Deurbraak teen 'veediefstalsindikaat'
Boere rondom Okahandja het die afgelope maande tot 200 beeste aan ’n vermeende veediefstalsindikaat verloor wat glo vanaf ’n hervestigingsplaas bedryf word.
Elvira Hattingh
Die polisie, in samewerking met private teenstropingseenhede en streekwagte, is warm op die spoor van 'n vermeende veediefstalsindikaat op die Gross Barmen-Okahandja-pad.
Dit volg nadat twee mense sedert verlede Donderdag op die hervestigingsplaas Rüdenau-Nord in dié omgewing in hegtenis geneem is, van wie een glo 'n werknemer
van NamWater is en ook die hoofverdagte.
Mnr. Butzi Kühne, ondervoorsitter van Karibib se streekwag, sê die Namibiese polisie, die teenstropingseenhede van Okahandja en Karibib asook laasgenoemde se streekwag werk tans saam om lede van 'n “veediefstalnetwerk” vas te trek.
'n Voorlopige ondersoek dui daarop dat gesteelde vee se brandmerke verwyder word, waarná hulle iewers weggesteek word tot die wonde gesond raak.
Oor gerugte dat die gesteelde vee onder meer by die Swakoppoort- en Omatakodam weggesteek word, sê Kühne: “Dié word nog ondersoek; ons kan nog nie met sekerheid sê nie. Ons voetverkenners is tans besig om die gebied by Swakoppoortdam te verken.”
Hy sê die gebied is groot en die terrein onbegaanbaar. “Nadat ons Donderdag begin toeslaan het, sien ons nou tekens dat die beeste oornag 'wegraak' of verskuif word. Ons hoop om dringend hulp in die vorm van 'n helikopter in te kry, want dit is al hoe ons 'n houvas op die situasie sal kan kry,” het hy gesê.
Hy sê een van die betrokkenes het wel oor 'n NamWater-voertuig asook sleutels vir toegang tot die damme beskik.
“Ons vermoed hierdie is 'n groot netwerk. Ons het afgekom op beeste met wie se brandmerke erg gepeuter is.
“Die stuk vel met die brandmerke op is met 'n mes uitgesny. Vermoedelik word die beeste weggesteek tot dié wond genees en dan word 'n nuwe brandmerk gemaak. Anders is
daar met bestaande brandmerke gepeuter.
“Dit, op sigself, is onwettig; jy mag nie met 'n brand peuter nie. As jy 'n bees koop, moet jy die brandmerk elders maak – daar is ses voorgeskrewe plekke waar beeste dié brandmerke kan kry.
“Die diewe se werkwyse is ook baie wreed,” het Kühne gesê.
Kühne meen die netwerk van veediewe opereer waarskynlik al vir jare. “Ons vermoed net oor die afgelope drie maande is minstens 200 beeste in die omgewing van Rüdenau-Nord gesteel.
“Een van die boere in die omgewing sê hy het reeds meer as 130 beeste verloor; nog een het 60 beeste in die laaste twee maande verloor en 'n derde het 30 verloor,” sê Kühne.
Kühne sê die Karibib-streekwag is reeds wyd bekend vir hul baanbrekerswerk teen stroping en veediefstal, maar word beperk omdat hulle grootliks alles uit hul eie sakke moet doen. “Ons het 'n sterk behoefte aan finansiële steun; ons private voertuie loop deur,” het hy gesê.
NAMWATER
NamWater se woordvoerder, mnr. Johannes Shigwedha, het op navrae gesê hulle is nie in 'n posisie om hulle oor die vermeende oortredings deur die NamWater-werknemer uit te laat nie.
“Die saak is nou by die polisie. Ek wil dit net op rekord stel dat daar nie van 'n NamWater-voertuig gebruik gemaak is tydens die misdade nie,” het hy gesê.
ONUITHOUDBAAR
Mnr. Hakkies Husselman, wat naby Rüdenau-Nord in die Gross Barmen-omgewing boer, sê die situasie met vee- en wilddiefstal in hul omgewing is onuithoudbaar.
