Die lewe is 'n lied of 'n les

Jou ervaring as mens het 'n reuse-impak op die mens wat jy voortaan gaan of wil wees. Ja, as 'n mens kyk na die nature v nurture-idee is daar baie waarmee jy sommer net gebore is, maar terselfdertyd is dit hoe jy grootgemaak is, jou omstandighede en jou opvoeding wat 'n ongelooflike groot impak het op wie jy gaan wees in die lewe en hoe jy dit gaan benader.Dieselfde kan gesê word van die mense by wie jy leer. Dit hoef nie noodwendig jou onderwysers, afrigters of die nuutste ghoeroe te wees wat Google uitgooi nie, maar jou medemens wat op sy eie manier jou mentor kan word.Dwarsdeur die dag ontmoet jy mense wat op hul eie klein maniere die beste van die mensdom verteenwoordig. Dit kan die drywer langs jou in druk verkeer wees, wat vir jou 'n kans gee, of die wag wat jou daagliks met 'n wysheid verstom. Dit kan ook net die vreugde, vriendelikheid en vrygewigheid wees waarmee 'n vreemdeling, wat sonder om iets terug te vra, jou in jou tyd van nood help. Daar is beslis heelwat oomblikke waaruit ons lewenslesse of twee kan leer. Al is ons nie heeltemal bewus daarvan nie, leer ons iets uit elk van hierdie interaksies – veral as dit 'n indruk, goed of sleg, op ons gemaak het.Die probleem kom wanneer ons uit die verkeerde interaksies leer, en daarmee wegloop en dit deel van ons benadering maak.'n Maklike voorbeeld is vloek. Ons weet almal 'n naweek tussen jou rowwe neefs kan maak dat jou taalgebruik vir die eerste paar dae van die week kan klink of jy maande lank op see tussen matrose was, of nog erger, in 'n seunskoshuis gebly het.Die ander kan klein goedjies soos haastigheid, ongehoorsaamheid en ongevoeligheid wees.Dit is baie meer as net tydelike buie, omdat dit vinnig 'n gevestigde deel van jou persoonlikheid kan word.Die ou sêding “wys my jou vriende en ek wys jou jou toekoms” is die reine waarheid. Dis ongelooflik hoe mens deur die mense en omstandighede om jou beïnvloed kan word. Een van die sterkste maniere waarop dít uitkom, is wanneer 'n trop-houding by 'n groep ontstaan.Dis wanneer jy jou eie etiese en morele waardes vir die oomblik opoffer om aan te pas by dié van die groep waarvan jy deel is.Dít kan óf baie goed uitwerk, óf baie sleg, en dikwels hang die rigting van die groep se besluite af van die een of twee lede met die grootse, erm, persoonlikheid. Hierdie persoonlikheid, afhangend van sy houding teenoor die res van die wêreld, kan die groep lei om óf in goeie óf gruwelike gees die wêreld in te stap.Die snaaksste van alles is dat dié verskynsel nie net in intieme sosiale omgewings 'n invloed het nie, maar ook uitkring na vriende, familielede of selfs vreemdelinge.Dit bring ons terug na die begin: Die invloed wat jy op jou kringetjie het, verdubbel, en kom dikwels in 'n baie groter mate na jou toe terug. Lang storie kort: Wees bedag op watse gees jy in die wêreld versprei.Dit groei en kan óf meer liefde óf meer haat die wêreld instuur.

Die lewe is 'n lied of 'n les

Kommentaar

Republikein 2025-07-07

Meld asseblief aan om kommentaar te lewer

Die lewe is 'n lied of 'n les

Kommentaar

Republikein 2025-07-07

Meld asseblief aan om kommentaar te lewer

MELD AAN

Advertensie