Dippenaar-verhoor: Kenner in hof

Jessica Botes – Die staat is van plan om vandag 'n deskundige na die getuiebank te roep in die verhoor van mnr. Jandré Dippenaar.

Dit volg nadat die staat se getuie, mnr. Ismael Murorua, Vrydag se getuienis voor landdros Gaynor Poulton afgehandel het.

Dippenaar staan op verskeie klagte tereg ná 'n ongeluk in 2014 waarin ses mense gesterf het.

Murorua is 'n polisiebeampte wat foto's van die ongelukstoneel geneem het. Hy het getuig dat hy gelei is deur die ondersoekbeampte, me. Paula Havenga, terwyl hy die foto's geneem het, twee dae nadat die ongeluk plaasgevind het.

Dippenaar se regsverteenwoordiger, adv. Louis Botes, het tydens kruisondervraging die getuie gevra hoekom hy nie 'n kenmerkende groef in die pad, wat glo deur die ongeluk veroorsaak is, afgeneem het nie.

“Ek het nie die groef gesien tydens my ondersoek van die ongelukstoneel nie. Havenga het vir my gewys waar die ongeluk plaasgevind het en waar die voertuie tot stilstand gekom het en ek het hierdie inligting gebruik om my foto's te neem. Dit is net 'n menselike fout dat ek die groef gemis het,” het Murorua getuig.

Botes het dit aan die getuie gestel dat hy dan net 'n “verheerlikte fotograaf is wat die instruksies volg van die persoon wat gedurende die voorval op die toneel was, jou merkers neersit en foto's neem”.

“Ek moes op die persoon wat op die toneel was (Havenga) se instruksies staatmaak, omdat ek eers twee dae ná die ongeluk, toe die toneel reeds skoongemaak is, daar was,” het Murorua geantwoord.

Hy het ook getuig dat hy nie net op Havenga se instruksies staatgemaak het nie, maar ook sy eie ondersoek van die toneel gedoen het.

“Ek het my eie waarnemings van die toneel gemaak en ook foto's van ver af geneem omdat ek gevoel het dit is belangrik om die omstandighede van die pad ook in te sluit,” het hy getuig.

“Dit blyk of Havenga nie die groef vir jou uitgewys het nie, hoewel dit duidelik sigbaar was en volgens jou die enigste merk met betrekking tot die ongeluk was,” het Botes gesê.

Tydens haar herondervraging van die getuie het die staatsaanklaer, me. Faith Chipepera-Nyaungwa, vir Murorua gevra of hy destyds geweet het wat vir die hof van belang sou wees met betrekking tot die foto's wat hy geneem het.

“Ja, ek het geweet,” het hy getuig.

Die ongeluk het op 29 Desember 2014 sowat 12 km voor Hentiesbaai in die rigting van Swakopmund plaasgevind.

Dippenaar en die 19-jarige me. Antonia Joschko, wat saam met haar gesin uit Duitsland in Namibië op vakansie was, is die enigste oorlewendes.

Sy het haar pa, mnr. Walter Helmut Joschko (48), ma, me. Stephanie Dorothea Schemick-Joschko (49), en ouer suster, Alexandra Joschko (19), in die ongeluk verloor.

Die drie passasiers wat saam met Dippenaar in die FJ Cruiser was, mee. Dinah Lavinia Pretorius (30) van Gobabis, Charlene Charne Schoombe (24) van Windhoek en mnr. Jan Carel Horn (27), het ook in die ongeluk gesterf.

Dippenaar staan op ’n klag van roekelose en nalatige bestuur met ’n alternatiewe klag van onbedagsame bestuur, ’n klag van bedrog met ’n alternatiewe klag van verskaffing van valse inligting, ’n klag van bestuur sonder ’n rybewys en ses klagte van moord tereg.