Derek Wright sterf

Elvira Hattingh - Mnr. Derek Wright (75), ‘n man wat diep spore in die landbou-, asook die plaaslike pensioenbedryf getrap het, is Sondagaand aan vermoedelik ‘n hartaanval oorlede.Wright was onder meer ’n voormalige voorsitter van die Namibië Landbou-unie (NLU), die Landbouwerkgewersvereniging (LWV), asook van pensioenfondse soos NamPro.Hy word deur prominente figure in die landboubedryf onthou as ‘n ware heer, en ‘n kalm, gemoedelike man wat weldeurdagte besluite geneem het.“Die nuus oor my pa se dood is baie onverwags en is vir ons ‘n skok. Hy was tydens sy dood op ‘n bootreis op die Baltiese See. Die boot sou onder meer by Noorweë, Swede, Finland en Rusland aandoen,” het sy seun Royston gister aan Republikein gesê.“Ons vermoed hy het ‘n hartaanval gehad, maar ‘n volledige nadoodse ondersoek sal gedoen word sodra die boot by St. Petersburg aan wal kom. Tans weet ons maar min, ook nie presies waar die boot was toe hy gesterf het nie.”Royston sê sedert sy ma enkele jare gelede aan kanker oorlede is, het sy pa agteruitgegaan. “My pa was vir beide my en my ma ‘n groot steunpilaar. Hy was ‘n hardegat ou, maar hy het sy oomblikke gehad en was baie besorg oor ons.“Wat my die meeste van hom opgeval het, was hoe mooi hy na my ma tydens haar siekte gekyk het en dat hy altyd al die familielede in gedagte probeer hou het.”Royston het die afgelope jare saam met sy pa op hul plaas Okatjeru in die Khomasstreek geboer. “My pa was baie professioneel en ‘n baie goeie werkgewer vir sy plaaswerkers. Ek weet nie of hy my regterhand op die plaas was en of ek syne was nie, maar ons het lekker saamgeboer. Hy het die beeste hanteer en ek die wild- en jagbedryf.”Royston sê hulle beplan om sy pa en ma se as te meng en op die plaas te strooi. VOORSITTER VAN LWV, NLUIn die landboubedryf word Wright deur mnr. Danie van Vuuren, hoofbeampte van die Landbouwerkgewersvereniging (LWV), as ‘n ware heer en iemand wat instrumenteel was in die totstandkoming van die Maatskaplike Voorsorgfonds (SSC) se nasionale pensioenfonds onthou. “Hy was ook van 2008 tot 2011 voorsitter van die LWV. Sy afsterwe is vir ons ‘n groot verlies,” het Van Vuuren gesê. Wright was ook vir drie jaar lank, van 2012 tot 2015, president van die NLU. Hy het egter die tuig neergelê sodat hy sy vrou, wat toe ernstig siek was, beter kon versorg.Mnr. Ryno van der Merwe, huidige NLU-president, sê Wright se afsterwe is ook vir hulle ‘n skok.“Wright was sterk betrokke by nasionale landboubedrywighede en daarvoor wil ons hulde aan hom bring. Ons sal hom as ‘n baie gemoedelike, kalm mens, wat nie emosioneel geraak het nie, onthou. Hy het weldeurdagte besluite geneem, ‘n saak goed beredeneer en ‘n mens kans gegee om te praat.”

Derek Wright sterf

Kommentaar

Republikein 2025-08-06

Meld asseblief aan om kommentaar te lewer

Derek Wright sterf

Kommentaar

Republikein 2025-08-06

Meld asseblief aan om kommentaar te lewer

MELD AAN

Advertensie