Daai snor, truie en die 70’s

Ek was een keer in die Kaap en dit was tipiese winterweer. Die Kaap is ’n voorloper as dit by sulke weer kom, en dan verlang jy na pannekoek, bedsokkies, japonne, My Sister’s Keeper en dennehout. Alles gelyk. Ek het TV gekyk, hoewel ek eerder wou lees. Maar die boek wat ek in daai stadium geknie het, was op sy nippertjie en die reën sou nie die laaste paragraaf haal nie. Daai soort roman vereis ’n sekere tipe weer. Donker, kwaai en somber. Toe sit ek die boek op die koffietafel neer en verklaar hom eers beset. Dit was nie lank nie, toe syfer die son deur die spookasemwolke en die oomblik is belemmer. Spring-spring is ek deur die kanale. Slukkie wyn. Spring weer. Ek gly op die bank rond soos iemand wat in Vaseline geswem het. Loer die boek. ’n Jong man staan voor ’n spannetjie chicks en vra hulle oor die liefde uit, op die TV bedoel ek. Die man vertel ’n reeks grappies en die netbalspan is aan’t skater. In ’n kleurvolle truitjie wat lyk soos ’n Krismis-trifle met die reënboog as tema, en swart snorretjie op sy bolip, ondervra hy hulle verder. Ek lê soos ek vir sy grappe lag.“Schalk,” sê een met sulke proteshare - hoog en styf, “ . . . ek glo nie in liefde nie.”Woeps, sluk hy sy snorretjie byna weg en keer sy lag met die uitgerafelde reënboogmou.“Dan is jy op die verkeerde plek,” antwoord hy, amper asof hy lieg.In daai stadium het ek dit nie besef nie, maar die man met die wurmpiesnor was Schalk Bezuidenhout. Ek woon onder ’n klip. Ek het nie geweet hierdie ou is famous nie. Hy is ’n akteur, TV-persoonlikheid, radio-omroeper, komediant en volgens hom vry hy met daai snor elke keer vir ’n podiumposisie. Die meisies in Kempton Park (dit is sy home town en hy is trots daarop) staan glo tou. Die meeste mense ken vir Schalk Bezuidenhout van Die Kliek af - daai TV-program wat hopeless romantics help om liefde te vind. Dit is hoe ek van hom te hore gekom het. Die Kliek is soos ’n TV-weergawe van Tinder. Dié wat nie Die Kliek kyk nie, sal vir Schalk herken oor sy rol op die gewilde kykNET sepie Hotel. Bezuidenhout het in 2011 sy merk in die vermaaklikheidsbedryf begin maak toe hy besluit het om stand up comedy tydens sy studies te doen. Hy besef die lewe gaan oor baie meer as boerewors en rugby. Intussen tree hy saam met groot name op, maar ek praat van swaargewigte soos Trevor Noah. Nie een keer nie, maar twee keer. Schalk het in sy kort tydjie in die vermaakbedryf vir hom ’n highway vorentoe geteer. Ek vermoed dit is omdat hy nie te veel stres oor wat hy sê nie. Op die verhoog is hy pret en energiek en mense van alle soorte en kleure vind aanklank by hom. Eerlikheid is baie snaakser as enige grappie. En dit is wat hy is - eerlik oor sy menswees. Schalk is tans op toer met sy show Voksbesit. En dit is nie ’n tikfout nie. Die lelike woord word in elk geval met ’n “f” gespel. Die media gons oor hierdie man se vermoë om skares maagpyn te gee van die lag. En dit bly nou maar ’n feit soos ’n koei – humor is goud. Ek probeer aan verskonings dink hoekom jy nie na sy skerp, eerlike humor moet gaan luister nie. Schalk is Donderdag 9 November om 18:00 en 20:00 in sy show Vokbesit by die Warehouse-teater te sien. Ek het klaar die weervoorspelling gekyk. Dit gaan nie reën nie. Nog minder gaan jy lus hê om pannekoek te bak. So bêre jou boek op die koffietafel en gaan kyk vir Schalk.Schalk praat uit:1) Waarvoor is jy bekend? Vir my bogemiddelde vryvermoë. Wel, dit was waarvoor ek bekend was op hoërskool. Dit en redenaars.2) Wou jy nog altyd stand-up comedy doen? Of het mense jou snaaks gevind en toe besluit jy – let me give this a go?Seker meer die tweede een. My groot droom was nog altyd meer acting. Oscars wen en so aan (en actually iets in Afrikaans sê wanneer ek wen, sodat almal kan gaan: “Dankie Schalk! Charlize wou dit nie doen nie!”). Maar nou is stand-up comedy een van my grootste passies.3) Waar kom jou grappe en kenmerkende humor vandaan?Die lewe. Dit klink nou baie esoteries, maar dis die waarheid. Jy kry nie materiaal uit op die bank sit en TV kyk nie. Jy kry dit uit lewenservaringe. Iemand wat iets weird vir jou sê terwyl jy ’n foto saam met hulle neem, ’n mooi meisie wat jou teleurstel, enigiets kan materiaal word. 4) Was jy al voorheen in Namibië? Nog nooit. Maar ek was al in Dubai en ek hoor dis soortgelyk daaraan. 