Dié Disney-flieks verdien miljarde in 'n enkele jaar

Elvira Wood - 'n Perd wat uit water gemaak is, speelgoed wat 'n nuwe avontuur beleef het en superhelde wat die heelal van vernietiging spaar, het vir Disney bykans US$10 miljard verdien.Soos sake tans staan, gaan 2019 die eerste jaar tot dusver wees dat enige filmvervaardiger sewe rolprente in 'n enkele jaar uitgereik het wat elkeen meer as $1 miljard by die wêreldwye loket verdien het.Dié prestasie staan soveel te meer uit aangesien net twee ander rolprentvervaardigers dit in 2019 kon regkry om elk 'n enkele rolprent uit te reik wat dié kerf oorskry het.Dit was Sony se Spider-Man: Far From Home, wat luidens Box Office Mojo US$1,13 miljard by die loket verdien het en Warner Brothers se Joker met US$1,06 miljard.Die groot geldmakers in 2019 vir Disney was:7. Star Wars: The Rise of SkywalkerDié laaste episode van dié wetenskapfiksiereeks is net voor Kersfees uitgereik. Hoewel dit nié so goed by die loket gevaar het as wat gehoop is nie, het hy teen 1 Januarie reeds US$918 miljoen verdien. Die verwagting is dus dat verdienste uit dié rolprent binnekort ook die US$1 miljard-merk sal oorskry.6. AladdinDié rolprent, met die akteur Will Smith as die towergees, het US$1,05 miljard by die loket verdien. Disney het die rolprent wat oorspronklik in 1992 as animasierolprent uitgereik is, nuwe lewe gegee met ware akteurs wat die onderskeie rolle speel.5. Toy Story 4Die vierde episode van die avonture van 'n groep speelgoed is een van twee animasierolprente wat vir Disney meer as US$1 miljard by die loket verdien het. Sy verdienste was net bó dié kerf met US$1,07 miljard.Dit is beduidend meer as die eerste Toy Story, wat in 1996 US$373,5 miljoen by die loket verdien het. Wanneer dit vir inflasie aangepas word, sou dit sowat US$616 miljoen in 2019 wees.4. Captain MarvelDie eerste van twee rolprente wat Disney in 2019 uitgereik het met superhelde wat die heelal red, het US$1,13 miljard by die loket verdien.3. Frozen IIMiljoene ouers wêreldwyd was waarskynlik baie minder opgewonde oor dié tweede avontuur van Elsa, Anna, Christoph, Sven en Olaf die sneeuman. Dit het hulle egter nie gekeer om die kleingoed te vat om die rolprent te kyk nie. Frozen II is met sy wêreldwye inkomste van US$1,32 miljard die top-animasierolprent van alle tye.Vorige rekordhouers was die oorspronklike Frozen, wat in 2013 uitgereik is en wat US$1,28 miljard gemaak het, en die animasieweergawe van The Lion King, wat US$763 miljard by die loket verdien het. 2. The Lion KingDie nuutste weergawe van dié geliefde rolprent het US$1,65 miljard vir Disney by die loket verdien.Hoewel die nuutste weergawe van dié bekende animasierolprent nie “ware akteurs” gebruik nie, klassifiseer Disney dit self nié as 'n animasierolprent nie. Die rolprent gebruik virtuele realiteit om 'n produk te skep wat in geheel deur rekenaars gegeneer is, maar wat lyk asof dit ware “akteurs” en “stelle” gebruik.1. Avengers: End GameDié rolprent met sy superhelde was die enigste rolprent in 2019 wat meer as US$2 miljard verdien het. Die laaste aflewering in dié reeks het vir Disney US$2,8 miljard by die loket verdien.* Alle verdienste soos aangedui op Box Office Mojo.– Netwerk24

Dié Disney-flieks verdien miljarde in 'n enkele jaar

Kommentaar

Republikein 2025-06-18

Meld asseblief aan om kommentaar te lewer

Dié Disney-flieks verdien miljarde in 'n enkele jaar

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie