Die Score-projek se suksesverhale

Elvira Hattingh - Alhoewel die Verenigde Nasies se Ontwikkelingsfonds (UNDP) se Score-projek in die noorde van Namibië vanjaar tot ‘n einde sal loop, het dit altesaam 222 kleinboere en skole in sewe streke gehelp om mikrodruppelbesproeiingstelsels te ontwikkel. Dit het ook sowat 80 landbou-onderwysers en meer as 500 boere geleer oor tuinbou, asook hoe om die vrugbaarheid van grond te bestuur en bome aan te plant. Die Score-projek het leiding en mentorskap verskaf en kleinboere geleer hoe om hul gereedskap te onderhou.Die ministerie van landbou, water en bosboue se Score-beampte, me. Mirjam Kaholongo, het tydens ‘n onlangse byeenkoms in Windhoek oor klimaatsverandering en voedselsekuriteit in Namibië belangegroepe toegespreek oor die werk van dié projek in Namibië.Sy het gesê die doel van die Score-projek was die verbetering van gemeenskappe se veerkragtigheid wat betref klimaatsveranderlikheid en klimaatsverandering in die noorde van Namibië, met ‘n spesiale fokus op vroue en kinders.Die projek is in die Kunene-, Omusati-, Oshana-, Ohangwena-, Oshikoto, die Kavango-Wes asook die Kavango-Oos-streek van stapel gestuur en deelnemers aan die projek is gekies op grond van of hulle ‘n geskikte waterkonneksie gehad het, hul belangstelling en toewyding aan die projek, het Kaholongo verduidelik.GOEIE NUUS“Suksesverhale wat hieruit voortgespruit het, sluit in die Sekondêre Skool Onampira wat nou ‘n inkomste van meer as N$25 000 per jaar uit die plant van groente genereer en die skool se voedselprogram ondersteun, asook die Okaku-jeuggroep, wat spinasie aan Spar Ongwediva en die Choppies-supermark verskaf en sowat N$5 000 per maand verdien,” het sy gesê.Kaholongo sê die program kon daarin slaag om betrokkenis se voedselsekuriteit en inkomste te verbeter. “Só is hulle nog ‘n manier gewys om ‘n inkomste te verdien – heeljaar. Hulle is entrepreneurs wat kos vir hulself en vir markte kweek. Deur middel van die projek kon ons ook ‘n passie vir landbou onder skoolleerlinge help skep,” het sy gesê. Verder kan omliggende gemeenskappe vars produkte koop en terselfdertyd slegs die “plaashekprys” betaal. “Gemeenskappe is aangemoedig om van die drie beginsels van bewaringsakkerbou gebruik te maak. Terselfdertyd is hulle geleer hoe om boek te hou van hul landbou-aktiwiteite, asook hul produksie. Verskeie opleidingsessies, wat veldbesoeke ingesluit het, is vir altesaam 700 boere aangebied.Sy sê ses trekkers is vir die projek aangeskaf en skeurploeë is pasgemaak om aan plaaslike omstandighede te voldoen.“Tydens die afgelope twee jaar is altesaam 1005,2 hektaar se grond geploeg. Toerusting en materiaal soos organiese bemesting en droogtebestande saadvariëteite soos peulgewasse is verskaf,” het Kaholongo gesê.Sy sê as deel van die projek is vyf gronddamme in die onderskeie streke herstel, sodat reënwater opgevang en later weer gebruik kan word. Een van die damme is by Okalongo in die Omusatistreek.UITDAGINGSKaholongo sê ‘n uitdaging vir die voorsetting van die aktiwiteite is ‘n gebrek aan plaasimplemente en –insette vir bewaringsboerdery.Boonop is hulle bekommerd oor die instandhouding van byvoorbeeld die trekkers wanneer die projek tot ‘n einde loop. “Nog ‘n uitdaging is siektes en peste wat die gewasse en groente aanval. Daar bestaan oor die algemeen ‘n gebrek aan kennis oor hoe dit hanteer moet word,” het sy gesê. Sy sê voorts moet daar ook gekyk word hoe boere in die noordelike streke van die land formele markte kan betree en verder moet hulle aangemoedig word om veral peulgewasse op ‘n groter skaal te kweek.“Namibië is daartoe in staat om sy volle potensiaal midde-in klimaatsveranderlikheid en klimaatsverandering te bereik, mits die tegniese kapasitiet, finansiële hulpbronne en betrokkenheid van die private sektor verbeter kan word,” het sy gesê. Die Score-projek is deur die ministerie van die omgewing en toerisme, asook die ministerie van landbou, water en bosbou toegepas, en gefinansier deur die Global Environment Facility (GEF) se spesiale klimaatsveranderingsfonds (SCCF). Dit is gedoen in samewerking met die ministerie van landbou se direktoraat vir landbouproduksie, -uitbreiding en ingenieursdienste (DAPEES), die Agentskap vir Landboubemarking en -handel (AMTA), streeksrade en AgriBank.

Die Score-projek se suksesverhale

Kommentaar

Republikein 2026-05-05

Meld asseblief aan om kommentaar te lewer

Die Score-projek se suksesverhale

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.