Diescho landuit

Catherine Sasman- Namibië is verlede Donderdag een van sy akademici kwyt. Prof. Joseph Diescho het Namibië verlede week vir Berlyn in Duitsland verruil.Diescho sê dit was “noodsaaklik om uit die land te kom” ná sy jare lange openbare vete met pres. Hage Geingob en die beweerde vyandigheid van openbare instellings.“Ek het in Europa aangekom en is nou deel van die lang ry Afrikaner-beroepslui wat uit hul geboorteland gedryf word deur vyandige en anti-intellektuele omgewings waarin hulle nie toegelaat word om hul land as mense te dien wat kennis skep en oodra nie,” het Diescho gister op pad Frankfurt toe gesê.Diescho is nie seker hoe lank sy selfopgelegde ballingskap sal duur nie. “Europa en Amerika het hul eie siekte van vreemdelingehaat, wat dinge moeilik maak vir diegene wat van hul eie regerings vlug. Ek is op soek na betekenis en tersaaklikheid op gebiede waarvoor ek bevoeg is, en ek bid tot God dat iets sal opduik,” het Diescho oor sy toekomsvooruitsigte in die buiteland geskryf. Hy sê hy het gehoop 'n klein land soos Namibië, met soveel welwillendheid, kan meningsverskille beter as die res van Afrika bestuur. "Ek het geen misdaad gepleeg, geen wet oortree of my diensooreenkoms met die Namibië Instituut vir Openbare Administrasie en Bestuur (Nipam) verbreek nie," het hy gesê.“Dit is besonder moeilik om sonder ’n betrokke rol in my moederland te wees,” skryf Diescho. Voortgesette stryd met presidentDiescho is in 2015 as uitvoerende direkteur van Nipam afgedank. Hy het gesê dit was 'n polities gemotiveerde skuif om hom te straf vir sy kritiese rubriek, “Diescho's Dictum”, wat in New Era, ’n koerant in staatsbesit, gepubliseer is.Diescho het gesê hy is ná sy afdanking deur vier ministeries genader, wat van sy vaardighede gebruik wou maak, “maar dit is op 'n hoër vlak geblokkeer”.Volgens hom wou banke, waarvoor hy dienste gelewer het terwyl hy nog in Suid-Afrika was, nie meer van sy dienste gebruik maak nie, aangesien hy nou as 'n “politieke risiko” beskou word.Verder het Diescho gesê die nasionale uitsaaier (NBC) het glo die oggend voor 'n persoonlike onderhoud met hom gevoer sou word, die onderhoud gekanselleer met die verskoning dat dit “nie veilig” was om daarmee voort te gaan nie.Diescho beweer ook die Namibiese Kwalifikasieowerheid (NQA), wat hom en ’n Zimbabwiër verlede jaar genader het om te help met kwalifikasie-assessering, het ook op die nippertjie gekanselleer en gesê hy is "nie welkom nie as gevolg van die politieke klimaat”.Die Verenigde Nasies se Opvoedkundige, Wetenskaplike en Kulturele Organisasie (Unesco) is glo ook verlede jaar, ná Diescho uitgenooi is om aan ’n projek deel te neem, deur die nasionale speaker prof. Peter Katjavivi aangeraai die uitnodiging sou “nie goed met Staatshuis afgaan” nie. “Ek kon nie eers aan die konferensie deelneem nie. Op aandrang van prof. Katjavivi is ek toegelaat om die konferensie by te woon, maar die oomblik toe ek die saal betree het, het goedgesinde lede van die parlement my aangeraai om eerder niks te sê nie,” beweer Diescho. Hy sê ook ná hy uitgenooi is om die Rooms-Katolieke kweekskool se eerste gradeplegtigheid by te woon, hy drie dae voor die geleentheid laat weet is hy is nie meer welkom nie, omdat daar “belangrike gaste sal wees”. Diescho het verder gesê hy is ook glo verhoed om die Suid-Afrikaanse burgerlike samelewings-koalisie van die Katolieke Kerk in Gaborone in Botswana toe te spreek, omdat die Namibiese regering glo nie “gelukkig met hom was nie”.Hy sê sy versoek om in te sit as waarnemer by die tweede nasionale grondkonferensie is glo ook “summier” deur die eerste minister, me. Saara Kuugongelwa-Amadhila, ontken. Diescho sê hy is in 2016 uitgenooi om tydens die HaMbukushu-kultuurfees die gemeenskap se geskiedenis voor te lees, maar is na bewering deur ’n oproep van die president se kantoor af gefnuik. Hy sê verder Geingob het geweier om die geleentheid by te woon omdat Fumu Ervin Munika dié opdrag verontagsaam het. “En so gaan dit voort,” sê hy.Diescho voer aan selfs familie en vriende het begin om hom te vermy ná hulle glo oproepe van “staatsamptenare” ontvang het oor “wat hulle besig is om met hom te doen”.“Ons gaan nou ’n gewelddadige en wettelose tydperk van ons land se geskiedenis binne, en ek weet nie meer waar ek gaan wees nie, maar dit maak nie meer saak nie,” skryf hy.Dr. Alfredo Hengari, die presidensiële woordvoerder, sê Staatshuis sal in ’n latere stadium op Diescho se aantygings reageer.

Diescho landuit

Kommentaar

Republikein 2025-08-07

Meld asseblief aan om kommentaar te lewer

Diescho landuit

Kommentaar

Republikein 2025-08-07

Meld asseblief aan om kommentaar te lewer

MELD AAN

Advertensie