Dokter getuig in verhoor van vermoorde teologiestudent

Jacqueline Louw – Die kêrel van die vermoorde teologiestudent het, nadat sy tydens ''n worsteling met ''n mes getref is en hy besef het daar is ’n wond en bloed, sy klere aangetrek, beide sy eie en sy meisie se selfoon geneem en die woonstel se deur agter hom gesluit.Dié getuienis oor sy weergawe van die gebeure, is gister gelewer toe die verhoor van André Dausab (35) in die hoërhof voor regter Naomi Shivute hervat het. Dr. Ndahambelela Mthoko, wat twee jaar gelede ’n evaluering oor Dausab se geestesgesondheid gedoen het, is deur die partye se regspraktisyns gekruisondervra. Mthoko het in Junie 2014 in haar verslag aangedui dat Dausab geskik is om verhoor te word en dat hy nie aan enige geestesongesteldhede gely het toe die vermeende moord gepleeg was nie.Onder kruisondervraging deur adv. Ethel Ndlovu, die staat se regsverteenwoordiger, het Mthoko getuig dat Dausab tydens die pleging van die vermeende misdaad normaal was en in staat was om die onregmatigheid van sy dade te besef. Sy het verder getuig Dauseb se weergawe van die gebeure was dat hy en sy meisie gestry het, sy het ’n mes gevind en hulle het begin worstel. Hulle het glo geval en hy het toe besef daar is ’n wond en bloed. Hy het sy klere aangetrek, sy eie en sy meisie se selfoon geneem en die woonstel se deur agter hom gesluit.Mnr. Bronwell Uirab, Dausab se prokureur, het Mthoko veral oor die aspek van Dauseb se getuienis dat hy niks kan onthou van die vermeende mesaanval self nie, uitgevra. Uirab het aan Mthoko gestel dat sy kliënt net gebeure tot op ’n sekere punt onthou en dat daar toe net ’n vakuum was. Uirab het aangevoer dat Dauseb as gevolg van emosionele stres saam met uiterste provokasie ’n episode van tydelike geestelike ongeskiktheid beleef het waartydens die vermeende moord plaasgevind het. Mthoko se antwoord hierop was dat “jy kan nie vir sekondes sielsiek wees nie”.Uirab wou verder van Mthoko weet of sy tydens haar ondersoek van Dausab vasgestel het of nie-patologiese kriminele onbevoegdheid op hom van toepassing was. Sy het geantwoord dat sy hom slegs ondersoek het om die moontlikheid van enige sielkundige afwykings uit te sluit. Op Uirab se vraag of dit moontlik is dat iemand onder erge stres alle selfbeheer vir ’n sekere tydperk kan verloor, het Mthoko gesê: “Woede is ’n normale emosie, nie ’n mediese toestand nie – hoe jy reageer is ’n persoonlike keuse.”Dausab het na bewering sy 32-jarige vriendin, me. Gofaone Motlamme, 25 keer met verskeie messe gesteek en vermoor. Volgens die klagstaat het die voorval op 22 Februarie 2014 by Motlamme se woonstel in Erasmusstraat in Windhoek plaasgevind. Motlamme wat van Botswana afkomstig is, was ’n derdejaarstudent by die United Lutheran Theological Seminary se Paulinum-kampus.Dausab is kort ná die moord in Coetzeestraat in Pionierspark in hegtenis geneem toe hy blykbaar die polisie van die moord in kennis gestel het.Advokaat Ethel Ndlovu tree namens die staat op en die regsverteenwoordiger vir Dauseb is mnr. Bronwell Uirab.

Dokter getuig in verhoor van vermoorde teologiestudent

Kommentaar

Republikein 2026-08-04

Meld asseblief aan om kommentaar te lewer

Dokter getuig in verhoor van vermoorde teologiestudent

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.