CoW skors baas ná 5G-storm

RDP-ondersoek duur voort





Denver Kisting – Die City of Windhoek (CoW) het gistermiddag by monde van sy hoofwoordvoerder, mnr. Harold Akwenye, bevestig die hoof van sy inligting- en kommunikasieafdeling, mnr. Reckliff Kandjiriomuini, is geskors.

Dít kom nadat Kandjiriomuini verlede maand by ’n omkoopskandaal betrek is waarby N$5 miljoen glo betrokke is.

Akwenye het gistermiddag by navraag gesê: “Dis waar, ja. Dit (die skorsingsbrief) is Dinsdag 11 Augustus op hom beteken.”

Hy sê die verwikkeling het ten doel om ’n ongehinderde ondersoek na die bewerings teen Kandjiriomuini moontlik te maak.



Kandjiriomuini het in Julie ontken hy het ’n raadslid van die Rally for Democracy and Progress (RDP), me. Brunhilde Cornelius, probeer omkoop sodat sy haar steun kan toesê aan ’n Oosterse tegnologiereus vir ’n 5G-tender. “Met watter geld? Hoe sal ek omkoop?” wou hy weet.

Hy het aanvanklik aan Republikein gesê hy is nie in daardie stadium by magte om op die beweringe teen hom kommentaar te lewer nie. Volgens hom het hy toe gewag op die bevindinge van ’n onafhanklike ondersoek na die aantygings. Hy het geen verdere besonderhede oor dié beweerde ondersoek verstrek nie.

Gister het hy nie op ’n WhatsApp-navraag gereageer of sy foon geantwoord nie.

Mnr. Nicanor Ndjoze, Cornelius se mede-RDP-lid wat glo deur Kandjiriomuini gebruik is om haar om te koop, het gister opnuut geweier om kommentaar te lewer.

Hy sê hy swyg op regsadvies. Hy wou terselfdertyd nie gistermiddag die naam van sy regsverteenwoordiger “onthul” nie.

Volgens hom sal hy nie die RDP se opdrag gehoorsaam om op skrif sy weergawe aan dié opposisieparty te stel nie.

Ndjoze sê hy het besluit om hom eerder tot die hof te wend.

Wat die aard van dié plan behels, het hy nie gesê nie.

Die RDP-president, mnr. Mike Kavekotora, sê die party het besluit om nie vir Cornelius of Ndjoze hangende hul interne ondersoek te skors nie. “Ons het tot die gevolgtrekking gekom dat omdat hierdie ’n eksterne aangeleentheid is, sal hulle met niks inmeng nie.”

Cornelius het onlangs aan die nasionale polisiehoof, lt.genl. Sebastian Ndeitunga, geskryf om haar kommer uit te spreek.

In dié skrywe sê sy sy is die klaer in die saak wat verband hou met “bewerings van hoëvlakkorrupsie by die City of Windhoek”.

Volgens haar is die “primêre bewysstukke” oor die beweerde voorval reeds twee maande onverrigtersake in die polisie se hande.

Boonop, maan Cornelius, het “verskeie voorvalle” kommer laat ontstaan “dat die bewyse nie meer veilig is nie of die risiko loop om te verdwyn”.

Sy dring voorts aan op die naam en kontakbesonderhede van die huidige ondersoekbeampte vanweë die feit dat komm. Nelius Becker nie meer gemoeid is met die saak nie, sê Cornelius.

Sy vra ook dat Ndeitunga haar sy “persoonlike versekering” gee dat die bewyse steeds veilig is en veilig sal bly.

Dae later skryf Ndeitunga terug en sê onder meer: “Geliewe verseker te wees dat die bewyse wat ingesamel is, sal bewaar word en is veilig.”

Volgens die nasionale polisiebaas is die dossier en die bewyse sedertdien per hand aan die Teenkorrupsiekommissie (ACC) oorhandig.

Daardie liggaam sal voortaan die ondersoek behartig, sê hy.

Me. Josefina Nghituwamata, die ACC se woordvoerder, het vroeër gesê die dossier is tans by hul direkteur-generaal, mnr. Paulus Noa.

Gistermiddag het sy onderneem om te laat weet in watter stadium die ondersoek is en of Noa reeds ’n beslissing gemaak het oor die weg vorentoe. “Ek sal binnekort (voor die einde van die dag) reageer.” - [email protected]