Dié Griessel-dossier ’n klein meesterstuk

Francois Bekker - In dié jongste Griessel-dossier word muse en motief ’n naelbytleesversnit wat twee kontinente en ’n paar eeue oorspan.Soos daar agter elke kunswerk ’n muse is, is daar agter elke misdaad ’n motief.Die inspirasie vir hierdie novelle is ’n noemenswaardige erkenning aan Deon Meyer in die vorm van ’n geleentheid wat aan hom gebied is om ’n spanningsverhaal vir ’n belangrike literêre projek, die 2017 Spannende Boekeweek in Nederland, te skryf.Die resultaat is ’n Bennie Griessel-dossier van net oor die 120 bladsye. Muse en motief word hier ’n naelbytleesversnit wat twee kontinente en ’n paar eeue oorspan.Nog ’n dag in die sonnige Suid-Afrika, nog ’n lyk wat die polisie se aandag vereis.’n Misdaadtoneel met feitlik geen leidrade nie. Dis ’n toneel wat ironies genoeg soos ’n skildery lyk. Net die raam skort. Maar selfs die afwesigheid van leidrade sê ook iets. En omdat die vrou se lyk, asof sy uitgestal oor ’n muurtjie op Sir Lowryspas agtergelaat is, internasionale aandag kan ontlok, word die Valke se Eenheid vir Ernstige Geweldsmisdaad by die saak betrek. Wat beteken dat kaptein Bennie Griessel en sy kollega Vaughn Cupido in die volgende paar dae baie besig gaan wees.Dit gebeur juis op ’n tyd wanneer Bennie nou regtig die skoot hoog deur het met planne om sy verhouding met Alexa na die volgende vlak te neem. Dís nou as hy sy geldsake in orde kan kry.Elders in die wêreld naby die Nederlandse dorp Delft, slaan iemand op die vlug met manne wat bloed ruik op sy spoor. Wegkomkans blyk daar nie te wees nie.Dat Afrikaanse spanningsfiksie ’n ongekende bloeitydperk beleef, is gewis. ’n Mens kry egter die gevoel dat die Deon Meyer-fenomeen ’n standaard is waarmee ander skryfwerk in hierdie genre beoordeel word. Die Vrou in die Blou Mantel bevestig waarom Meyer hoog aangeslaan word. Daar is verskeie aspekte, veral wat karakterisering betref, wat Meyer se werk van dié van die meeste ander spanningskrywers onderskei.Dis ’n raaiselverhaal waar muse en motief sorg vir ’n meesterstuk in die kleine.Navorsing verleen eweneens geloofwaardigheid aan Meyer se skryfwerk. Om te weet hoe pandjieswinkels binne lyk. Om die sleur van polisiewerk getrou weer te gee. Wetlike aspekte in gedagte te hou. En ’n verpolitiseerde sisteem waarbinne geregsdienaars moet werk.In hierdie novelle kom daar ook ’n hoogs onderhoudende blik op die internasionale kunsgemeenskap aan die bod. En die monetêre waarde wat aan kuns geheg word. Verstommend van hierdie verhaal is dat die voorskriftelike formaat waarbinne Meyer moes werk nie sy vermoë om ’n boeiende storie te vertel, belemmer het nie.Verder troef Meyer die beperkte vertelruimte om wonder bo wonder ’n wye doek te span wat ’n Kaapse speurspan op die spoor van ’n eeueoue internasionale kunsmeesterstuk bring en mense wat estetiese, geldgierige of eksistensiële waardes daaraan heg.Waaroor ek wel kopkrap, met apologie aan Meyer wat die treffende foto geneem het, is die boek se omslagfoto. Vir hierdie leser behoort die omslagontwerp, titel en tema ’n eenheid te vorm. Jammer, maar hierdie dorre landskaptoneel sluit nie tematies sterk genoeg by die storie aan nie.Die Vrou in die Blou Mantel deur Deon Meyer. Misdaadfiksie. Uitgewer: Human & Rosseau. Prys: R190.

Dié Griessel-dossier ’n klein meesterstuk

Kommentaar

Republikein 2025-07-16

Meld asseblief aan om kommentaar te lewer

Dié Griessel-dossier ’n klein meesterstuk

Kommentaar

Republikein 2025-07-16

Meld asseblief aan om kommentaar te lewer

MELD AAN

Advertensie