Cran-vereiste kan inligtingstegnologie strem

Elvira Hattingh – Invoerders is bekommerd dat die nuwe regulasies waarvolgens die Regulerende Owerheid vir Kommunikasie van Namibië (Cran) telekommunikasietoestelle vanaf 1 November eers sal moet goedkeur voor dit Namibië binnekom, rampspoedige gevolge vir onder meer die inligtingstegnologie-sektor inhou. Dit volg nadat Cran verlede jaar ’n kennisgewing in die Staatskoerant, nr. 5659, gepubliseer het waarvolgens alle telekommunikasie-gereedskap eers goedkeuring moet kry dat dit onder meer van goeie gehalte en veilig is, die korrekte frekwensies gebruik, aan internasionale standaarde voldoen en toepaslik vir plaaslike netwerke is. Die goedkeuring is van toepassing op enige een wat telekommunikasiegereedskap invoer, installeer of verkoop. NYWERHEDE BEKOMMERDRaadslede van beide die Inligting en Kommunikasietegnologie Beroepslui-vereniging vir Namibië (ICTPAN) asook die Afrika Inligting en Kommunikasietegnologie Alliansie meen hierdie vereistes is onuitvoerbaar weens die omvang daarvan, die koste en tyd wat dit sal neem om goedkeuring te kry en ook omdat Cran, volgens hulle, nie die kundigheid of kapasiteit het om die toetse self uit te voer nie.“Hierdie regulasie sal nie net die inligtingstegnologie-sektor raak nie, maar ook alle invoerders van motors, mediese toestelle, sekuriteitstoerusting en speelgoed. “Cran het hierdie regulasies ingestel ongeag vergaderings met bekommerde lede van die inligtingstegnologie-sektor, waartydens ons die impak hiervan bespreek het. Die bedryf wag nog steeds dat die owerheid op enige van ons kwellinge reageer en ignoreer ons skynbaar,” het mnr. Paul Rowney, ’n raadslid van beide ICTPAN en die Afrika Inligting en Kommunikasietegnologie Alliansie gesê. “Dit gaan daartoe lei dat Namibiërs nie meer dieselfde produkte as diegene in ander SADC-lande kan koop nie. Cran aanvaar nie goedkeurings van die toestelle deur ander SADC-lande nie en vereis bykomende toetsverslae. “Cran mag aanvoer dat hierdie die verantwoordelikheid van die veraardiger en nie die invoerder is nie, maar verskeie vervaardigers het reeds aangedui dat die Namibiese mark so klein is dat dit nie vir hulle kostedoeltreffend sal wees om eens hierdie toetse uit te voer nie,” het hy gesê. TOETSTYDPERK TE LANKMnr. John Kirton, ook ’n raadslid van ICTPAN asook Pinnacle se besturende direkteur, sê hierdie situasie kan moontlik klein- en medium sakeondernemings se deure sluit omdat hulle nie langer produkte sal hê om te verkoop nie. “Cran het heeltemal te min personeel en nie die kundigheid om hierdie toetse self te doen nie, wat beteken dit sal tot twee maande neem om goedkeuring te kry. Hulle moet gevolglik op die Onafhanklike Kommunikasie-owerheid van Suid-Afrika (Icasa) steun, wat tans tot 120 dae neem om ’n produk goed te keur. Dit beteken teen die tyd dat Cran ’n produk goedkeur, is dit naby die einde van sy rakleeftyd. Mnr. Steven Opperman, ’n ontleder van sakebestuur by Drive Control Corporation, stem saam hiermee. “Die lewensduur van tegnologie verander voortdurend en sommige produklyne is net vir ses weke geldig. Dit beteken ons sal elke ses weke ’n nuwe reeks by Cran moet registreer. As dit tot vier weke neem om ’n goedkeuringsertifikaat te kry, beteken dit die produkte het net ’n raklewe van twee weke oor. “Dit beteken ons verkoop ou tegnologie aan die mark en dit is nie regverdige besigheid nie,” het Opperman gesê. “Ons steun Cran in beginsel – om kommunikasiestandaarde te handhaaf – maar tans gaan die regulasie daartoe lei dat produkte net vir die elite beskikbaar sal wees en ’n gebrek aan verskeidenheid op winkelrakke bestaan. “Die bedryf moenie deur onredelike eise vir papierwerk belemmer word nie, iets wat ’n realiteit vir Namibiërs sal word indien die proses vir goedkeuring nie meer prakties gemaak word nie.”GEBREK AAN VERSKEIDENHEIDOpperman sê alle handelsmerke gebruik dieselfde kommunikasiestandaarde binne verskillende lande. Gevolglik word oor en oor betaal om vir dieselfde standaarde te toets – wat beteken die publiek betaal meer vir ’n produk wat goedkoper in ’n buurland verkoop word.“’n Produk word gevolglik swaar belaai deur oorhoofse kommunikasiekoste – vanaf die Europese blok, Icasa en daarna weer deur Cran. Eindelik moet die koste in die produk bygewerk word en kos dit baie duurder in Namibië as in Europa. “Die enigste manier om hierdie koste te besnoei, is om ’n kleiner verskeidenheid van produkte plaaslik aan te bied en net op die vinnige verkopers te fokus. Om ’n voorbeeld te noem: In Suid-Afrika word tans 63 verskeie opsies van ’n sekere Notebook-handelsmerk, maar tans is net vyf hiervan in Namibië beskikbaar.” Mnr. Nico Mingelius, ook ‘n plaaslike invoerder, sê weens tegnologie wat vinnig vorder, gaan die vereiste moontlik ook invoerders van televisiestelsels, yskaste, lugverkoelers, rekenaars en oorplaatjies vir vee raak. “Dit beteken Cran sal al hierdie toestelle moet goedkeur, wat beteken dit sal buite sy mandaat optree en ook regulering in ander sektore uitoefen, behalwe vir die kommunikasiesektor.Nanodog se mnr. Johan du Plessis sê hul kliënte doen dikwels spesiale bestellings by hulle, wat behels dat ’n produk uit die buiteland bestel word. “Met die nuwe regulasie is dit nie meer moontlik nie; kliënte sal tevrede moet wees met dit wat beskikbaar is. Geen handelaar gaan deur die hele goedkeuringproses gaan vir net ’n enkele item nie,” het hy gesê.Cran het aangedui dat dit nog tot Vrydag op Republikein se vrae oor die nuwe regulasie sal reageer. KASSIEVan die items op die lys wat eers deur Cran goedgekeur moet word, sluit in eenhede wat oproepe monitor of opneem, modems, faksmasjiene, skakelbordtoerusting, radio-kommunikasietoestelle, GPS-toestelle, alle afstandbeheertoestelle – ook dié wat deure en hekke oop- en toemaak, alarms en ander toestelle wat bewegings waarneem, geslote kringtelevisie, koordlose klanktoestelle, insluitende koordlose mikrofone, mediese inplantingtoestelle, alle toestelle wat van Bluetooth gebruik maak, motorradio’s, alle telefone en antwoordmasjiene asook VOIP-netwerk toestelle.Cran kan moontlik ’n verklaring van ooreenstemming van ’n invoerder aanvaar in geval gesertifiseerde kopieë van toetsverslae deur ’n geakkrediteerde toetslaboratorium ingedien word, maar kan steeds besluit dat die betrokke toestelle nog ’n toets moet deurloop.Andersins sal die owerheid ’n voltooide aansoek om goedkeuring oorweeg binne veertig dae nadat dit ingedien is en ’n goedkeuringsertifikaat aan die aansoeker toeken, wat vir drie jaar geldig is. Indien toestelle afgekeur word, sal dit nie in Namibië verkoop mag word nie.

Cran-vereiste kan inligtingstegnologie strem

Kommentaar

Republikein 2026-02-03

Meld asseblief aan om kommentaar te lewer

Cran-vereiste kan inligtingstegnologie strem

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.