5) Wat’s die storie agter jou truie?Elke trui het ’n ander storie. Tien teen een van ’n oumatjie wie se kinders en kleinkinders nie meer kom kuier nie en nou brei sy maar net kleurvolle truie om te vergeet. Was dit jou vraag? Die storie agter hoekom ek die truie dra, is eintlik eenvoudig. Ek het dit nie so beplan nie. Ek het een keer ’n baie mooi trui gesien by ’n tweedehandse kleremark. Ek dink nog altyd ek moes eintlik in die 60's of 70's gebore gewees het. Ek hou van ou truie dra. Ek het porseleinhonde in my huis. Ek ry ’n 1977 Mercedes. So, toe koop ek die trui en later nóg een en nóg een en nóg een en toe, voor ek my oë kon uitvee, het dit ’n ding geword.6) Jy is ’n akteur, TV-aanbieder, ons hoor jou op die radio en jy doen stand-up. Wat kan jy nog doen? Watter een van dié geniet jy die meeste en hoekom?Ek kan lekker vry. Het ek dit al genoem?7) Wat is vir jou snaaks?Ag, maar net mense. Mense is die snaaksste goed in die wêreld. 8) Wat dink jy sal uiteindelik die internet breek?Wanneer dit uitkom dat Arnold Schwarzenegger inderdaad eintlik ’n robot is.9) Wat wil jy nog doen voor die einde van 2017?Twee shows in Namibië.10) Jy was onlangs in Londen vir ’n show. Hoe was dit? Lag die mense daar vir dieselfde jokes, of moet jy hulle aanpas?Ek het daai show baie internasionaal probeer hou. Ek wou hê die Suid-Afrikaners moes dit geniet, maar ek wou ook hê enigiemand van ’n ander land (al is daar net een in die gehoor) moet dit net soveel geniet. Die grappe kan aangepas word, maar jy kan nie jou sin vir humor aanpas nie. So, al was die show bietjie anders, was dit tog maar dieselfde. Die mense daar het dit baie geniet. Ek sal beslis binnekort teruggaan Londen toe. 11) Waaraan laat Crocs jou dink?Dit laat my aan niks dink nie. Dit laat my net voel: kwaad en hartseer.12) Waaroor is jy spyt in jou lewe?Sjoe. Diep . . . Ag, baie dinge. Onder meer dat ek nooit vir Karla Schoeman uitgevra het nie. Ek dink ons sou ’n great 9-jarige couple gemaak het.13) Watter soort kind was jy? Was jy die hoofseuntipe? Was jy die leier van die skaakklub of het jy pouses agter die pawiljoene aangejaag? Ek was baie voorbeeldig. Ek het hier en daar ’n Hunter’s Dry op ’n koortoer gedrink, maar andersins het ek die reëls gevolg. Maar in Kempton Park het selfs die hoofseun én die leier van die skaakklub pouses agter die pawiljoene aangejaag. 14) Vind jy jouself snaaks?Ja.15) Lees jy? Wat? Emails en subtitels.16) Sal jy jou online passwords met jou ma deel?Ja wat. Daar is niks in my inbox wat sy nog nie in my shows gehoor het nie.17) Is jy die odd one out in julle familie?Ek is die enigste een wat by die kunste betrokke is, maar ek sal nie sê odd one out nie. Ek moet natuurlik al die speeches en heildronke instel op elke troue en verjaardagpartytjie. 18) Gestel jy moet hierdie vrae oor 10 jaar weer antwoord, wat sou jy op nommers 2, 14 en 20 antwoord?1. Daai hofsaak waaroor niemand wil praat nie.12. Daai hofsaak waaroor niemand wil praat nie.18. Ek kan hierdie vraag nie antwoord nie weens ’n hofsaak waaroor niemand wil praat nie.

Daai snor, truie en die 70’s

Kommentaar

Republikein 2026-11-03

Meld asseblief aan om kommentaar te lewer

Daai snor, truie en die 70’s

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.