Daar is te veel klakouse, brombere en grompotte

Jy kry twee soorte mense: Vir sommige is die glas halfvol en vir ander is die glas halfleeg. Die wêreld het oorgenoeg klakouse, brombere en grompotte. Jy kry die vegetariërs of – nóg 'n stappie verder – die veganiste wat die vleis(vr)eters veroordeel. Vergeet daarvan om voor hulle aan 'n skaapribbetjie te smul of aan 'n biltong te kou. Jy mag darem saam met hulle koffie drink, maar net met amandelmelk of stink sojamelk. In Londen kan die veganiste nou sowaar aan vis en tjips smul, maar dis nie vis uit die seewaters nie. Die vis is van piesangbloeisels gemaak en smaak glo soos die ware Jakob. Ek wil ook nie diere seermaak nie en ek hoop my tandarts trek eendag my vleistande, maar groente en vrugte is peperduur in Namibië. Ek wonder ook soms oor die vegetariërs en veganiste se pragtige leerskoene of -handsakke. Jy kry jy die antijagters wat die jagters haat. Hulle bly meestal in lande waar daar omtrent geen wild meer oor is nie. Ek het niks teen 'n jagter wat 'n springbok vir die pot skiet of vir bewaringsdoeleindes nie, maar ek weet regtig nie hoe sogenaamde jagters wat 'n geblikte leeu skiet, dit sportmanskap kan noem nie. Dan kry jy diereliefhebbers en mense wat katte of honde of enigiets met meer as twee bene haat. (Ek is bang vir alle agtpotiges en oorkruipers.) As mense my vra of ek 'n katmens of 'n hondmens is, antwoord ek: Gee my enige dier. Diere is altyd bly om jou te sien en lojaal tot die dood ons skei. Die rede waarom ek meer van diere as van mense hou: Mense kla graag. Steen en been. Sommige kla oor alles – van die weer tot die ekonomie. Dan is dit te warm, dan is dit te koud. Dan is dit droogte, dan reën dit te veel en die wasgoed word nie droog nie. Dan is die rand te hoog en dan weer te laag. Die mense met die witbrood onder die arm kla gewoonlik die meeste. Die grootste klakouse is dié met 'n paleis, 'n luukse sedan en twee 4x4's om die bedorwe brokkies privaat skool en winkelsentrum toe te ry, plus nog 'n boot by die "huisie" by die see. Hulle kla oor die huishulp nie ordentlik afstof nie en betaal die huishulp die minimumloon. Grompotte, gaan kyk gerus hoe lyk haar sinkkaja en taxitariewe. Ons bevind ons tans in baie moeilike ekonomiese tye en dit is nie altyd maklik om positief te bly nie. Al kan jy nie elke dag in die wolke wees nie, gee dit jou egter nie 'n rede om 'n grompot of 'n brombeer te wees nie. Ek omring my liewer met mense wat die silwer randjie om die donker wolk raaksien. Donker wolke bring reën en reën is 'n seën vir ons land. Ek hou van mense wat sê my beker loop oor, ek deel graag met jou. Ek hou van mense wat sê kom ons maak die glas – of dit nou halfleeg of halfvol is – propvol.

Daar is te veel klakouse, brombere en grompotte

Kommentaar

Republikein 2026-04-23

Meld asseblief aan om kommentaar te lewer

Daar is te veel klakouse, brombere en grompotte

Kommentaar

Republikein 2026-04-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.