Dollar verswak, goud styg ná Trump praat

John Cairns, valutastrateeg van RMB, meen die rand het die potensiaal om die R13,41-vlak te toets gegewe die swak dollar ná die inhuldiging van Donald Trump as Amerika se 45ste president.“Die fokus is vandag op Trump,” sê hy.Volgens hom sal die fokus van die markte vandag na die Suid-Afrikaanse Reserwebank se besluit oor rentekoerse beweeg, terwyl die fokus later vandeesweek op internasionale vervaardigingsyfers en aan die einde van die week op Amerika se vierde kwartaal-BBP-syfers gaan wees.Die rand het gisteroggend verhandeling op R13,55 teenoor die dollar begin en op R14,55 teenoor die euro.Cairns sê dit is 'n groot week vir die Britse pond gegewe die hofuitspraak oor Brexit, asook dié land se BBP-syfers vir die vierde kwartaal wat verwag word.Die rand het geopen op R16,76 teenoor die pond.“Nie 'n goeie Trump of slegte Trump was sigbaar in die inhuldigingstoespraak nie, maar in geheel het die mark meer proteksionisme as stimulus in sy toespraak gesien,” sê Cairns.“Dit was negatief vir die dollar met die euro wat gisteroggend verby €1,07 teenoor die dollar versterk het tot sy sterkste vlak in ses weke.”Hy meen die rand het stadig reageer, maar sou na verwagting verder opvang.Die R13,41 vloer is al twee keer vanjaar getoets, maar die rand het nog nie deur dié vlak gebreek nie.“Trump gaan die fokus bly gegewe sy belofte om op sy eerste werksdag as president aggressief op te tree.“Sy waarskynlikste aksie is duidelik aangedui, maar die markte gaan steeds reageer op sy proteksionistiese stappe.”Michelle Wohlberg, 'n ontleder van vaste inkomste, het gesê ná Trump se toespraak het die vraag na bates wat as 'n veilige hawe beskou word, effens toegeneem. “Maar aandele het ook gestyg, wat aandui daar is 'n beperkte risikovermydingsreaksie wat ná sy toespraak na vore gekom het.”Sy sê die markte wag nou op verdere rigting van Trump.Verre OosteDie dollar het gisteroggend tydens verhandeling in die Verre Ooste verswak.Ontleders meen die proteksionistiese toon het die optimisme oor sy beloofde belastingverligting en ander stimulusse se waarskynlikheid, geneutraliseer.Trump het op sy eerste dag in die kantoor gesê hy is van voorneme om Amerika uit die Trans-Pasifiese Vennootskap (TPP) te onttrek.Dit is 'n handelsooreenkoms tussen 12 lande waarvan Japan en Australië ook deel is.Trump het Sondag gesê hy beplan om binnekort samesprekinge met die leiers van Kanada en Mexiko te begin om die Noord-Amerikaanse Vryehandelsooreenkoms (Nafta) te heronderhandel.“Die mark raak senuagtig oor die moontlikheid dat die wêreldhandel kan krimp,” het Koichi Yoshikawa, uitvoerende direkteur van finansiële markte van Standard Chartered Bank in Tokio, aan Reuters gesê.“Baie van sy beleid, insluitende belastingverligting en infrastruktuurbesteding benodig goedkeuring van die senaat en dit gaan nie maklik wees nie,” sê hy.“Die markte wat sedert sy verkiesing gelei is deur verwagtinge oor sy beleid, word nou afgetrek deur die werklikheid.”Die dollar het met soveel as 1,1% teenoor die jen verswak en nader gekruip aan sy laagste vlak in sewe weke wat hy verlede Woensdag teen dié geldeenheid bereik het.Die meeste opkomende markte se geldeenhede het verstewig.Die dollar het reeds Vrydag effens verswak tydens Trump se inhuldigingstoespraak.In sy inhuldigingstoespraak het Trump beloof om wat hy noem 'n “Amerikaanse bloedbad” van geroeste fabrieke te beëindig en beloof om Amerika “eerste te stel” deur twee eenvoudige reëls neer te lê – koop Amerikaans en huur Amerikaans.Die dollar het in 2016 verstewig oor die verwagtinge dat Trump se beloftes oor belastingverligting en infrastruktuurbesteding die Amerikaanse ekonomie 'n hupstoot gaan gee, maar het sedertdien stoom verloor.Termynkontrakte op Amerikaanse aandele het met 0,2% gedaal en winste van Vrydag uitgewis.Bloomberg berig die dollar het verswak omdat Trump min nuus verskaf het oor sy planne om groei aan te moedig terwyl hy die pot van proteksionisme verder geroer het.Die Amerikaanse geldeenheid het teenoor sy groot eweknieë verswak en goud het sy vier weke lopie voortgesit.Die goudprys het met 0,5% tot $1 215,84 per fynons gestyg.Japan se aandele-indekse het met 1,1% gedaal nadat die jen versterk het nadat handelaars in Asië vir die eerste keer op Trump se inhuldiging gereageer het.Trump se uitlatings tydens sy verkiesingsveldtog om groei aan te vuur het aandele sedert November laat styg en die dollar het versterk.Ontleders ontleed nou die situasie om te bepaal of van die bewegings te ver gegaan het en pryse te vinnig en te ver gestyg het.Batebestuurders gaan vandeesweek die resultate van sommige van die wêreld se grootste maatskappye soos Alphabet, Samsung Electronics en Alibaba ontleed.“Market wag nou vir meer bewyse oor Trump se fiskale stimulus,” sê Shane Oliver, 'n beleggingstrateeg van AMP Capital Investors in Sydney.“Aandele bly kwesbaar vir 'n verdere regstelling of konsolidasie in die komende maande of so.”Die Mexikaanse peso wat die meeste verswak het oor Trump se uitlatings het met 0,6% versterk tot sy sterkste vlak teenoor die dollar in twee weke.Die styging kom nadat hy Vrydag met 1,7% versterk het – sy grootste sprong in twee maande. - Netwerk24

Dollar verswak, goud styg ná Trump praat

Kommentaar

Republikein 2025-07-25

Meld asseblief aan om kommentaar te lewer

Dollar verswak, goud styg ná Trump praat

Kommentaar

Republikein 2025-07-25

Meld asseblief aan om kommentaar te lewer

MELD AAN

Advertensie