Diamantliga: Vetter en Bromell baas
Atletiek
Wim Pretorius – Johannes Vetter het sy beste vir laaste gelos om 'n eerste oorwinning op 'n Diamantliga-byeenkoms in twee jaar te behaal.
Met net tien dae oor voor die Olimpiese Spele se openingseremonie, was Gateshead in Brittanje Dinsdagaand die bestemming vir van die hoopvolles om vir oulaas te slyp voordat hulle na Tokio vertrek.
Die Duitse spiesgooier, wat vanjaar al 96,29 m gegooi het, het geweldig gesukkel om sy ritme te vind en het nie eens naby sy beste afstande van die jaar gekom nie, maar het in die sesde en laaste ronde diep gedelf om met 85,25 m met die louere weg te stap.
Vir vier van die eerste vyf rondes was hy egter in die tweede plek met 2012 se Olimpiese kampioen, Keshorn Walcott van Trinidad en Tobago, se 82,81 m wat 'n groot bedreiging was.
Die spiesgooi was onderhewig aan die omstrede “laaste drie”-reël waarvolgens die wenner bepaal word deurdat die voorste drie atlete ná vyf rondes aan 'n sesde ronde deelneem, met dié uitslag wat bepaal hoe die volgorde van die podium lyk.
Walcott kon hier net 76,74 m vermag, met nóg 'n Duitser, Julian Weber, se 77,16 m wat aan hom die tweede plek besorg het, ten spyte daarvan dat sy beste poging by 81,07 m geland het.
Die vinnigste man oor 100 m in 2021, Trayvon Bromell, het vergoed vir sy teleurstelling in Monaco waar sy Amerikaanse landgenoot Ronnie Baker die kollig gesteel het.
Dié slag was Bromell baas in 9.98. Hy was die enigste wat onder 10 sekondes kon inklok met die Britte, Chijindu Ujah en Zharnel Hughes, wat onderskeidelik tweede en derde was in 10.10 en 10.13.
Bromell het reeds vanjaar dié afstand in 9.77 voltooi.
Die Nederlander Femke Bol het in die 400 m-hekkies met groot gemak tot haar vierde Diamantliga-oorwinning in vier pogings genael.
Haar wentyd van 53.24 was byna 'n sekonde stadiger as haar seisoenbeste van 52.37, die vierde vinnigste tyd in die geskiedenis, maar Bol het steeds sonder veel moeite met die Amerikaner Shamier Little afgereken (54.53), met die Jamaikaan Janieve Russell derde (54.66).
Soos verwag het Elaine Thompson-Herah in die 200 m te veel skietgoed vir haar teenstanders gehad (22.43).
Die verrassing was dat die Brit Jodie Williams naasbeste was in 22.60 en in die proses naelskraap vir Nigerië se Blessing Okagbare geklop het (derde in 22.61).
Pedro Pichardo van Portugal, tans die voorste atleet ter wêreld in die driesprong, het sy uitstekende peil voortgesit met nog 'n seëvierende vertoning.
Die driesprong is ook onderhewig aan die sogenaamde “laaste drie”-reël.
Gelukkig was Pichardo se eerste sprong van 17,29 m genoeg om hom in die voorste plek te hou, tot só mate dat die enigste ander poging wat hy geneem het, die sesde en laaste ronde was. Hier het hy met 17,50 m verder gegaan om te wen.
In die 110 hekkies het die Statebondkampioen, Ronald Levy, sy landgenoot van Jamaika, die verdedigende Olimpiese kampioen Omar McLeod, ore aangesit op pad na sy oorwinning in 13.22. Dit was dubbele glorie vir die Karibiese atlete met McLeod se tweede plek in 13.42.
– Netwerk24
Met net tien dae oor voor die Olimpiese Spele se openingseremonie, was Gateshead in Brittanje Dinsdagaand die bestemming vir van die hoopvolles om vir oulaas te slyp voordat hulle na Tokio vertrek.
Die Duitse spiesgooier, wat vanjaar al 96,29 m gegooi het, het geweldig gesukkel om sy ritme te vind en het nie eens naby sy beste afstande van die jaar gekom nie, maar het in die sesde en laaste ronde diep gedelf om met 85,25 m met die louere weg te stap.
Vir vier van die eerste vyf rondes was hy egter in die tweede plek met 2012 se Olimpiese kampioen, Keshorn Walcott van Trinidad en Tobago, se 82,81 m wat 'n groot bedreiging was.
Die spiesgooi was onderhewig aan die omstrede “laaste drie”-reël waarvolgens die wenner bepaal word deurdat die voorste drie atlete ná vyf rondes aan 'n sesde ronde deelneem, met dié uitslag wat bepaal hoe die volgorde van die podium lyk.
Walcott kon hier net 76,74 m vermag, met nóg 'n Duitser, Julian Weber, se 77,16 m wat aan hom die tweede plek besorg het, ten spyte daarvan dat sy beste poging by 81,07 m geland het.
Die vinnigste man oor 100 m in 2021, Trayvon Bromell, het vergoed vir sy teleurstelling in Monaco waar sy Amerikaanse landgenoot Ronnie Baker die kollig gesteel het.
Dié slag was Bromell baas in 9.98. Hy was die enigste wat onder 10 sekondes kon inklok met die Britte, Chijindu Ujah en Zharnel Hughes, wat onderskeidelik tweede en derde was in 10.10 en 10.13.
Bromell het reeds vanjaar dié afstand in 9.77 voltooi.
Die Nederlander Femke Bol het in die 400 m-hekkies met groot gemak tot haar vierde Diamantliga-oorwinning in vier pogings genael.
Haar wentyd van 53.24 was byna 'n sekonde stadiger as haar seisoenbeste van 52.37, die vierde vinnigste tyd in die geskiedenis, maar Bol het steeds sonder veel moeite met die Amerikaner Shamier Little afgereken (54.53), met die Jamaikaan Janieve Russell derde (54.66).
Soos verwag het Elaine Thompson-Herah in die 200 m te veel skietgoed vir haar teenstanders gehad (22.43).
Die verrassing was dat die Brit Jodie Williams naasbeste was in 22.60 en in die proses naelskraap vir Nigerië se Blessing Okagbare geklop het (derde in 22.61).
Pedro Pichardo van Portugal, tans die voorste atleet ter wêreld in die driesprong, het sy uitstekende peil voortgesit met nog 'n seëvierende vertoning.
Die driesprong is ook onderhewig aan die sogenaamde “laaste drie”-reël.
Gelukkig was Pichardo se eerste sprong van 17,29 m genoeg om hom in die voorste plek te hou, tot só mate dat die enigste ander poging wat hy geneem het, die sesde en laaste ronde was. Hier het hy met 17,50 m verder gegaan om te wen.
In die 110 hekkies het die Statebondkampioen, Ronald Levy, sy landgenoot van Jamaika, die verdedigende Olimpiese kampioen Omar McLeod, ore aangesit op pad na sy oorwinning in 13.22. Dit was dubbele glorie vir die Karibiese atlete met McLeod se tweede plek in 13.42.
– Netwerk24
Kommentaar
Republikein
Geen kommentaar is op hierdie artikel gelaat nie