Dankie, 2021, en welkom, 2022

Elizabeth Joseph – Die jaar 2021 was baie dinge. Ek kan nie eens glo hoeveel trane ek gestort het nie – en nie altyd net hartseer trane nie, maar ook trane van blydskap. Dit het soms gevoel hoe meer ek verloor het, hoe meer seëninge het ek ontvang.Jy kan seker sê dit is die silwer randjie rondom die donker, donker wolke wat bo-oor my gehang het. Toe Namibia Media Holdings (NMH) my na Keetmanshoop in die verre suide van die land gestuur het, het ek soveel emosies ervaar wat gewissel het van vrees tot opgewondenheid. Ek is nog altyd ’n baie onafhanklike persoon en ek was nie noodwendig bekommerd oor myself nie, maar eerder oor die gehalte van my werk – die Suide is immers veel kleiner as Windhoek en nuus is skaars. Ek het vinnig besef dis nogal ’n uitdaging om op jou eie in ’n ander dorp te wees, veral omdat jy niemand ken nie en niemand jóú ken nie. Ek het egter bande gevorm wat ek vir altyd sal koester en mense ontmoet wat my aanvaar het vir wie ek is (of soms nie was nie). Mense wat my ondersteun het en liefgehad het, saam met my gelag en gehuil het en vir my gewys het wat familie is. Ek het myself beter leer ken en goeie dinge en mense in my lewe toegelaat.Gedurende my tyd in Keetmanshoop het ek ook liefde gevind en alhoewel ons soveel bygekry het terwyl ons saam was, het ons ook groot verliese gely. Ek het vir die eerste keer begin verstaan wat dit beteken om ’n grootmens te wees.Stel jou voor: om van 24/7 onder iemand se waaksame oog te werk, tot om spertye in die gemak van jou bed te jaag terwyl jy ook jou wasgoed was. Rof!Met dít gesê – ja, ek weet ek het gewig opgetel. Dit was letterlik die eerste ding wat almal vir my sou sê toe hulle my hierdie jaar weer in Windhoek begin raakloop het. Verwag jy regtig dat iemand presies moet lyk soos hulle ’n jaar en drie maande gelede gelyk het? Asseblief.Die volgende keer wat jy my sien, sê net “Welkom terug”, want ek weet ek het gewig opgetel en ek is mal daaroor! Maar ag wat, 2021 was op só baie maniere ’n wonderlike jaar vir my en dis hartseer dat baie mense nie dié sentiment kan deel nie. Maar, ’n nuwe jaar het aangebreek en al wat ons kan doen is om dit met ope arms en harte vol hoop aan te pak. Daar is soveel geleenthede en deure wat gedurende hierdie jaar vir ons geopen kan word. Ek weet dit klink soos ’n cliché of ’n lyn uit ’n rolprent, maar ek het dit so ondervind en ek glo vele ander mense ook.Dit is werklik merkwaardig wat in ’n kwessie van twaalf maande kan verander, solank jy positief en gefokus bly. Alles wat jy gemanifesteer het, sal sekerlik verwesenlik word.Gaan vind liefde. Verhuis. Reis. En die belangrikste, lewe voluit asof môre nie gewaarborg is nie.

Dankie, 2021, en welkom, 2022

Kommentaar

Republikein 2025-12-15

Meld asseblief aan om kommentaar te lewer

Dankie, 2021, en welkom, 2022

Kommentaar

Republikein 2025-12-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.