Drawwer se emmerskoplys help kankerlyers

Henriette Lamprecht Om een van die groot marathons in die wêreld kaf te draf, was nog altyd op sy emmerskoplysie. Nou kan mnr. Manfred Egerer van Windhoek dié droom op sy lysie afmerk nadat hy die Londen-marathon, sy eerste marathon ooit, in April voltooi het. Boonop het hy hiermee meer as N$70 000 vir die liefdadigheidsorganisasie Children with Cancer UK ingesamel.Om 'n beter kans te hê om aan die Londen-marathon te kon deelneem, moes Egerer 'n liefdadigheidsorganisasie ondersteun, het hy vertel.“Omdat ek verskeie familielede aan kanker verloor het en 'n sesjarige dogtertjie het, het ek besluit om Children with Cancer UK te ondersteun,” het hy gesê.Volgens hom het 38 000 hardlopers aan die marathon deelgeneem waarvan die meeste 'n liefdadigheidsorganisasie ondersteun het. “'n Gekke atmosfeer het die hele 42,2 km ver geheers. Duisende ondersteuners moedig jou aan en skree die hele roete lank jou naam, wat op jou T-hemp verskyn. Daar was 'n karnavalagtige atmosfeer met musiekgroepe langs die pad en baie deelnemers het kostuums gedra. Dit was my beste sportervaring ooit.”Vir die kort termyn beplan Egerer 'n tydren vir veteraanmotors, sowel as 'n bergfietsbyeenkoms vir later vanjaar om geld vir die kankervereniging in te samel. Die ontstaan van Children with Cancer UK is te danke aan 'n tragedie wat 31 jaar gelede die O'Gorman-gesin geruk het. In Februarie 1987 het leukemie die lewe van die 14-jarige Paul O'Gorman geëis, slegs nege weke ná sy diagnose.Binne weke ná sy dood het sy ouers, Eddie en Marion, begin om fondse vir kinders met leukemie in te samel. Net nege maande later het kanker ook Paul se suster Jean se lewe geëis. Enkele dae ná Jean se dood het Eddie en Marion wyle prinses Diana ontmoet, wat só geraak is deur die O'Gorman's se dubbele tragedie, dat sy gehelp het om die liefdadigheidsorganisasie te stig. Sy het dit ook op 12 Januarie 1988 amptelik ingehuldig en was tot haar dood in 1997 daarby betrokke. Vandag is die organisasie 'n prominente rolspeler in pediatriese onkologie en het reeds meer as £220 miljoen in die stryd teen kinderkanker ingesamel. Jaarliks belê die organisasie ook meer as £40 miljoen in nuwe navorsing en het tans meer as 60 projekte onderweg in vooraanstaande sentrums dwarsoor die land.

Drawwer se emmerskoplys help kankerlyers

Kommentaar

Republikein 2026-02-05

Meld asseblief aan om kommentaar te lewer

Drawwer se emmerskoplys help kankerlyers

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.