‘Die vryheid om myself te wees’

Die plaaslike uitvoerende kunstenaar Khadijah Mouton is vanaand op die gewilde Night Under The Stars-verhoog (Nuts) te sien. Nuts is ‘n inisiatief van die Goethe-Institut en vind maandeliks by hul perseel in Fidel Castrostraat, Windhoek, plaas.Kollig het met Khadijah oor haar loopbaan tot dusver gesels en hoe sy oor haar beplande optrede vanaand voel.Afgesien van haar sangtalent is dié kunstenaar boonop ‘n digter, danser, aktrise en platejoggie. “So lank as wat ek kan onthou, het ek elke geleentheid om op die verhoog te wees, ten volle aangegryp. Dis al wat ek wou doen. Ek sê altyd my passie het van my 'n kunstenaar gemaak, dit was nie my keuse nie. Dis 'n pragtige paradoks wat my op my tone hou,” sê Khadijah.Van al die kunsvorme verkies sy musiek.“Ek verkies dit om te sê daar bestaan nie eintlik iets soos musiekgenres nie, maar dan sou ek al die werk ’n oneer aandoen wat oor geslagte gedoen is om die verskillende genres te vestig.”Wanneer sy musiek skryf, sê sy, is die eindresultaat direk met haar emosies en energie in daardie oomblik verbind.“Ek is emosiegedrewe. As ek uiters gelukkig is, skep ek jazz, as ek kwaad is, hou ek van Trap. As ek moeg en vodde voel, is ek geneig om elektroniese dansmusiek (EDM) te maak. Daar is geen bloudruk wat my genre betref nie. Ek beskou dit as 'n vryhandskets,” sê sy. Khadijah se loopbaan as musikant het op die ouderdom van ses met ’n kleuterskoolkonsert afgeskop. Hoewel dit nie haar beste vertoning ooit was nie, het dit alles met haar passie vandag te doen. “Ek was ‘n sonneblom. Die kleinste sonneblom wat jy al ooit gesien het.”Sy sê sy sing en dans voor mense vandat sy kan loop.Hoewel Khadijah gereeld optree, is sy nie tans voltyds musikant nie, maar ook student, en boonop aktrise. “Ek is 'n teater- en TV-aktrise. Ek het onlangs die voorreg gehad om deel van Tim Huebschle se #LandOfTheBraveFilm te wees. Ek het 'n ook ‘n rol in die Untitled-reeks gehad, wat later vanjaar sal verskyn. Ek is ook 'n danser. Ek is mal oor dans.”Sy wil graag meer tyd vir dans maak.Khadijah put inspirasie uit verskeie kunstenaars, maar Andre 3000 is een van haar grootste invloede, sê sy. “Op musikale vlak is hy alles wat ek graag as kunstenaar wil wees. Hy lewer sy optredes met soveel grasie en perfeksie. Ek kry hoendervleis elke keer as ek sy stem op 'n snit hoor. Sy liriese inhoud en omvang is ongelooflik.”As jy haar vra wat is vir haar die lekkerste van haar beroep, sê sy die vryheid wat dit haar bied om haarself te kan wees. “Of eerder die weergawe van myself wat ek word wanneer ek op die verhoog is. Ek hou van daai mens,” sê sy. Op die verhoog het sy die geleentheid om dít wat sy “in die regte lewe” sou sê, met die wêreld te deel. “Ná elke vertoning kan ek net huis toe gaan en my ma se dogter wees,” sê sy.Oor haar beplande optrede by die Goethe-Institut vanaand is sy baie opgewonde en sy wil die publiek aanmoedig om dit by te woon. “Ek is jonk, eksperimenteel en maak nie verskonings nie,” sê sy. “Die beste manier om die show te beskryf, is dat ons die ateljee verhoog toe bring. Dit sal energiek wees. Ek wil mense op hul voete hê. Ek het 'n regstreekse platejoggie op die verhoog.”Haar plattejoggie, Beat Slangers, is een van haar beste vriende. “Die verhoog is ’n kwesbare ruimte en ek kies om dit met Beat Slangers te deel.”Vanaand se show begin om 19:00 by die Goethe-Institut. Kaartjies kos N$20 en kan by die deur gekoop word.

‘Die vryheid om myself te wees’

Kommentaar

Republikein 2026-05-05

Meld asseblief aan om kommentaar te lewer

‘Die vryheid om myself te wees’

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.