Die momentum moet herstel word

WILLEM DE WET SKRYF:

Nee kêrels, nou moet ons comrades wat in beheer is van die entstowwe begin om uit een mond te praat.

Ons kry ons personeel landwyd georganiseer om die ent te vat. Een span ry van Kamanjab af Windhoek toe met 'n bevestigde afspraak vir die ente by Pohamba-hospitaal. Net voor Okahandja bel hulle net om te bevestig dat alles nog reg is soos die dag tevore bevestig en hulle word meegedeel dat entstowwe op is en hulle maar kan terugkeer na Kamanjab.

Hulle laat dit nie daar nie en bel elke hospitaal en kliniek wat ent, maar die boodskap bly dieselfde. Hulle probeer Okahandja, maar hulle het ook nie.

Hulle ry see toe en probeer op Usakos, Karibib, Walvis en Swakop maar die boodskap is dieselfde. Êrens krap iemand genadiglik op Walvis entstof uit en hulle kry die ent agter die rug.

Nou lees ons vanoggend (Donderdag) dat daar volgens die rekords êrens in die land blykbaar nog 40 000 ente staan en wag vir ontvangers? Hoe de hel is dit moontlik dat mense weggewys word as daar is?

Julle is besig om die momentum te breek met die dat julle self nie weet wat in jul store aangaan nie. Die spuitrekords wys daar is nog, maar lyk my niemand weet waar die 40 000 ente is nie. Ruik ek vis?

Kry julself reg asseblief of gee die taak vir die enting oor aan die privaat sektor dat ons net orde kan kry en die momentum behou. Die anti-vaxers gedy op die onbevoegdhede en flaters van die wat die proses moet dryf en dit maak op die einde dat die wat wou ent nou ook op die draad gaan bly sit.

Kry orde en maak gekwantifiseerde en geverifieerde uitsprake anders saai julle verwarring.