“Ons word bankrot gesteel. Sowat 25 van my Persieskape is twee maande gelede gesteel. Dit is skade van nagenoeg N$60 000, als op een slag weg.
“Toe ons agterkom die skape is weg, het ons die spoor gevolg en die volgende dag op die diewe afgekom waar hulle die skape sommer so langs die pad gesit en slag het.
“Ons praat ook nie eens van die wild wat gestroop word nie. Hier is nie 'n enkele gemsbok meer oor nie,” het Husselman gesê.
Hy sê een van die boere in die omgewing het nou al 'n permanente wag aangestel om die pad te patrolleer.
Husselman sê die omgewing is 'n paradys vir stropers en veediewe, want daar is nie 'n padblokkade nie en dit is maklik om gesteelde of geslagte diere op te laai en net eenvoudig te verdwyn.
“Ons bel ook nie meer die polisie nie. Daar is altyd verskonings waarom hulle nie kan uitkom nie – soos byvoorbeeld dat hulle nie 'n kar het nie of besig is om 'n ander saak te ondersoek. Al kom hulle uit, kom daar niks van nie.
“As die diewe nie op heterdaad betrap word en teenstropingseenhede bring die polisie saam met hulle uit nie, gebeur niks nie.
“Al word veediewe gevang, kom hulle in elk geval net daarna weer op borgtog uit.
“Jy as boer kan niks doen nie; jy kan ook nie optree teen die diewe nie. Jy moet aanvaar jy boer vir die samelewing en jy sal kort-kort jou vee verloor,” het Husselman gesê.
Husselman sê hy is ook bekommerd oor sy gesin se veiligheid. “Ek hoop dit gebeur nooit dat ons lewens bedreig word en dat ek enige mens uit selfverdediging moet skiet nie. Ek wil nooit enige ander mens moet skiet nie.
“Die realiteit is ook, sou jy iemand skiet, gaan jy dadelik tronk toe en daar word eers later besluit of jy skuldig of onskuldig is.
“Die wet beskerm die misdadiger en ons wat 'n eerlike bestaan probeer maak, belasting betaal en werk aan ander mense verskaf, ons betaal die prys.”
- [email protected]
Die polisie, in samewerking met private teenstropingseenhede en streekwagte, is warm op die spoor van 'n vermeende veediefstalsindikaat op die Gross Barmen-Okahandja-pad.
Dit volg nadat twee mense sedert verlede Donderdag op die hervestigingsplaas Rüdenau-Nord in dié omgewing in hegtenis geneem is, van wie een glo 'n werknemer
van NamWater is en ook die hoofverdagte.
Mnr. Butzi Kühne, ondervoorsitter van Karibib se streekwag, sê die Namibiese polisie, die teenstropingseenhede van Okahandja en Karibib asook laasgenoemde se streekwag werk tans saam om lede van 'n “veediefstalnetwerk” vas te trek.
'n Voorlopige ondersoek dui daarop dat gesteelde vee se brandmerke verwyder word, waarná hulle iewers weggesteek word tot die wonde gesond raak.
Oor gerugte dat die gesteelde vee onder meer by die Swakoppoort- en Omatakodam weggesteek word, sê Kühne: “Dié word nog ondersoek; ons kan nog nie met sekerheid sê nie. Ons voetverkenners is tans besig om die gebied by Swakoppoortdam te verken.”
Hy sê die gebied is groot en die terrein onbegaanbaar. “Nadat ons Donderdag begin toeslaan het, sien ons nou tekens dat die beeste oornag 'wegraak' of verskuif word. Ons hoop om dringend hulp in die vorm van 'n helikopter in te kry, want dit is al hoe ons 'n houvas op die situasie sal kan kry,” het hy gesê.
Hy sê een van die betrokkenes het wel oor 'n NamWater-voertuig asook sleutels vir toegang tot die damme beskik.
“Ons vermoed hierdie is 'n groot netwerk. Ons het afgekom op beeste met wie se brandmerke erg gepeuter is.
“Die stuk vel met die brandmerke op is met 'n mes uitgesny. Vermoedelik word die beeste weggesteek tot dié wond genees en dan word 'n nuwe brandmerk gemaak. Anders is
daar met bestaande brandmerke gepeuter.
