Dippenaar-saak in limbo
Mnr. Jandré Dippenaar het tot 2 November kans om 'n prokureur vir die siviele saak aan te stel.
Erwin Leuschner
Byna sewe jaar ná 'n grusame motorongeluk naby Hentiesbaai wat die lewens van ses mense geëis het, moet 'n verhoordatum vasgestel word in die siviele saak in die hoërhof.
Die verweerder, mnr. Jandré Dippenaar, moet egter eers 'n prokureur aanstel. Die kriminele saak teen Dippenaar gaan aanstaande maand voort.
Die direktoraat vir regshulp gaan nie 'n prokureur aan Dippenaar voorsien in die siviele regsgeding nie. Hy het tot 2 November kans om sy eie prokureur aan te stel. Volgens die jongste hofbevel sal 'n nuwe verhoordatum op dié dag vasgestel word. Weens die hoë aantal gevalle wat in die hoërhof aangehoor moet word, sal die saak na alle waarskynlikheid eers aanstaande jaar voortgaan.
Aanvanklik sou die siviele saak in Mei afskop, maar is dit uitgestel omdat Dippenaar sonder 'n prokureur in die hof verskyn het. Die rede was dat hy nie langer sy verdedigingsprokureur, mnr. Petrie Theron, kon betaal nie. Theron het hom aan die saak onttrek. Dippenaar het gevolglik begin April 'n aansoek vir 'n prokureur by die direktoraat vir regshulp ingedien wat onsuksesvol was.
Volgens die aansoek “het ons 'n moratorium op die uitverhuur van instruksies aan private prokureurs en beskik ons ook nie oor die kapasiteit om ons eie prokureurs hieroor opdrag te gee nie”.
Volgens 'n verslag wat daarna uitgereik is, voel die verweerder hy beskik “weens die kompleksiteit van die saak” nie oor die kapasiteit om homself te verdedig nie.
Dippenaar benodig daarom “dringend die hulp van 'n prokureur, maar kan dit nie bekostig om een aan te stel nie”.
Hy beoog gevolglik om 'n nuwe prokureur met die hulp van lenings van “banke, vriende en familie” aan te stel.
Weens die kompleksiteit, duur en volume van die saak sal hy ten minste N$150 000 as 'n deposito vir 'n prokureur moet neersit.
Dippenaar word in die siviele saak vir vergoeding van byna N$11 miljoen gedagvaar, afhangend van die uitruilkoers vir die euro.
Die klaagster, me. Antonia Joschko, beskuldig hom daarvan dat hy weens nalatigheid 'n kop-teen-kopbotsing op 29 Desember 2014 naby Hentiesbaai veroorsaak het.
Die Duitse Joschko-gesin was op 'n toer in Namibië en Antonia was die enigste oorlewende van die ongeluk. Sy het haar pa, Markus Joschko (48), haar ma, Stephanie Schermuck-Joschko (49) en suster, Alexandra Joschko (19), in die ongeluk verloor.
Dippenaar wat die bestuurder van 'n wit FJ Cruiser was, het die ongeluk met ernstige beserings oorleef terwyl drie Namibiërs, Dinah Pretorius (30), Charlene Schoombe (24) en Jan-Carel Horn (27) in die ongeluk gesterf het.
Buiten die siviele saak staar Dippenaar ses klagte van moord, roekelose of nalatige bestuur, bedrog en bestuur sonder 'n geldige rybewys in die gesig.
Die kriminele saak begin weer op 18 Oktober in die streekhof op Swakopmund. In dié saak word hy deur mnr. Petrie Theron en advokaat Louis Botes verteenwoordig.
– [email protected]
Byna sewe jaar ná 'n grusame motorongeluk naby Hentiesbaai wat die lewens van ses mense geëis het, moet 'n verhoordatum vasgestel word in die siviele saak in die hoërhof.
Die verweerder, mnr. Jandré Dippenaar, moet egter eers 'n prokureur aanstel. Die kriminele saak teen Dippenaar gaan aanstaande maand voort.
Die direktoraat vir regshulp gaan nie 'n prokureur aan Dippenaar voorsien in die siviele regsgeding nie. Hy het tot 2 November kans om sy eie prokureur aan te stel. Volgens die jongste hofbevel sal 'n nuwe verhoordatum op dié dag vasgestel word. Weens die hoë aantal gevalle wat in die hoërhof aangehoor moet word, sal die saak na alle waarskynlikheid eers aanstaande jaar voortgaan.
Aanvanklik sou die siviele saak in Mei afskop, maar is dit uitgestel omdat Dippenaar sonder 'n prokureur in die hof verskyn het. Die rede was dat hy nie langer sy verdedigingsprokureur, mnr. Petrie Theron, kon betaal nie. Theron het hom aan die saak onttrek. Dippenaar het gevolglik begin April 'n aansoek vir 'n prokureur by die direktoraat vir regshulp ingedien wat onsuksesvol was.
Volgens die aansoek “het ons 'n moratorium op die uitverhuur van instruksies aan private prokureurs en beskik ons ook nie oor die kapasiteit om ons eie prokureurs hieroor opdrag te gee nie”.
Volgens 'n verslag wat daarna uitgereik is, voel die verweerder hy beskik “weens die kompleksiteit van die saak” nie oor die kapasiteit om homself te verdedig nie.
Dippenaar benodig daarom “dringend die hulp van 'n prokureur, maar kan dit nie bekostig om een aan te stel nie”.
Hy beoog gevolglik om 'n nuwe prokureur met die hulp van lenings van “banke, vriende en familie” aan te stel.
Weens die kompleksiteit, duur en volume van die saak sal hy ten minste N$150 000 as 'n deposito vir 'n prokureur moet neersit.
Dippenaar word in die siviele saak vir vergoeding van byna N$11 miljoen gedagvaar, afhangend van die uitruilkoers vir die euro.
Die klaagster, me. Antonia Joschko, beskuldig hom daarvan dat hy weens nalatigheid 'n kop-teen-kopbotsing op 29 Desember 2014 naby Hentiesbaai veroorsaak het.
Die Duitse Joschko-gesin was op 'n toer in Namibië en Antonia was die enigste oorlewende van die ongeluk. Sy het haar pa, Markus Joschko (48), haar ma, Stephanie Schermuck-Joschko (49) en suster, Alexandra Joschko (19), in die ongeluk verloor.
Dippenaar wat die bestuurder van 'n wit FJ Cruiser was, het die ongeluk met ernstige beserings oorleef terwyl drie Namibiërs, Dinah Pretorius (30), Charlene Schoombe (24) en Jan-Carel Horn (27) in die ongeluk gesterf het.
Buiten die siviele saak staar Dippenaar ses klagte van moord, roekelose of nalatige bestuur, bedrog en bestuur sonder 'n geldige rybewys in die gesig.
Die kriminele saak begin weer op 18 Oktober in die streekhof op Swakopmund. In dié saak word hy deur mnr. Petrie Theron en advokaat Louis Botes verteenwoordig.
– [email protected]
Kommentaar
Republikein
Geen kommentaar is op hierdie artikel gelaat nie