Dink weer vóór woorde jou seermaak

Ons kinders leer nog – net soos ons jare gelede het – die trappe van vergelyking vir seer: seer, seerder, seerste. Of selfs beter nog – seer, seerder, die seerste, want die oortreffende trap vereis immers die lidwoord die. Nadat ek by die trappe afgeval het, is my knie seer, my hande seerder en my ego die seerste. Heel eenvoudig, nè? Wel, ten minste die woorde. Miskien nie die bygaande verleentheid nie. Maar dis juis oor die woorde wat ek vandag wil gesels, want hulle het my hierdie week amper so onkant gevang soos die trappe.Iemand het ’n brief geskryf waarin een van dié bekende woorde vir my heel onbekend gevoel het. Ek is seer dankbaar . . . Wat? Ja, ek verstaan dat ek seer kan wees en tog terselfdertyd dankbaar dat ek nie seerder gekry het nie, maar nee, ons is nie nou by die val nie. Die woord seer het by my ’n klokkie gelui, maar dit het eerder geklink soos ’n Duitse of Nederlandse klokkie, soos die klok om die nek van een van Heidi en Peter se bokke. Nou ja, daar kry ek hom toe sowaar in onse dierbare HAT, wel met ’n etiket om sy nek: (deftig). Vir ’n oomblik wou ek my distansieer van dié segswyse in Afrikaans, want baie dankbaar val vir my darem heelwat lekkerder op die oog, oor en tong. Toe sien ek die vaste uitdrukking ten seerste wat vir my ook maar vreemderig klink. Nee wat, ek praat g’n niks só nie, dink ek ewe ondeftig. En toe lui daar ’n harde klok in my kop, een so bekend soos ons eie kerkklok – net mooi toe ek wou sê: Ek praat seer sekerlik nie so nie!Petronella F Genispfgenis@unam.na Vakgroep AfrikaansUniversiteit van Namibië

Dink weer vóór woorde jou seermaak

Kommentaar

Republikein 2025-08-05

Meld asseblief aan om kommentaar te lewer

Dink weer vóór woorde jou seermaak

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie