Die Simmentaler op natuurlike weiding - natuurlik!

Dewald Walters, Simmentaler-teler - Wanneer mens aan die beesrasse van die wêreld dink, het ons verskillende persepsies oor die rasse wat om verskillende redes dadelik by ons opkom. Sommige van die persepsies is gegrond op feit, of ten minste eie ervaring, maar baie – selfs miskien die meerderheid – is gevorm rondom gesprekke wat vir watter rede ookal sin maak, of pas by hoe ons dit graag wil sien. Ongelukkig is dit ook mos nou maar eenmaal so dat die negatiewe baie lekkerder oorvertel as goeie nuus! Die meeste van ons telers is al op een of ander stadium met die sogenaamde tekortkominge van die Simmentaler gekonfronteer. Self moes ek al hoor hoe ’n medeboer vir my sê: “Hulle is nou mooi, maar wag tot dit droog word!” Dan is daar natuurlik ’n ander weergawe wat lui: “Hulle sal nie in my gebied aard nie”, en baie meer. Die vraag is egter of enige van die persepsies rakende die kwesbaarheid van Simmentalers, indien hulle nie op aangeplante weidings, mieliereste of vol voerbakke onderhou word nie, waar is.Geskiedenis Die geskiedenis vertel heeltemal ’n ander storie. Een van die talle noemenswaardige prestasies van die Simmentaler is juis dat die ras regoor die wêreld onder ’n verskeidenheid van klimaatstoestande en produksiestelsels voorkom. As ’n Namibiër is dit vir my natuurlik baie aangenaam om vir mense te vertel – tot hulle groot verbasing – dat Simmentalers se eerste spore buite Europa juis in Namibië getrap is.In 2016 vier Simmentaler hul 123ste herdenking van daardie eerste spore in die Namib. Mens kan kwalik vra vir ’n beter getuigskrif van die ras seaanpasbaarheid as juis hierdie merkwaardige mylpaal! Indien die diere net oorleef het, sou dit sekerlik – gegewe die kontras tussen kontinent van afkoms en land van aankoms – noemenswaardig genoeg gewees het. Die ras het egter baie meer bereik as om net te oorleef; hulle het geblom!Oral in Namibië sien jy Simmentalers, of ten minste beeste met blesse, ten spyte daarvan dat dit in een van die droogste lande op ons planeet, en op alles behalwe aangeplante weidings of landerye, is. Danksy die harde werk gedoen deur die eerste telers aan die suidpunt van ons kontinent, en die daaropvolgende generasies, het daar ’n ras ontstaan wat die uitdagings van wispelturige reënval, uiterstes van hitte en koue, roofdiere, en meer kan weerstaan. Die Simmentaler moes eenvoudig op natuurlike weiding oorleef weens die realiteit van wat destyds beskikbaar was. Vandag is dit grootliks steeds die geval. Toegang tot moderne lekke en voere is makliker beskikbaar, maar die stygende koste daarvan beklemtoon die belangrikheid van natuurlike weiding toenemend.Hoekom is dit belangrik dat die Simmentaler op natuurlike weiding hulself moet handhaaf? Die werklikheid binne ons moderne konteks is dat ons as telers toenemend met ’n baie belangrike vraag gekonfronteer word, naamlik hoe ek meer met minder kan doen. Die vraag word op verskeie vlakke gevra en die woorde verskil miskien, maar of ons praat oor die energiekrisis wat in Suidelike Afrika ervaar word, of ons praat oor die El Niño-verskynsel, of ons praat oor weidingsbestuur en ontbossing en of ons praat oor teelwaardes, die werklikheid is dat ons juis oor hierdie vraag praat. Ons moet ook met ander rasse en ander bronne van proteïen meeding en daarby speel ons ook toenemend op ’n wyer internasionale speelveld met meer en meer opsies wat voor die verbruiker geplaas word. Die Simmentaler kan onder hierdie omstandighede, van skaarste en die soeke na die optimale oplossing, juis danksy die volgende redes op die voorgrond tree: 1. Die Simmentaler is ’n uitsonderlike moeder. Beide vrugbaar en met die vermoë om ’n sterk kalf wat goed groei te speen. 2. Simmentaler-kruisings vaar uitstekend binne alle aspekte van produksie. Die voordele van heterose is alombekend en die grootste “gratis” in boerdery! 3. Die samestelling van die Suider-Afrikaanse beesbevolking posisioneer die Simmentaler as ’n natuurlike antwoord vir gebruik in ’n kruistelingsprogram danksy die sterk Zebu/ Sanga en sintetiese invloed op die meerderheid van kommersiële kuddes. 4. Die Simmentaler-ras is die getalrykste, bes verspreide en geneties mees diverse dubbeldoelopsie vir kruisteling. Die melkoplossing lewer ons ras sonder weerga, sonder om enige ander produksiefaktor te benadeel. 5. Simmentalers is uitstekende optimaliseerders. Simmentalers reageer uitstekend op enige bykomende insette, hetsy in die vorm van voeding, gesondheidsbestuur of goeie boerderypraktyke. Jy as boer word óf vergoed met meer kilogramme op die skaal, óf aan die vrugbaarheidskant met herbesetting of vroeëre paringsouderdom. Dis die ras. Die tweede belangrike aspek is so bietjie meer ingewikkeld. Dit gaan oor ons as telers en produsente. Die vraag moet wees hoe ons hierdie aangepaste en hoogs doeltreffende ras reg kan benut. ’n Paar vlakke waar ons as telers ’n groot verskil kan maak, is die volgende:Prestasietoetsing Ons is deel van die mees gevorderde prestasietoetsingsprogram. Daar is talle voorbeelde van die sukses wat uit die korrekte en deeglike benutting van BLUP-teelwaardes behaal kan word. Die voordele van prestasietoetsing is aansielik meer indien ’n genootskap in geheel, eerder as enkele telers, dit ondersteun en benut. BLUP-teelwaardes kan baie maklik aangewend word om die presteerders in ons kuddes te identifiseer en, meer belangrik, om die passasiers uit te skakel.Benutting van bestaande hulpbronneOns is deel van ’n baie doeltreffende telersgenootskap. Sake, wat vir baie rasse se telers onmoontlik is om te hanteer, is vir ons telers alledaags. Hier verwys ek onder andere na deeglike administrasie, goeie bemarking en toegang tot tegniese dienste – alles daar geplaas om ons suksesvol te maak. Hierdie fantastiese hulpmiddels beteken baie min indien dit nie reg benut en gebruik word nie. Kyk bietjie meer noukeurig na die waardevolle inligting op u Simpro-verslag. Benut die besoek van die tegniese beampte ten volle – dis ’n baie unieke voorreg wat ons geniet. Inligting Dit is makliker as ooit om by antwoorde uit te kom vir die uitdagings wat ons in die gesig staar. Die internet met sy legio webtuistes, moderne vorme van kommunikasie asook die gemak waarmee ons deesdae reis, maak die verkryging van oplossings vir probleme, of uitdagings, makliker as ooit. Samewerking met medetelersLeer by u medeteler en/of ondersteun u medeteler. Ons is interafhanklik van mekaar se prestasies asook mekaar se mislukkings. Onder ekstensiewe toestande moet ons as telers versigtig wees om diere te bemark na gebiede met totaal ander omstandighede as wat die diere ken. Gun dit vir jou medeteler wat naby jou voornemende koper boer. Samewerking gaan ook ’n beduidende rol in genetiese vordering speel. Hoe meer geskakel ons is, hoe beter. Indien ons as ’n genootskap van telers ’n bydrae tot die voortgesette suksesverhaal van die Simmentaler wil maak, sal ons kuddes en bestuur toonbeelde van doeltreffendheid moet wees. Dit klink vir my na ’n blink, maar uitdagende toekoms.*Oorspronklik gepubliseer in die 2015 Simmentaler Joernaal

Die Simmentaler op natuurlike weiding - natuurlik!

Kommentaar

Republikein 2025-12-02

Meld asseblief aan om kommentaar te lewer

Die Simmentaler op natuurlike weiding - natuurlik!

Kommentaar

Republikein 2025-12-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.