“Dit, op sigself, is onwettig; jy mag nie met 'n brand peuter nie. As jy 'n bees koop, moet jy die brandmerk elders maak – daar is ses voorgeskrewe plekke waar beeste dié brandmerke kan kry.
“Die diewe se werkwyse is ook baie wreed,” het Kühne gesê.
Kühne meen die netwerk van veediewe opereer waarskynlik al vir jare. “Ons vermoed net oor die afgelope drie maande is minstens 200 beeste in die omgewing van Rüdenau-Nord gesteel.
“Een van die boere in die omgewing sê hy het reeds meer as 130 beeste verloor; nog een het 60 beeste in die laaste twee maande verloor en 'n derde het 30 verloor,” sê Kühne.
Kühne sê die Karibib-streekwag is reeds wyd bekend vir hul baanbrekerswerk teen stroping en veediefstal, maar word beperk omdat hulle grootliks alles uit hul eie sakke moet doen. “Ons het 'n sterk behoefte aan finansiële steun; ons private voertuie loop deur,” het hy gesê.
NAMWATER
NamWater se woordvoerder, mnr. Johannes Shigwedha, het op navrae gesê hulle is nie in 'n posisie om hulle oor die vermeende oortredings deur die NamWater-werknemer uit te laat nie.
“Die saak is nou by die polisie. Ek wil dit net op rekord stel dat daar nie van 'n NamWater-voertuig gebruik gemaak is tydens die misdade nie,” het hy gesê.
ONUITHOUDBAAR
Mnr. Hakkies Husselman, wat naby Rüdenau-Nord in die Gross Barmen-omgewing boer, sê die situasie met vee- en wilddiefstal in hul omgewing is onuithoudbaar.
“Ons word bankrot gesteel. Sowat 25 van my Persieskape is twee maande gelede gesteel. Dit is skade van nagenoeg N$60 000, als op een slag weg.
“Toe ons agterkom die skape is weg, het ons die spoor gevolg en die volgende dag op die diewe afgekom waar hulle die skape sommer so langs die pad gesit en slag het.
“Ons praat ook nie eens van die wild wat gestroop word nie. Hier is nie 'n enkele gemsbok meer oor nie,” het Husselman gesê.
Hy sê een van die boere in die omgewing het nou al 'n permanente wag aangestel om die pad te patrolleer.
Husselman sê die omgewing is 'n paradys vir stropers en veediewe, want daar is nie 'n padblokkade nie en dit is maklik om gesteelde of geslagte diere op te laai en net eenvoudig te verdwyn.
“Ons bel ook nie meer die polisie nie. Daar is altyd verskonings waarom hulle nie kan uitkom nie – soos byvoorbeeld dat hulle nie 'n kar het nie of besig is om 'n ander saak te ondersoek. Al kom hulle uit, kom daar niks van nie.
“As die diewe nie op heterdaad betrap word en teenstropingseenhede bring die polisie saam met hulle uit nie, gebeur niks nie.
“Al word veediewe gevang, kom hulle in elk geval net daarna weer op borgtog uit.
“Jy as boer kan niks doen nie; jy kan ook nie optree teen die diewe nie. Jy moet aanvaar jy boer vir die samelewing en jy sal kort-kort jou vee verloor,” het Husselman gesê.
Husselman sê hy is ook bekommerd oor sy gesin se veiligheid. “Ek hoop dit gebeur nooit dat ons lewens bedreig word en dat ek enige mens uit selfverdediging moet skiet nie. Ek wil nooit enige ander mens moet skiet nie.
“Die realiteit is ook, sou jy iemand skiet, gaan jy dadelik tronk toe en daar word eers later besluit of jy skuldig of onskuldig is.
“Die wet beskerm die misdadiger en ons wat 'n eerlike bestaan probeer maak, belasting betaal en werk aan ander mense verskaf, ons betaal die prys.”
- [email protected]
Kommentaar
Republikein
Geen kommentaar is op hierdie artikel gelaat nie