Die donkie is 'n wonderlike ding

ETTEBAB skryf:

Dit gaan my verstand te bowe hoe ‘n nasie wat so gevorderd is in tegnologie, so bygelowig en primitief kan wees oor ander dinge.

‘n Mens sou verwag dat hulle verby daardie bygeloofstadium is. Hierdie is mense wat geboue kan bou wat aarbewings tot 'n mate kan weerstaan, maar hierdie selfde mense

leef in ander opsigte in die “donker eeue”.

Dat wat hulle voorheen, byvoorbeeld, van die renosterhorings geglo het, net in hulle koppe bestaan en nie ‘n werklikheid of feit is nie – dis net bygeloof – en vir ‘n mens se bygeloof, weens primitiewe denke word ‘n dierespesie uitgeroei.

En elke keer het die diere geen verweer teen die mens nie.

Nou is dit weer die edele, nederige donkie wat moet deurloop - ten spyte van alle ontwikkeling in die wêreld en orgaanoorplantings, ens., ens., het hulle net mooi niks geleer nie. Vir ons mense het ons donkies ‘n nog waardevolle plek in ons lewens.

Nou wil hulle in ons land kom aas – kyk maar wat het met Ramatex gebeur: wat het Ramatex vir ons land beteken en waarmee het dit ons gelaat?

‘n Fabriek wat nie was wat dit veronderstel was om te wees nie het ons gelaat met besoedeling tot by van ons damme.

Ramatex was geen finansiële voordeel vir Namibië nie. Inteendeel, dit het ‘n gemors gelaat vir Namibiërs om reg te probeer stel.

Daar word gedurig kapsie gemaak deur buitelanders as grondbesitters van Namibiese grond – nou wil hulle land besitreg aan die Chinese gee?

Maak nie saak na watter kant van ‘n geldstuk 'n mens kyk nie, dis nog steeds dieselfde geldstuk.

Die Chinese wil in ons land ons donkies kom slag en nog meer geleenthede skep vir bedrog, want is dit net dit, of gaan nog diere soos renosters en "pangolins" agter hierdie skerm benadeel word. Regulasies in plek, sal nou vir my gesê word – maar my vraag is: hoeveel “regulasies” het al hul agterent gesien as mense korrup wil wees.

Maar hier is ‘n ander sy van hoe ons ons donkies kan gebruik vir inkomste vir ons land, sonder om hulle dood te maak: donkiemelk en donkiemelkprodukte.

Donkiemelk is baie gesond en eerder dit kan ‘n onderneming wees, wat ook tot voordeel van die voeding van ons eie mense sal wees, veral vir jonger kinders.

Donkiemelkprodukte kan werk verskaf aan ons eie mense en vir hulle deure oopmaak.

Gaan in op die Internet en kyk maar net op die oomblik hoe beskeie onderneming die donkies ‘n ander opsie in die lewe gee.

Besoek byvoorbeeld die webtuiste van “The Donkey Dairy, Randfontein”.

In Italië is daar ook ‘n persoon, Giuseppe Borghi, wat meer in donkies gesien het as doodmaak - dit sal ook opkom op die skerm as die “Donkey Dairy” opgekyk word.

Ons en ons regering moet regtig elke saak goed deurdink. Ons moet nie vaskyk in “money, money, money” nie en dan op die einde van die dag vir onsself ‘n doringlat pluk wat ons seer slaan nie.

Die Engelse spreekwoord "prevention is better than cure" kom sterk na vore.

As die Chinese iets vir Namibië wil beteken, help ons dan liewer met “recycle” – gee dan liewer vir ons ‘n fabriek/onderneming waar daar van afvalmateriaal nuwe produkte gemaak kan word sonder om ons land te besoedel. Skep vir ons mense werk teen ‘n ordentlike salaris. Dit kan vir Namibië ‘n moontlikheid van uitvoere bring.

Dit natuurlik nadat die voor- en nadele van so ‘n onderneming goed ondersoek is.