Die toep wat elke huis moet hê

Tanja Bause'n Aanval in haar huis het me. Jaylee Venter (28) se lewe handomkeer verander – en 'n suksesvolle toep is gebore.“Ek is drie jaar gelede deur 'n man in my huis aangeval. Ek het gehoor hoe hy probeer om die venster na my kamer met 'n pistool stukkend te slaan. Toe ek besef die man is besig om in my kamer in te kom, het ek my selfoon onder die bed in gegooi,” sê sy. “Die man het gesê hy wil my selfoon hê en het my twee keer in die gesig geslaan toe ek dit nie vir hom wou gee nie. Hy het alles in die huis op my bed gegooi, in die laken toegedraai, dit oor sy skouer gegooi en op die vlug geslaan,” sê Venter. Ná die man weg is, het Venter haar selfoon onder die bed uitgehaal en die polisie geskakel. “Maar niemand het geantwoord nie en ek het besef ek het geen ander nommers nie. Ek het nie die buurtwag se nommer gehad nie. Ek was alleen en het besef talle mense moes al in dieselfde situasie gewees het.” Sy het in dié stadium as eiendomsagent gewerk en besef slegte diens is 'n groot probleem.“Ons het baie probleme met byvoorbeeld loodgieters gehad. Soos die idee van die toep vorm begin aanneem het, het ek besef dit is nie net nodig om noodnommers daarop te hê nie, maar ook betroubare diensverskaffers se nommers. Niemand stoor dié nommers op hul selfone nie.” Dit het Venter sowat 'n jaar en 'n half geneem om die HomeDome-toep te ontwikkel. “Ek het met inligtingstegnologie grootgeword en my eerste rekenaar op 13 self gebou,” sê sy.HomeDome neem nie baie foonspasie in beslag nie. Boonop kan dit verniet van Google Play Store of iStore afgelaai word. Die toep is gebruikersvriendelik vir mense van alle ouderdomme. Dit bestaan uit verskeie kategorieë waar gebruikers alles van noodnommers vir die polisie en buurtwagte, die nommers van skole in Windhoek, insleepdienste en verskeie ander diensverskaffers kan opspoor. “Wanneer jy die toep gebruik, het jy alles wat jy benodig op jou vingerpunte. Jy kan die nommers ook direk van die toep af skakel. Dit is nie nodig om hulle eers neer te skryf en dan te skakel nie. Dis maklik en vinnig om te gebruik,” sê Venter. “HomeDome is 'n veilige plek. Mense wat die toep afgelaai het, kan mekaar ook kontak om te verseker die diensverskaffers is veilig en betroubaar.” Toepgebruikers kry ook die geleentheid om die diensverskaffers te evalueer. “Ek het 'n streng beleid van drie kanse. As die diensverskaffer drie keer swak diens gelewer het en die klagtes is by nadere ondersoek geldig, word hulle van die toep verwyder. As jy nie jou belofte van goeie diens kan nakom nie, beteken dit ek kan nie my belofte van goeie diensverskaffers aan die gemeenskap nakom nie.”Die toep is tans gratis vir diensverskaffers. “Dit gaan nie oor die geld nie. Tans is dit vir my belangrik dat soveel mense moontlik toegang tot die toep het en dat dit moontlik iemand se lewe kan red of ten minste kan vergemaklik. Ek het dit vir die Namibiese gemeenskap geskep en is trots daarop dat ek dit kon doen.” In die toekoms sal mense wat op die toep hul dienste adverteer wel 'n fooi moet betaal.“Ek sal dan 10% aan liefdadigheid skenk. Ek sal toepgebruikers die geleentheid gee om uit drie projekte te kies en die wenner sal die geld ontvang. Dit is my manier om aan die gemeenskap terug te gee.” Daar is ook 'n funksie op die toep waar mense besighede en diensverskaffers kan voorstel wat hulle dink op die toep hoort. “As iemand van 'n goeie, betroubare loodgieter, elektrisiën of so weet, moet hulle my laat weet. Die toep is daarop gemik om klein besighede te bevorder. Besighede wat goeie diens lewer en vir hulle kliënte uit hul pad uit gaan.” Teen die einde van verlede jaar was die toep beskikbaar om af te laai, en die afgelope drie maande het meer as 700 mense die toep al afgelaai.“Ek het nooit in my wildste drome gedink iets wat ek geskep het, sou so goed doen nie. Dit bewys so 'n toep is baie nodig.”

Die toep wat elke huis moet hê

Kommentaar

Republikein 2026-05-12

Meld asseblief aan om kommentaar te lewer

Die toep wat elke huis moet hê

Kommentaar

Republikein 2026-05-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.