Dierekliniek open sy deure

Tanja Bause – Blackdog, ’n driejarige hondjie van Outjo, was onlangs die eerste pasiënt van die Have-a-Heart-stigting se nuwe kliniek op die dorp. Sy opname het gevolg ná hy in ’n geveg met ’n bobbejaan tweede gekom het.
Die trop bobbejane het by ’n hoewe buite die dorp aangekom en Blackdog het hulle probeer verjaag.
“’n Bobbejaan het hom gegryp, gebyt en lelik geskeur,” het sy eienaar, mnr. Elifas Aimada, gesê.
Gelukkig is die bobbejaan vort en Blackdog is na die kliniek geneem waar hy deur dr. Betsy Fox versorg is.
’n Week vóór die aanval op Blackdog, het die stigting sy eerste sterilisasieveldtog by die nuwe kliniek gehou en hy was toe gekastreer.
Die kliniek is geleë in ’n ou pakhuis by die stasie wat aan TransNamib behoort. Die stigting huur die gebou en het onlangs N$26 000 bestee om dit te herstel en van basiese toerusting te voorsien sodat die eerste sterilisasieveldtog van die jaar daar gehou kon word.
Tydens die veldtog is altesame 14 katte en 56 honde gesteriliseer en gekastreer, deur ’n veearts ondersoek, ontwurm en ingeënt. Siek diere, meestal honde wat bosluiskoors het, is ook behandel.
Dit was die sesde sterilisasieveldtog wat deur die stigting op Outjo gehou is sedert dit in 2012 deur me. Lindie Prinsloo gestig is.
“Die kliniek het nog baie aandag nodig en is nog nie as ’n permanente kliniek geregistreer nie. Dit sal wel binnekort gebeur,” het Prinsloo gesê.
Groot werk wat nog moet plaasvind, is die omheining van die kliniek en hokke en stalle wat nog gebou moet word.
“Ons benodig dringend verbande, inspuitings, naalde en watte. Dalk is daar iewers hospitale of dokters wat hiervan het wat reeds verval het en weggegooi moet word. Ons neem dit met graagte. Die diere gee nie om as dit verval is nie en ons kan daarmee diere soos Blackdog help wat uit minder bevoorregte nedersettings kom, ” het Prinsloo gesê.
Die stigting beoog ook om met die ondersteuning van die munisipaliteit, lisensies vir honde op Outjo verpligtend te maak.
“Wanneer jou hond sonder ’n lisensie gevind word, sal ons die hond neem en die eienaar kan hom terug kry. As die dier vir ’n tweede keer sonder ’n lisensie gevind word, sal die eienaar ’n boete kry en die derde keer sal die hond ’n nuwe eienaar kry.”
Hoewel die kliniek toegespits is op die behandeling van diere uit die voorheen benadeelde nedersettings, sal alle diere hier versorg word, aangesien dit ’n inkomste sal genereer. Diere kan ook Saterdae hier teen bosluise behandel word.
Daar is nie ’n voltydse veearts in die kliniek se diens nie, maar hulle maak gebruik van veeartse wat hul tyd en dienste gratis aanbied.
Dr. Betsy Fox het 26 jaar gelede van Amerika na Namibië verhuis omdat sy by die bewaring van renosters betrokke wou raak. Sy het aanvanklik vir die ministerie van die omgewing en toerisme in die Etosha Nasionale Park gewerk en in 1989 na Outjo verhuis. Hier het sy verder vir die ministerie gewerk totdat sy in 2008 afgetree het. Daarna het sy by Elephant Human Relations Aid (EHRA) begin werk en beywer haar nou vir die bewaring van die woestyn aangepaste olifante.
“Daar is geen veearts in private praktyk op Outjo nie, dus help ek waar ek kan en soos die tyd my toelaat,” het Fox gesê.
Prinsloo kan by 067 313 732 gekontak word, of besoek www.have-a-heartspayandneuterproject.com of www.facebook.com/HaveAHeartOutjo vir meer inligting oor die stigting en sy aktiwiteite.