Datakoste ondersoek

Ebrahim Patel, minister van ekonomiese ontwikkeling in Suid-Afrika, het dataverskaffers versoek om nie eers vir die uitslag van die Mededingingskommissie se beplande markondersoek na datapryse te wag voordat hulle hul pryse verlaag nie.Patel het dié versoek gerig in 'n geskrewe parlementêre antwoord wat Donderdag uitgereik is nadat dr. Michael Cardo, DA-LP, by hom wou weet wat die opdrag en tydsraamwerk is vir die Mededingingskommissie se beoogde markondersoek wat Patel op 25 Mei in sy begrotingsrede aangekondig het.Patel het in sy antwoord gesê die sentrale rol wat telekommunikasiedienste in moderne ekonomieë speel, beteken dat hoë datapryse 'n groot, negatiewe impak op ekonomiese prestasie, produktiwiteit, toegang en innovering kan hê, en dus ook op ekonomiese groei en werkskepping.Volgens hom is dit waarom regeringsbeleid ook die belangrikheid van hierdie sektor erken.“Die Vierde Industriële Revolusie sal ook steun op goedkoop en naatlose konnektiwiteit teen mededingende pryse.“Daar is egter 'n wye reeks bewyse wat toon dat datapryse in Suid-Afrika hoër is as wat dit kan wees.”Volgens Patel is dit om dié redes dat hy die Mededingingskommissie versoek het om 'n markondersoek in dié sektor te doen.Die kommissie sal volgens Patel die ondersoek en volledige verwysingsraamwerk teen 1 September aankondig. Die publiek sal ook uitgenooi word om daaraan deel te neem.Die ondersoek sal na verwagting teen 31 Augustus 2018 afgehandel wees.Die ondersoek sal onder meer:• Die datadiens-waardeketting en sy verhouding met ander dele van die inligting- en kommunikasietegnologie-sektor en die breër ekonomie probeer vasstel;• Suid-Afrika se datapryse met dié van ander lande vergelyk;• Vasstel of dataverskaffing se gehalte en dekking aan internasionale standaarde voldoen, en met die land se ontwikkelingsbehoeftes strook;• Die stand van die mark vir die verskaffing van data assesseer;• By die regering aanbeveel hoe die datamark meer mededingend en inklusief gemaak kan word; en• By die sektor se reguleerder aanbevelings doen oor die mededingende impak van die regulatoriese raamwerk en enige wysigings daaraan.Patel het verder in sy antwoord gesê hoë datapryse benadeel veral die land se jeugdiges, wat grootmaat-verbruikers van data is.“Dit raak ook verbruikers in die algemeen, sowel as ondernemings in 'n ekonomie wat toenemend gekonnekteerd raak en op inligting- en kommunikasie-tegnologieë vertrou.”Volgens Patel kan hoë datapryse ook 'n digitale kloof in die samelewing veroorsaak.“Ek versoek verskaffers van data om die koste dringend te verminder sonder om te wag op die uitslag van die markondersoek,” het Patel in sy antwoord gepleit. – Netwerk24

Datakoste ondersoek

Kommentaar

Republikein 2025-12-16

Meld asseblief aan om kommentaar te lewer

Datakoste ondersoek

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.