Die Kunenestreek

Dis hier!(Voeg kaart in)In ’n neutedopDie Kunenestreek is in die noordweste van die land geleë en spog met twee eiesoortige dele: Damaraland in die suidelike gebied, en Kaokoland in die noorde.Die streek word in ’n groot mate gekenmerk deur reuse-inselbergs (eilandberge) wat miljoene jaar gelede gevorm is. Daar is ook talle wildsoorte wat hier voorkom, insluitend leeus, luiperds, jagluiperds, hiënas, elande, koedoes, kameelperde, steenbokke, gemsbokke en springbokke. Die voëllewe is ewe ryk, met meer as 33 roofvoëls wat reeds in hierdie gebied opgeteken is. Die Kunenerivier is ’n standhoudende rivier wat spruit uit Angola se hooglande en teen die Namibiese grens vloei, deur wilde en droë bergreekse voordat dit uiteindelik die Atlantiese Oseaan bereik. Die rivierloop dek 'n verstommende kontras van landskappe, wat wissel van subtropiese plantegroei te midde van die klipbanke en boomlose vlaktes van die Kaokoland.Die bykans ontoeganklike area suid van die Kunenerivier, Kaokoland, is die tuiste van die Himba.Sien dít!• Die rooi sandsteenrotse by Twyfelfontein, waar daar meer as 2 500 rotstekeninge en -etse is, is tussen 2 000 en 6 000 jaar oud. Daar is ook baie klipartefakte en -gereedskap, volstruiseierdopkrale en pottebakkery wat tipies is van jagterversamelaars wat 10 000 jaar gelede daar gewoon het. Die besoekersentrum is in ’n interessante gebou gehuisves, en besoekers kan hier omvattende inligting bekom. Dit is in 2007 as Wêrelderfenisterrein verklaar. • Die Verbrande Berg is redelik naby Twyfelfontein geleë. Dit is sowat 200 miljoen jaar gelede gevorm.• Die Orrelpype, wat ook in dié omgewing geleë is, is beslis ’n besoek werd. Na beraming is dit tussen 130 en 250 miljoen jaar oud. Die beste tyd om die “orrelpype” af te neem wat tot 5 m hoog is, is laatmiddag wanneer die kwynende sonlig die kleur van die rots op sy mooiste laat lyk.• Die Vingerklip naby Khorixas. Dié monolitiese rots wat soos 'n vinger lyk, oorheers die landskap van die Ugab-terrasse tussen Outjo en Khorixas.• Ook naby Khorixas, in die Aba-Huabrivier, is die Versteende Woud waar talle versteende boomstompe voorkom. Dit is in die 1950's tot ’n nasionale monument verklaar en is vandag ook ’n nasionale erfenisterrein. Die versteende boomstompe is tussen 240 en 300 miljoen jaar oud is eintlik dryfhoutstompe wat deur 'n wes-vloeiende rivier meegesleur is en in sandbanke gedeponeer is. Oorblyfsels van sowat 50 bome kan nog gesien word. Eintlik is die stompe só goed bewaar, dit lyk skoon soos die Ware Jakob.• Hoewel dit moeilik is om daar te kom, is ’n besoek aan Epupa-valle die moeite werd. Dit is een van net ’n paar watervalle in die land. Hierdie diep kloof van 'n waterval met sy ryk gekleurde rotsmure en verskeidenheid bome – kremetart, wildevy en makalani-palms -, is waarskynlik een van die land se mooiste plekke. Oor sowat 1,5 km val die riviervlak byna 60 meter, terwyl dit in kanale verdeel en só rotspoele skep.• Hartmann se Vallei en Marienfluss is twee reuse-wildernisgebiede in die weste van Kaokoland wat ’n brose en dorre ekosisteem onderhou. Hoewel die Marienfluss meer toeganklik is, het Hartmann se Vallei ’n groter verskeidenheid fauna en flora.• Die Brandberg, hoewel dit tegnies gesproke in die Erongostreek val, is deel van Damaraland. Bo en behalwe die feit dat dit die hoogste bergspits in die land is, is dit ook die tuiste van die bekende “White Lady”-rotstekening.• By Fort Sesfontein gee ’n gaping in die berge toegang tot ’n kom waar ’n woestynoase gevorm is. • Die Ruacana-valle is 'n gewilde besienswaardigheid, hoewel daar nie altyd water vloei nie. Die personeel by die kragstasie is vriendelik en besoekers kan by die ingang vra of hulle 'n toer van die stasie mag onderneem. Ten einde die drie 80 megawatt turbines, transformators en skakelgerei van die stasie te akkommodeer, moes meer as 400 duisend kubieke meter rots langs die rivier verwyder word. Water van die Kunene word deur 'n reeks damme en 'n dwarsmuur gereguleer om deel van die vloei tot bo op die berg te kanaliseer. Wanneer dit ten volle operasioneel is, genereer die turbines sowat 240 megawatt krag.• 'n Hanetree van die kragsentrale is " Hippo Pool" wat deel is van die Otjipahuriro-kampterrein. Hier het die Himbas beeste geoffer om hul voorvaders te paai. Vandag kan gaste wakker word met die geluide van seekoeie, voëls en die nabygeleë Ruacana-valle. • Die Uukwaluudhi-bewaringsgebied is sowat 5 km oos van Omukange, 'n nedersetting wat op die kruising van die C41-pad na Opuwo en die C35-pad na Ruacana geleë is. Die gebied is 143 700 ha groot. Dit was die eerste bewaringsgebied wat in noordelike Namibië geproklameer is.• Wanneer jy op Outjo is, besoek gerus die Naulila-monument wat in 1933 opgerig is, en die Franke Haus-museum wat in 1899 gebou is en interessante items huisves. Die dorp beskik oor ’n paar plekke waar daar gepeusel en gesmul kan word.Moet dit nie misloop nie!• As jy gelukkig is, sal jy die woestynolifant sien. Hulle grondgebied strek oor 3 000 km², met diere wat tot 200 km trek op soek na water. Interessant genoeg, waar olifante in Etosha tussen 100 en 200 liter per dag drink, drink olifante in Kaokoland net elke drie of vier dae. Hulle eet ook veel minder en breek minder takke af. Dus is hulle veel minder vernietigend as ander olifante. Boonop is die Kunenestreek ook die enigste natuurlike tuiste van die swartrenoster.• As jy kan, besoek ’n Himba-tuiste. Hierdie tradisionele veeboere maak staat op hul geharde beeste en bokke vir oorlewing. Die mense self dra interessante tradisionele drag en hulle smeer bykans elke dag ’n laag bokvet en rooi modder op hul lywe wat as beskerming dien teen die fel hitte van die son.• ’n Riviervaart op die Kunene word aanbeveel. Verskeie lodges op die oewers van die rivier bied dié soort avonture aan.• Wees op die uitkyk vir die indrukwekkende Welwitschia. Daar is verskeie mooi voorbeelde van dié twee-blarige plant te sien.• As jy ’n kans kry, probeer om ’n vlug oor Epupa te doen. Asemrowend!• Die Hoanibrivier het die mooiste kloof by Khowareb geskep, wat tot 500 m diep en 23 km lank is. 4x4-entoesiaste met die nodige ervaring kan hierdie kloof in die droë seisoen aanpak.• ’n Paar kilometer buite die nedersetting van Warmquelle is die Ongongo-waterval. Hier stroom ’n klein waterval binne ’n natuurlike kom.

Die Kunenestreek

Kommentaar

Republikein 2026-05-12

Meld asseblief aan om kommentaar te lewer

Die Kunenestreek

Kommentaar

Republikein 2026-05-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.