Dra vandag oranje vir MS

Henriette Lamprecht – Dis ’n dag oraloor die wêreld waarop die toekoms vol hoop aangepak word.

Wêrelddag vir Veelvoudige Sklerose (MS) word jaarliks op die laaste Woensdag in Mei gevier en vanjaar is dit weer in oranje toegedraai.

Verlede jaar het Namibië vir die eerste keer op dié dag oranje aangetrek en is oranje strikkies uitgedeel om bewustheid van die siekte te bevorder.

Vanjaar is die tema #getinvolved om Namibiërs aan te moedig om ’n positiewe verskil te maak.

Die dag bring die wêreldwye MS-gemeenskap bymekaar om stories te deel en om mense meer oor die siekte te leer.

Vanjaar se veldtog onder die vaandel #bringinguscloser fokus op navorsing.

Die eerste MS-dag is in 2009 deur lede van die MS Internasionale Federasie (MSIF) van stapel gestuur.

MS is een van die algemeenste neurologiese afwykings by jong volwassenes.

Wêreldwyd is daar sowat 2,3 miljoen mense wat met die siekte leef, en dieselfde aantal mense wat ’n MS-lyer versorg.

Dit is egter moontlik dat duisende lyers nog nie gediagnoseer is nie.

Die meeste mense met MS word tussen die ouderdomme van 25 en 31 jaar gediagnoseer, terwyl twee keer soveel vroue as mans met die siekte gediagnoseer word.

Die oorsaak van die siekte is nog onbekend en tot dusver is daar geen kuur daarvoor nie.

Behandeling vir sommige vorme van MS is egter wél beskikbaar, terwyl daar ook verskeie stappe is wat ’n lyer kan doen om die simptome daarvan te verlig.

Die siekte het egter geen vaste patroon nie en elke lyer se simptome is uniek.

Simptome kan swak sig, verswakte ledemate, tinteling, ongesteldheid, geheueprobleme en moegheid insluit.

Vir sommige word die siekte deur tye van remissie gekenmerk.

Vir ander het dit ’n progressiewe patroon en word dit mettertyd erger.

Die #bringinguscloser-veldtog het ten doel om mense wat deur MS geraak word, toegang tot navorsing en wetenskaplikes, verpleegsters en vrywilligers te gee.

Vir meer inligting oor Multiple Sclerosis Namibia kan die stigter, me. Bianca Özcan, by [email protected] of +264(0) 81 296 4844 gekontak word.

Inligting is ook op die webtuiste www.msnamibia.org beskikbaar.