Damarakultuur vertoon by lewende museum

Tanja Bause - “As jy die droë mis van 'n olifant vat en dit in warm water week, kan jy dit op pynlike gewrigte sit. Dit is wat ons oumense doen,” sê me. Regina Haibes.En 'n stinkbos kan gebruik word teen maagkrampe. “Maar jy kan dit net gebruik as jy alleen is. Dit werk vinnig en die winde is sterk, so dit is nogal noodsaaklik dat jy nie naby ander mense is wanneer jy die tee drink nie,” sê sy. Haibes is die Damara-lewende museum, naby Twyfelfontein in die Kunenestreek, se “medisynevrou”. Die museum is in Februarie 2010 geopen en is die eerste tradisionele Damara-nedersetting in Namibië. Met hul aankoms word almal deur 'n vriendelike toergids in 'n lendedoek gegroet.Mnr. Rusten /Urima /Aib begelei toeriste deur die nedersetting en vertel hulle in perfekte Engels oor sy mense se tradisionele lewenstyl. Haibes vertel in Damara van die helende eienskappe van die plante in die omgewing, en /Aib vertaal wat sy sê. Ook wanneer vuur op tradisionele wyse met twee stokkies gemaak word, sing die mans “brand vuur, brand” in Damara.“As jy nie vuur kan maak nie, kan jy nie 'n vrou kry nie,” verduidelik /Aib terwyl hy probeer om die gras aan die brand te steek.'n Besoek aan die museum leer besoekers ook meer oor die maak van tradisionele wapens en gereedskap. Daar word gesing en gedans en die vroue wys hoe hulle juweliersware maak en met hul hande werk.Alles wat in die lewende museum gemaak word, is te koop.“Die museum is vir ons baie belangrik, want hier leer ons nie net ons kinders oor ons kultuur nie, maar deel ons ook ons kultuur met toeriste en Namibiërs. Dit terwyl ons 'n salaris verdien, veral omdat werksgeleenthede in die Kunenestreek baie skaars is. “Die juweliersware en handgemaakte items wat ons hier verkoop, word ook deur werkloses wat naby die museum woon, gemaak en hier verkoop, so hulle verdien ook 'n inkomste,” het /Aib gesê. Daar is op die oomblik 30 mense by die museum in diens. “Daar is altyd agt mense by die museum om dinge aan die besoekers te wys en te verduidelik. Die ander is dan af,” het /Aib gesê.Die museum is deur die Living Culture Foundation Namibia (LCFN) gestig met die doel om kultuur te bewaar, armoede uit te wis en om kulturele en interkulturele uitruiling aan te moedig. Ander lewende museums sluit in dié van die Mafwe en Mbunza in die Zambezistreek, die Ju/'hoansi by Grashoek, Hunters museum by Tsumkwe en die Ovahimba-museum in die Omungunda-nedersetting naby Opuwo.

Damarakultuur vertoon by lewende museum

Kommentaar

Republikein 2025-05-01

Meld asseblief aan om kommentaar te lewer

Damarakultuur vertoon by lewende museum

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie