Cranes oorweldig gasheer met 26 punte

Tielman van Lill – Die Namibiese Desert Jewels-netbalspan is gister by die Wanderers-saal in Windhoek sy tweede nederlaag van die Afrikabeker toegedien, toe Uganda met 62-36 gewen het.

Die Uganda Cranes het die eerste kwartier met 17-14 in hul guns afgesluit. Ná die tweede kwart was die verskil 30-24 en ná die derde kwartier 43-33. Tydens die laaste kwart het die Oos-Afrika dit reggekry om die Jewels grootliks van balbesit te ontneem om in dié tydperk 19 doele teen die gasheer se drie aan te teken vir ’n veel meer oortuigende wentelling.

Julene Meyer, hoofafrigter van die Desert Jewels, het gesê: “Ek dink die eerste drie periodes was oukei, maar in die laaste een het ons beheer verloor.

“Ek is nie gelukkig met die laaste kwartier se spel nie. Van die spelers het nog nie al die vereiste tegniese vaardighede onder die knie om onder druk kalm te bly nie.

“Slegs met ondervinding sal spelers hul man kan staan om vir lang tye die druk te kan verwerk. Maar ons sit met ongelooflike talent wat nog moet groei.

“Nadat ons die wedstryd teen Uganda eerlik met mekaar bespreek het, sal die spelers vir vandag se kragmeting teen Kenia rus.”