Distell tjoepstil oor SABMiller-belang

Francois Williams - Wat SABMiller ook al met sy 26,5%-belang in Distell doen, dit sal nie die Stellenbosse drankgroep se bedrywighede en strategie ontwrig nie.Dis byna al wat Richard Rushton, besturende direkteur, by ’n aanbieding oor Distell se jaarresultate tot einde Junie aan ontleders wou sê.Distell se aandeelprys was Donderdagmiddag 2,4% laer op R166,82 nadat dit Woensdag ná die bekendmaking van die jaarresultate ’n maandhoogtepunt van R171 gehaal het.Die aanbieding het byna 100 belangstellendes gelok, wat onder andere institusionele beleggers, onafhanklike minderheidsaandeelhouers en aandeelhouers van Capevin ingesluit het.Capevin en die beleggingsmaatskappy Remgro het albei voorkoopregte op die 26,5%-belang wat SABMiller binne drie jaar moet verkoop as deel van die voorwaardes vir sy samesmelting met die bierreus Anheuser-Busch InBev (AB InBev), wat na verwagting teen 10 Oktober voltrek sal wees.Chris Logan van Opportune Investments, wat ’n Capevin-aandeelhouer is, het Rushton gevra of Distell nie self van sy aandele wil terugkoop nie. Logan meen die probleem met Distell-aandele is die lae likiditeit, menende dis moeilik om handel daarin te dryf omdat nie baie aandele in omloop is nie. Remgro en Capevin beheer saam 52,9% van Distell.Van die opsies is dat Remgro die 26,5%-belang of ’n deel daarvan koop.Rushton het gesê die verkoop van die Distell-aandele sal die likiditeit beslis verbeter, maar hy het ontleders aangeraai om eerder vir Jannie Durand, uitvoerende hoof van Remgro, te vra wat hulle planne is. Daarop het Logan geantwoord Durand-hulle verwys hulle terug na Distell as hulle Remgro uitvra oor sy planne.Op die vraag of Distell van sy eie aandele sal terugkoop, sê Rushton hulle ondersoek al die opsies.Distell is reg om tussen R2,1 miljard tot R3,6 miljard te bestee om die drankgroep verder uit te bou, sê Lucas Verwey, finansiële direkteur. Sowat R1 miljard se kapitaalbesteding word vir die volgende boekjaar beplan.Die groep maak hom reg om groter mededinging in Suid-Afrika aan te pak, soos Heineken, wat sy eie appelsider, Strongbow, na Suid-Afrika bring.Rushton sê appelsider is ’n unieke produk waarin Distell kundigheid opgebou het en hy sal hard werk om sy markaandeel te verdedig. Distell bemark die siderdrankies Savanna en Hunters Gold.Oor sy uitbreiding in Amerika en China is Rushton versigtig en sê in Amerika sal hulle tak vir tak en staat vir staat uitbrei.“In China is siders relatief onbekend, maar dit was 15 jaar gelede in Suid-Afrika ook onbekend.” - Netwerk24

Distell tjoepstil oor SABMiller-belang

Kommentaar

Republikein 2026-04-24

Meld asseblief aan om kommentaar te lewer

Distell tjoepstil oor SABMiller-belang

Kommentaar

Republikein 2026-04-24

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.