 8 OP Kings (5).

Drie ná die toeter ontneem Welwitschias 'n wraaksege

Kommentaar

Republikein 2025-07-21

Meld asseblief aan om kommentaar te lewer

Drie ná die toeter ontneem Welwitschias 'n wraaksege

Kommentaar

Republikein 2025-07-21

Meld asseblief aan om kommentaar te lewer

MELD AAN

Advertensie