Dis maak of breek teen Mali

Tielman van LillIndien die Brave Warriors vanaand agter geslote deure in die Sam Nujoma-stadion die bordjies teen Mali in hul kwalifiserende wedstryd vir die 2021 Afrika-Nasiesbeker (Afcon) wil verhang, sal hulle op hul karige 33 persent balbesit in Bamako moet verbeter.Namibië se naelskraapse nederlaag met 1-0 teen Mali se Arende Vrydagaand is 'n veel beter uitslag as wat sy ondersteuners voor kon gehoop het. Met 67 persent balbesit kon die gasheer net een doel aanteken wat 'n fenomenale getuigskrif vir die besoekers se hardnekkige verdediging is.Doelwagter Virgil Vries was op sy beste, maar Bobby Samaria, hoofbreier van die Warriors, sal die tuisveldvoordeel moet benut en met 'n nuwe strategie vorendag moet kom.Hoewel die bitterbek helfte van die Warrior-ondersteuners uiteraard nie met Vrydagaand se uitslag tevrede was nie, kan die Namibiërs steeds met die regte taktiek en aanslag die herontmoeting in hul guns swaai. Samaria sê: “Ongelukkig kan jy nie altyd beheer hoe jy verloor nie, maar 'n span kan kies hoe hy sy terugkeer gaan maak deur reg voor te berei en die volgende wedstryd te wen.“Ons het nou 'n tweede kans om drie ligapunte teen Mali op te raap. Daar was lesse te leer om teen hulle te gebruik en daarvolgens planne te maak. Ek dink ons het Vrydagaand reeds veel beter in die tweede helfte gevaar en kon gelykop gespeel of selfs gewen het, maar dit het nie gebeur nie.“Ons het die verloor op die ken gevat en aanbeweeg. Dit is vir ons allerbelangrik om die tuiswedstryd te wen. “In Mali was die strategie om in die eerste helfte te verdedig, die druk te absorbeer en dan in die tweede helfte aan te val. Dit het nie heeltemal volgens plan verloop nie.“In die herontmoeting sal ons taktiek uit die staanspoor aanvallend ingestel moet wees. Ons het nog 'n kans om te kwalifiseer. Guinee het Sondagaand met 1-1 teen Tsjad gelykop gespeel en as ons drie ligapunte kan opraap, sal die gaping tussen ons en die voorlopers kleiner word,” het Samaria gesê.In kwalifiserende groep A loop Guinee ná vier wedstryde met agt punte voor, gevolg deur Mali met sewe (ná drie wedstryde). Namibië, wat ook drie botsings agter die rug het, staan op drie punte, terwyl Tsjad ná die gelykop teen Guinee uiteindelik ná vier kragmetings sy eerste punt verdien het. Elke land speel ses wedstryde en net die toptwee spanne per groep vorder na die uitgestelde Afcon-toernooi in Kameroen vroeg in 2022.Die Brave Warriors se twee oorblywende wedstryde is beide vir Maart 2021 geskeduleer – eers weg teen Tsjad en daarna tuis teen Guinee.

Dis maak of breek teen Mali

Kommentaar

Republikein 2025-12-18

Meld asseblief aan om kommentaar te lewer

Dis maak of breek teen Mali

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.