Direksie van nuwe bierreus: Klap in gesig van SABMiller?

Hanlie Stadler - Alan Clark, uitvoerende hoof van SABMiller, Domenic de Lorenzo, finansiële hoof, en Jan du Plessis, voorsitter van die direksie, is onder die tientalle hoëkoppe wat sneuwel in die samesmelting van die wêreld se twee grootste brouerye.
Anheuser-Busch InBev (AB InBev) het gisteroggend die struktuur en bestuurspan aangekondig vir die gekombineerde “Newbelco” (die voorlopige naam van die beheerfirma van die nuwe bierreus).
Net een senior bestuurder van SAB­Miller word deel van die nuwe, groter firma se direksie wanneer die Belgiese bierreus SABMiller binnekort insluk.
Dit is Mauricio Leyva, tans besturende direkteur van Suid-Afrikaanse Broue­rye by SABMiller. Hy word bevorder tot president vir Sentraal-Amerika. Leyva is van Colombia.
Jabu Mabuza, wat nie tans bande met SABMiller het nie, is die prominentste Suid-Afrikaner wie se naam genoem word. Hy word aangestel as voorsitter van die Afrikadireksie van Newbelco.
Carlos Brito, uitvoerende hoof van AB InBev, sê Mabuza se “suksesvolle entrepreneuriese agtergrond, pan-Afrikaanse ervaring en betrokkenheid met die openbare sektor” sal “van onskatbare waarde” wees.
In wat moontlik as ’n klap in die gesig van plaaslike kundigheid bestempel kan word, word AB InBev se hoof vir Mexiko, die Brasiliaan Ricardo Tadeu, aangestel as die president van die nuwe firma se sake in Afrika.
’n Suid-Afrikaner met bykans 15 jaar ondervinding by SABMiller, Yokesh Maharaj, word wel bevorder tot president vir Suid-Afrika.
Die SABMiller-bestuurslede wat af­gedank word, sal waarskynlik stewige goue handdrukke kry. Londen seFinancial Times het vroeër berig dat Clark se aandelebelonings alleen meer as £55 miljoen (meer as R1 miljard) kan beloop.

Integrasie
’n Aantal prominente bestuurslede van SABMiller het ingestem om minstens ses maande lank nog by die groter groep te bly om te help met “integrasie, die behoud van talent en die bestuur van belanghebbendes”. Hulle is John Davidson, SAB­Miller se regsverteenwoordiger en hoof van korporatiewe sake, Johann Nel, groephoof van menslike hulpbronne, en Mark Bowman, besturende direkteur van SABMiller Afrika.
Dié vier mense sal moet help om “sinergieë en beste praktyk” vir die groter groep te ontsluit en sal in SABMiller se kantoor in Woking, buite Londen, aanbly. Die kantoor gaan ná die “oorgangstydperk” sy deure toemaak. Die kleiner kantoor in Sentraal-Londen word toegemaak.
Die samesmelting sal na verwagting op 10 Oktober voltrek word, nadat aandeelhouers van albei maatskappye einde September daaroor gestem het.
Die gesamentlike groep sal ’n teenwoordigheid in bykans elke groot biermark ter wêreld hê, sê AB InBev, en sal “enorme groeigeleenthede oor nuwe en bestaande markte” skep.
Die maatskappy se wêreldhoofkantoor bly in Leuven, België, en hy het ’n “funksionele wêreldbestuurskantoor”­ in New York.
Die nuwe groep sal in nege streke ge­organiseer word, met Johannesburg as die hoofkantoor vir die hele Afrika.
Bestaande SABMiller-kantore in Miami, Hongkong en Beijing gaan binne maande ná die samesmelting toegemaak word. Die toekoms van die SABMiller-kantoor­ in Zug, Switserland, is nog onseker, maar sal afhang van die verkoop van SAB­Miller se brouerye in Sentraal- en Oos-Europa.­ SABMiller het vroeër aangekondig hy soek kopers vir sy brouerye in onder meer Tsjeggië.

So lyk nuwe struktuur
AB InBev se bestuursdireksie sal bestaan uit ’n president vir elkeen van die nege streke, sowel as groephoofde vir onder meer bemarking, menslike hulpbronne, finansies en korporatiewe beheer, wat verslag doen aan Brito as uitvoerende groephoof.
Konsultasie met vakbonde en ower­hede sal deurgaans gevoer word voordat veranderinge ingevoer word, sê AB InBev.
Die direksie vir Afrika sal aangevoer word deur Mabuza. Brito word ook deel van dié direksie, en die twee sal saamwerk om die res van die direksie saam te stel.
Mabuza is tans voorsitter van die Telkom-direksie, en is ook voorsitter van die sakekamer Besigheidseenheid Suid-Afrika (Busa). Hy was vantevore ’n direkteur van Tanzanian Breweries, Castle Brewing Company in Kenia en van Suid-Afrikaanse Toerisme, en was ook groephoof van Tsogo Sun.
Maharaj, tans verkoop- en verspreidingshoof vir SAB, word die nuwe president vir Suid-Afrika in die plek van Leyva. Maharaj is sedert 2001 by SAB en het al verskeie poste beklee, onder andere as streekhoof in verskillende streke en as direkteur van mensehulpbronne.

Nege streke
1. Noord-Amerika (VSA en Kanada); hoofkantoor: St. Louis, Missouri, VSA
2. Sentraal-Amerika (Mexiko, El Salvador en Honduras); hoofkantoor: Mexikostad
3. Latyns-Amerika-Noord (Brasilië, die Dominikaanse Republiek, Guatemala, Panama, St. Vincent, Kuba, Puerto Rico, Barbados, Dominica en die Karibiese Eilande); hoofkantoor: São Paulo, Brasilië
4. Latyns-Amerika-Suid (Argentinië, Uruguay, Chili, Paraguay en Bolivië); hoofkantoor: Buenos Aires, Argentinië
5. Latyns-Amerika-Copec (Colombia, Peru en Ecuador); hoofkantoor: Bogotá, Colombia
6. Europa (Brittanje, Ierland, Frank­ryk, Italië, Spanje, Duitsland, België, Luxemburg, Nederland, Switserland, Oostenryk, die Oekraïne, Rusland, Europese uitvoer en die Midde-Ooste); hoofkantoor: Leuven, België
7. Asië-Pasifies-Noord (China, Suid-Korea en Japan): hoofkantoor: Shanghai, China
8. Asië-Pasifies-Suid (Australië, Nieu-Seeland, Indië, Viëtnam en ander lande in Suid- en Suidoos-Asië); hoofkantoor: Melbourne, Australië­
9. Afrika (Suid-Afrika, Botswana, Swaziland, Mosambiek, Malawi, Namibië, Zambië, Lesotho, Uganda, Ethiopië, Tanzanië, Suid-Soedan, Kenia, Nigerië, Ghana en eilande om Afrika); hoofkantoor: Johannesburg.