Die wedloop woed voort
Swapo is, in aanloop na sy kongres later vandeesmaand, in ‘n verdelende stryd tussen twee sterk faksies gewikkel.
Estelle de Bruyn
Wanneer Swapo se vyfjaarlikse kongres van 23 tot 26 November in Windhoek plaasvind, sal die tafel gedek wees vir die party se swaargewigte om mekaar die stryd aan te sê.
DIE HARAMBEE-SPAN
Pres. Hage Geingob en drie van sy strydgenote, wat verkiesbaar is vir die topvierposisies in Swapo by die komende kongres, was die afgelope naweek op Grootfontein om hul boodskap na die Otjozondjupastreek te neem. Hulle staan bekend as die Hage-span, oftewel die Harambee-span.
Geingob is sedert 2015, toe oudpres. Hifikepunye Pohamba die tuig as partypresident neergelê het, die party se waarnemende president.
Hy hoop om nou die jawoord by kongresgangers te kry om die “waarnemende” af te skud en president te word.
Die span bestaan uit Geingob se verkose kandidate, wat hy vroeër tot groot ergernis van sommige partylede bekend gemaak het. Hulle is die adjunk eerste minister en minister van internasionale betrekkinge en samewerking, me. Netumbo Nandi-Ndaitwah, wat as visepresident staan, die minister van stedelike en landelike ontwikkeling, me. Sophia Shaningwa, wat as sekretaris-generaal staan, en die rektor van die Swapo-skool en voormalige adjunkpremier, mnr. Marco Hausiku, wat as adjunk-sekretaris-generaal verkiesbaar is.
DIE SWAPO-SPAN
Hul opponente, die sogenaamde Swapo-span, het op Walvisbaai met ondersteuners vergader. Dié span bestaan uit die voormalige eerste minister, mnr. Nahas Angula, en die minister van jeug, sport en nasionale diens, mnr. Jerry Ekandjo, wat albei vir Geingob die stryd om die Swapo-presidentskap aansê; die voormalige minister van werke en vervoer, mnr. Helmuth Angula, en die minister van binnelandse sake en immigrasie, me. Pendukeni Iivula-Ithana, wat albei as visepresidentskandidate teen Nandi-Ndaitwah te staan kom; Swapo se streekskoördineerder in die Oshikoto-streek, mnr. Armas Amukwiyu, wat met Shaningwa sal meeding om die posisie van sekretaris-generaal, en die voormalige adjunkminister van gesondheid, me. Petrina Haingura, en die plaaslike sakevrou me. Martha Namundjebo-Tilahun, wat teen Hausiku om die adjunk-sekretaris-generaal pos meeding.
GROOTFONTEIN-VERGADERING
Nampa berig byna 5 000 mense het by die Grootfontein-sportgronde vergader om na die Harambee-span te luister. In sy boodskap het Geingob gesê die byeenkoms was nie soseer ‘n politieke vergadering nie, maar eerder om afgevaardigdes na die kongres aan die gemeenskap bekend te stel.
“Die stadion is egter vol, so kom ons vier die oorwinning saam, en dankie dat u gekom het om ons te ondersteun,” het hy gesê.
Die president het gesê die ander kandidate in sy span is “getoetse kaders" van die party wat vir interne Swapo-posisies meeding. Hy het afgevaardigdes aangemoedig om vir sy span te stem.
Die onderskeie kandidate het hul veldtogbeloftes, insluitende hoe hulle interne sake in die party sal behartig as hulle verkies word, met die skare gedeel.
WALVISBAAI-BYEENKOMS
Die Swapo-span se boodskap op Walvisbaai was dat verandering en transformasie van die party nodig is. Van die kandidate het gesê hulle verlang na die goeie ou dae in die party toe daar vrede en eenheid was en dat hulle na die sleutelwaardes van die party wil terugkeer.
VLEUELS
Die drie vleuels van Swapo, die vroueraad, die raad van oudstes en jeugliga, het verlede Woensdag hul steun aan Geingob en sy span toegesê. Hulle het die verdelende gevolge van mededinging om leierskapposisies veroordeel en gesê dit skep “twee sentrums van mag” in die party.
Volgens dié vleuels is die oordrag van mag ‘n gevestigde beginsel in partygeledere soos deur oudpres. Sam Nujoma en sy opvolger, oudpres. Hifikepunye Pohamba, gevestig. Om hierdie rede doen hulle ‘n beroep op afgevaardigdes om Geingob en sy geïdentifiseerde span te ondersteun.
TJIRIANGE
‘n Dag ná die vleuels se uitlatings het die voormalige minister van justisie en woordvoerder vir die Swapo-span, dr. Ngarikutuke Tjiriange, op ‘n nuuskonferensie gesê uitsprake oor Swapo se twee magsentrums is nie waar nie.
Op sy beurt voer hy aan daar was nog nooit ‘n outomatiese oordrag van mag in Swapo nie, tensy dit deur ‘n demokratiese proses gebeur het.
Hy het die vleuels se steun aan sekere kandidate as “voortydig en ondemokraties” bestempel.
Tjiriange sê die posisie van president is vakant en kan deur enige lid betwis word.
“Wat ons egter die afgelope tyd gesien het, is ‘n poging om sekere kandidate deur die enkelkandidatuurtegniek af te dwing, ondanks die feit dat die posisie vakant is,” het hy gesê.
•Die DTA se voormalige president, mnr. Katuutire Kaura, het Saterdag by Swapo aangesluit op Grootfontein en is deur Geingob verwelkom. Hy is in September 2015 deur Geingob as spesiale raadgewer in die kantoor van die streeksgoewerneur van die Kunenestreek aangestel.
Kaura het geen redes verstrek waarom hy die Popular Democratic Movement (PDM), soos die DTA nou bekend staan, die rug toegekeer het nie. - Eie berig/Nampa
Wanneer Swapo se vyfjaarlikse kongres van 23 tot 26 November in Windhoek plaasvind, sal die tafel gedek wees vir die party se swaargewigte om mekaar die stryd aan te sê.
DIE HARAMBEE-SPAN
Pres. Hage Geingob en drie van sy strydgenote, wat verkiesbaar is vir die topvierposisies in Swapo by die komende kongres, was die afgelope naweek op Grootfontein om hul boodskap na die Otjozondjupastreek te neem. Hulle staan bekend as die Hage-span, oftewel die Harambee-span.
Geingob is sedert 2015, toe oudpres. Hifikepunye Pohamba die tuig as partypresident neergelê het, die party se waarnemende president.
Hy hoop om nou die jawoord by kongresgangers te kry om die “waarnemende” af te skud en president te word.
Die span bestaan uit Geingob se verkose kandidate, wat hy vroeër tot groot ergernis van sommige partylede bekend gemaak het. Hulle is die adjunk eerste minister en minister van internasionale betrekkinge en samewerking, me. Netumbo Nandi-Ndaitwah, wat as visepresident staan, die minister van stedelike en landelike ontwikkeling, me. Sophia Shaningwa, wat as sekretaris-generaal staan, en die rektor van die Swapo-skool en voormalige adjunkpremier, mnr. Marco Hausiku, wat as adjunk-sekretaris-generaal verkiesbaar is.
DIE SWAPO-SPAN
Hul opponente, die sogenaamde Swapo-span, het op Walvisbaai met ondersteuners vergader. Dié span bestaan uit die voormalige eerste minister, mnr. Nahas Angula, en die minister van jeug, sport en nasionale diens, mnr. Jerry Ekandjo, wat albei vir Geingob die stryd om die Swapo-presidentskap aansê; die voormalige minister van werke en vervoer, mnr. Helmuth Angula, en die minister van binnelandse sake en immigrasie, me. Pendukeni Iivula-Ithana, wat albei as visepresidentskandidate teen Nandi-Ndaitwah te staan kom; Swapo se streekskoördineerder in die Oshikoto-streek, mnr. Armas Amukwiyu, wat met Shaningwa sal meeding om die posisie van sekretaris-generaal, en die voormalige adjunkminister van gesondheid, me. Petrina Haingura, en die plaaslike sakevrou me. Martha Namundjebo-Tilahun, wat teen Hausiku om die adjunk-sekretaris-generaal pos meeding.
GROOTFONTEIN-VERGADERING
Nampa berig byna 5 000 mense het by die Grootfontein-sportgronde vergader om na die Harambee-span te luister. In sy boodskap het Geingob gesê die byeenkoms was nie soseer ‘n politieke vergadering nie, maar eerder om afgevaardigdes na die kongres aan die gemeenskap bekend te stel.
“Die stadion is egter vol, so kom ons vier die oorwinning saam, en dankie dat u gekom het om ons te ondersteun,” het hy gesê.
Die president het gesê die ander kandidate in sy span is “getoetse kaders" van die party wat vir interne Swapo-posisies meeding. Hy het afgevaardigdes aangemoedig om vir sy span te stem.
Die onderskeie kandidate het hul veldtogbeloftes, insluitende hoe hulle interne sake in die party sal behartig as hulle verkies word, met die skare gedeel.
WALVISBAAI-BYEENKOMS
Die Swapo-span se boodskap op Walvisbaai was dat verandering en transformasie van die party nodig is. Van die kandidate het gesê hulle verlang na die goeie ou dae in die party toe daar vrede en eenheid was en dat hulle na die sleutelwaardes van die party wil terugkeer.
VLEUELS
Die drie vleuels van Swapo, die vroueraad, die raad van oudstes en jeugliga, het verlede Woensdag hul steun aan Geingob en sy span toegesê. Hulle het die verdelende gevolge van mededinging om leierskapposisies veroordeel en gesê dit skep “twee sentrums van mag” in die party.
Volgens dié vleuels is die oordrag van mag ‘n gevestigde beginsel in partygeledere soos deur oudpres. Sam Nujoma en sy opvolger, oudpres. Hifikepunye Pohamba, gevestig. Om hierdie rede doen hulle ‘n beroep op afgevaardigdes om Geingob en sy geïdentifiseerde span te ondersteun.
TJIRIANGE
‘n Dag ná die vleuels se uitlatings het die voormalige minister van justisie en woordvoerder vir die Swapo-span, dr. Ngarikutuke Tjiriange, op ‘n nuuskonferensie gesê uitsprake oor Swapo se twee magsentrums is nie waar nie.
Op sy beurt voer hy aan daar was nog nooit ‘n outomatiese oordrag van mag in Swapo nie, tensy dit deur ‘n demokratiese proses gebeur het.
Hy het die vleuels se steun aan sekere kandidate as “voortydig en ondemokraties” bestempel.
Tjiriange sê die posisie van president is vakant en kan deur enige lid betwis word.
“Wat ons egter die afgelope tyd gesien het, is ‘n poging om sekere kandidate deur die enkelkandidatuurtegniek af te dwing, ondanks die feit dat die posisie vakant is,” het hy gesê.
•Die DTA se voormalige president, mnr. Katuutire Kaura, het Saterdag by Swapo aangesluit op Grootfontein en is deur Geingob verwelkom. Hy is in September 2015 deur Geingob as spesiale raadgewer in die kantoor van die streeksgoewerneur van die Kunenestreek aangestel.
Kaura het geen redes verstrek waarom hy die Popular Democratic Movement (PDM), soos die DTA nou bekend staan, die rug toegekeer het nie. - Eie berig/Nampa
Kommentaar
Republikein
Geen kommentaar is op hierdie artikel gelaat nie